जसपामा सिद्धान्तबारे गम्भीर बहस सुरु, ४ नेताका ४ प्रस्ताव

A+ A A-

संघीय संसदको नयाँ राजनीतिक दल जनता समाजवादी पार्टीको सिद्धान्तका बारेमा फरक फरक दृष्टिकोण पेस भएको खुलासा भएको छ ।

गत २१ साउन देखि २४ साउनसम्म पहिलो पटक बसेको केन्द्रीय कार्यकारिणी समितिको बैठकमा पार्टीको सिद्धान्तका बारेमा छलफल हुदाँ झन्डै आधा दर्जन दृष्टिकोणहरु प्रस्तुत भएको खुलेको हो ।

‘पार्टीको मार्गदर्शक सिद्धान्त अब के बनाउने ? भन्ने बारेमा प्रारम्भिक प्रस्तावहरु पेश भएका छन्, त्यसमा अब छलफलसमेत सुरु भएको छ,’ वरिष्ठ नेता राजेन्द्र महतोले शिलापत्रसँग भने, ‘प्रस्ताव मात्रै पेश गरिएकाले अब छलफल गरी टुंगोमा पु¥याउने छौं ।’

उनकाअनुसार पहिलो बैठक भएकाले त्यसबारