१३ वाणिज्य बैंककाे वित्तीय विवरण : कुन बैंककाे नाफा कति ?

A+ A A-

बैंक तथा वित्तीय संस्थाहरूले धमाधम चौथो त्रैमासिक विवरण सार्वजनिक गरिरहेका छन् । अहिलेसम्म १३ वाणिज्य बैंकले गत आर्थिक वर्षकाे चौथो त्रैमासिक विवरण सार्वजनिक गरिसकेका छन् ।

काेराेना महामारी र त्यसपछि उत्पन्न परिस्थितिले बैंकहरूलाई असर पुर्‍याएकाे उनीहरूकाे वित्तीय विवरणले देखाउँछ ।

सबैभन्दा बढी नेपाल इन्भेस्टमेन्ट बैंकको नाफा ७५ करोड रूपैयाँ घटेकाे छ । योसँगै अन्य ८ बैंकको नाफामा कमी देखिएकाे छ भने ४ बैंक भने नाफा बढाउन सफल भएका छन् ।

अघिल्लो वर्षको तुलनामा ५९ करोड रूपैयाँ नाफा घटे पनि राष्ट्रिय वाणिज्य बैंककाे नाफा अन्य बैंकहरूकाे भन्दा बढी नै छ । राष्ट्रिय वाणिज्य बैंकले गत आर्थिक वर्षमा ४ अर्ब ४५ करोड रूपैयाँ नाफा गरेकाे थियाे ।

कुन बैंककाे नाफा कति ?

हिमालयन बैंक

गत आर्थिक वर्षकाे विवरणअनुसार हिमालयन बैंकको नाफा २२ करोड रूपैयाँले घटेको छ । बैंकले २ अर्ब ५४ करोड खुद नाफा गरेको छ । बैंकले अघिल्लो वर्ष २ अर्ब ७६ करोड रूपैयाँ नाफा गरेको थियो ।

बैंकले खराब कर्जा रेसियो सामान्य घटाएर १.११ प्रतिशतमा झारेकाे छ। अघिल्लो वर्ष खराब कर्जाकाे प्रतिशत १.२१ थियाे ।

बैंकले गत आर्थिक वर्षमा ४ अर्ब ७५ करोड रूपैयाँको खुद आम्दानी गरेको छ भने वितरणयोग्य नाफा १ अर्ब ३० करोड पुर्‍याएकाे छ ।अब बैंकले शेयरधनीलाई १३.९६ प्रतिशत लाभांश दिन सक्नेछ ।

बैंकले गत आर्थिक वर्षमा १ खर्ब २५ अर्ब रूपैयाँ निक्षेप संकलन गरी १ खर्ब १ अर्ब रूपैयाँ कर्जा प्रवाह गरेकाे छ।

बैंक अफ काठमाण्डू

बैंक अफ काठमाण्डूको कर्जा प्रवाह र निक्षेप सङ्कलन राम्रो भए पनि खुद नाफामा भने कमी आएको छ । गत आर्थिक वर्षमा बैंकले १ अर्ब ४७ करोड रूपैयाँ नाफा कमाएको छ । यो अघिल्लो वर्षभन्दा ४२ करोड रूपैयाँले कम हो । अघिल्लो वर्ष बैंकले १ अर्ब ८९ करोड रूपैयाँ नाफा कमाएको थियो ।

गत आर्थिक वर्षमा बैंकले ९२ अर्ब १० करोड रूपैयाँ निक्षेप सङ्कलन र ७५ अर्ब रूपैयाँ कर्जा प्रवाह गरेको छ । निक्षेप र कर्जा प्रवाह दुवै अघिल्लो वर्षको भन्दा बढी हो ।

योसँगै बैंकको वितरणयोग्य नाफा ८८ करोड ७ लाख रूपैयाँ मात्र छ । बैंकको सञ्चालनयोग्य मुनाफा पनि घटेर २ अर्ब ११ करोड रूपैयाँमा झरेकाे छ । गत आर्थिक वर्षमा बैंकको खराब कर्जा बढेर २ दशमलव ३५ प्रतिशतमा पुगेको छ ।

सिद्धार्थ बैंक

गत आर्थिक वर्षमा सिद्धार्थ बैंकको पनि खुद नाफा घटेर २ अर्ब ९ करोड रूपैयाँ पुगेको छ । अघिल्लो आर्थिक वर्ष यस्ताे नाफा २ अर्ब २५ करोड थियो । खुद नाफासँगै संचालन मुनाफा पनि घटेर ३ अर्ब ६ करोड रूपैयाँ पुगेको छ ।

बैंकको खराब कर्जा बढेर १ दशमलव ५६ प्रतिशतमा पुगेको छ । गत आर्थिक वर्षमा खराब कर्जा अनुपात ०.७५ प्रतिशत थियो । बैंकले १ खर्ब ३९ अर्ब ६० करोड रूपैयाँ निक्षेप संकलन र १ खर्ब २३ अर्ब ४४ करोड रूपैयाँ कर्जा प्रवाह गरेको छ ।

बैंकको चुक्ता पुँजी ९ अर्ब ७८ करोड ७७ लाख रूपैयाँ छ ।

नेपाल बैंक

नेपाल बैंकको पनि गत आर्थिक वर्षमा खुद नाफा ४ करोड रूपैयाँले घटेर २ अर्ब ५५ करोड रूपैयाँमा झरेकाे छ । अघिल्लो वर्ष बैंकको नाफा २ अर्ब ५९ करोड रूपैयाँ थियो । यस्तै, बैंकको वितरणयोग्य नाफा २ अर्ब २१ करोड रूपैयाँ छ ।

बैंकले १ खर्ब २ अर्ब रूपैयाँ बराबरको कर्जा प्रवाह र निक्षेप संकलन १ खर्ब ४२ अर्ब गरेको छ । अधिकांश बैंकको खराब कर्जा बढिरहँदा नेपाल बैंकले भने घटाएर २.५९ प्रतिशतमा पुर्‍याएको छ । अघिल्लो वर्ष बैंकको खराब कर्जा अनुपात २.६४ प्रतिशत थियो ।

स्टयान्डर्ड चार्टर्ड बैंक

स्टयान्डर्ड चार्टड बैंकको पनि नाफा गत आर्थिक वर्षमा १७.७६ प्रतिशतले घटेर १ अर्ब ९८ करोड रूपैयाँ भएकाे छ। यस्ताे नाफा अघिल्लो वर्षकाे साेही अवधिमा २ अर्ब ४३ करोड रूपैयाँ थियो । बैंकको वितरणयोग्य नाफा १ अर्ब ५१ करोड रूपैयाँ छ । बैंकले २४.७६ प्रतिशत लाभांश दिन सक्नेछ ।

९८ अर्ब ४६ करोड ७५ लाख ९८ हजार रूपैयाँ निक्षेप संकलन गरेकाे बैंकले ५३ अर्ब ९१ करोड १२ लाख ९४ हजार रूपैयाँ कर्जा लगानी गरेको छ । बैंकको खराब कर्जा भने ०.१५ प्रतिशतबाट बढेर ०.४४ प्रतिशत पुगेको छ ।

नेपाल बंगलादेश बैंक

नाफा घट्ने बैंकहरूको सूचीमा नेपाल बंगलादेश बैंक पनि पर्छ । बैंकको ३४ करोड रूपैयाँले नाफा घटेर गत आर्थिक वर्षमा १ अर्ब २४ करोड रूपैयाँमा झरेकाे छ । अघिल्लो आर्थिक वर्षमा बैंकको नाफा १ अर्ब ५८ करोड रूपैयाँ थियो ।

बैंकको वितरणयोग्य नाफा ४४ करोड ९१ लाख १४ हजार १२ रूपैयाँ छ । बैंकले ५.२८ प्रतिशत लाभांश दिन सक्नेछ । यस्तै सञ्चालन मुनाफा पनि घटेर १ अर्ब ८० करोड ५ लाख ५८ हजार ९ सय २१ रूपैयाँमा पुगेको छ । बैंकको चुक्ता पुँजी भने ८ अर्ब ४९ करोड रूपैयाँ छ ।

बैंकले ६६ अर्ब ४३ करोड रूपैयाँ निक्षेप संकलन र ५८ अर्ब ९६ करोड रूपैयाँ कर्जा प्रवाह गरेको छ । बैंकको खराब कर्जा १.७४ प्रतिशतबाट बढेर २.८९ प्रतिशत पुगेको छ ।

राष्ट्रिय वाणिज्य बैंक

राष्ट्रिय वाणिज्य बैंक गत आर्थिक वर्षमा ४ अर्ब ४५ करोड रूपैयाँ नाफा गरेको छ । अघिल्लो आर्थिक वर्षको तुलनामा ५९ करोडले नाफामा कमी आए पनि अन्य बैंककाे तुलनामा याे बढी हाे । अघिल्लो आर्थिक वर्षमा बैंकले ५ अर्ब ४ करोड रूपैयाँ नाफा गरेको थियो ।

बैंकले सो अवधिमा २ खर्ब ३० अर्ब निक्षेप संकलन र १ खर्ब ५० अर्ब रूपैयाँ कर्जा लगानी गरेको छ । बैंकले खराब कर्जाको अनुपातलाई पनि घटाएर ४.०८ प्रतिशतमा सीमित गरेकाे छ ।

सबैभन्दा बढी नाफामा रहेकाे राष्ट्रिय वणिज्य बैंकको ब्याजदर पनि सबैभन्दा कम छ । बैंकको चुक्ता पुँजी ९ अर्ब रूपैयाँ छ ।

एभरेष्ट बैंक

एभरेष्ट बैंकले गत आर्थिक वर्षमा २ अर्ब ४९ करोड नाफा गरेको छ । बैंकको अघिल्लो आर्थिक वर्षको तुलनामा गत वर्ष ५६ करोडले नाफा घटेको हो । अघिल्लो आर्थिक वर्षमा बैंकको खुद नाफा ३ अर्ब ५ करोड थियो ।

बैंकले निक्षेप १ खर्ब ४३ अर्ब संकलन गरेको छ भने १ खर्ब १२ अर्ब रूपैयाँ कर्जा प्रवाह गरेको छ । बैंकको वितरणयोग्य नाफा १ अर्ब ६७ करोड रूपैयाँ छ । बैंकले शेयधनीहरूलाई २० प्रतिशतसम्म लाभांश दिन सक्नेछ । बैंकको चुक्ता पुँजी ८ अर्ब ५१ करोड रूपैयाँ रहेको छ ।

नेपाल इन्भेस्टमेन्ट

नेपाल इन्भेस्टमेन्ट बैंकको नाफा पनि यस वर्ष घटेको छ । बैंकले गत आर्थिक वर्षमा २ अर्ब ५७ करोड रूपैयाँ नाफा कमाएको छ । अघिल्लो वर्ष बैंकको नाफा ३ अर्ब ३२ करोड थियो ।

१४ अर्ब २४ करोड चुक्ता पुँजी रहेको बैंकको वितरणयोग्य नाफा ६५ करोड रूपैयाँ मात्र छ । यो आधारमा बैंकले शेयरधनीलाई बाँड्न मिल्ने नाफा ५ प्रतिशत हो ।

असार मसान्तमा बैंकले १ खर्ब ६६ अर्ब रूपैयाँ निक्षेप संकलन गर्दा १ खर्ब ३५ अर्ब रूपैयाँ कर्जा लगानी गरेको छ ।

नाफा बढाउने बैंकहरू

माछापुच्छ्रे बैंक

माछापुच्छ्रे बैंकले गत आर्थिक वर्षमा १ अर्ब २५ करोड नाफा गरेको छ । बैंकले अघिल्लो आर्थिक वर्षमा १ अर्ब ६९ करोड नाफा गरेको थियो ।

गत वर्षको असार मसान्तमा बैंकले निक्षेप ८५ रूपैयाँ र कर्जा ९२ अर्ब रूपैयाँ प्रवाह गरेको छ । बैंकले शेयरधनीलाई बाँड्न मिल्ने नाफा ९० करोड गर्दा १० प्रतिशत लाभांश बाँड्न सक्ने छ ।

बैंकको चुक्ता पुँजी ८ अर्ब ४५ करोड रूपैयाँ छ भने खराब कर्जा अनुपात ०.५४ प्रतिशत छ ।

प्राइम कमर्सियल बैंक

प्राइम कमर्सियल बैंकको नाफा १० करोड रूपैयाँले बढेको छ । अघिल्लो आर्थिक वर्षमा बैंकको खुद नाफा २ अर्ब १९ करोड रूपैयाँ थियो भने गत आर्थिक वर्षमा बढेर २ अर्ब २९ करोड रूपैयाँ पुगेको छ । यो अवधिमा बैंकको वितरणयोग्य नाफा १ अर्ब ६१ करोड रूपैयाँ र संचालन मुनाफा ३ अर्ब २७ करोड रूपैयाँ छ ।

चुक्ता पुँजी १३ अर्ब ९८ करोड रूपैयाँ रहेको बैंकले १ खर्ब १९ अर्ब ४४ करोड निक्षेप संकलन गर्दा १ खर्ब १० अर्ब ४५ करोड रूपैयाँ कर्जा लगानी गरेको छ । बैंकको खराब कर्जा १ प्रतिशतबाट बढेर १.५४ प्रतिशत पुगेको छ ।

एनएमबी बैंक

एनएमबी बैंकले आर्थिक वर्ष २०७५–०७६ भन्दा गत वर्ष ६ करोड रूपैयाँ बढी नाफा कमाएकाे छ । बैंकले गत आर्थिक वर्षमा २ अर्ब ३१ करोड रूपैयाँ खुद नाफा कमाएको हो । अघिल्लो वर्ष यस्ताे नाफा १ अर्ब २५ करोड रूपैयाँ थियो । बैंकको वितरणयोग्य नाफा १ अर्ब २७ करोड रूपैयाँ छ ।

बैंकको चुक्ता पुँजी १३ अर्ब ९५ करोड रूपैयाँ छ । यस बैंकले गत वर्षको नाफाबाट सेयरधनीलाई १०.२२ प्रतिशत लाभांश वितरण गर्ने सक्ने छ ।

बैंकले १ खर्ब ३१ अर्ब रूपैयाँ निक्षेप संकलन गरी १ खर्ब १५ अर्ब रूपैयाँ कर्जा प्रवाह गरेको छ । बैंकको खराब कर्जा अनुपात १.८६ प्रतिशतले बढेर २.६८ प्रतिशत पुगेको छ ।

ग्लोबल आईएमई बैंक

ग्लोबल आईएमई बैंकले गत आर्थिक वर्षमा ३ अर्ब ८ करोड रूपैयाँ नाफा गरेको छ । बैंकले अघिल्लो वर्ष सोही अवधिमा २ अर्ब ७६ करोड रूपैयाँ नाफा गरेको थियो । तुलनात्मक रूपमा गत आर्थिक वर्षमा बैंकको नाफा ३२ करोडले बढेको हो ।

बैंकले २ खर्ब १२ अर्ब ३१ करोड रूपैयाँ निक्षेप र १ खर्ब ८९ अर्ब ३८ करोड रूपैयाँ कर्जा प्रवाह गरेको छ । बैंकको चुक्ता पुँजी १८ अर्ब ९७ करोड रूपैयाँ छ ।

प्रकाशित मिति: शुक्रबार, साउन ३०, २०७७ २२:२५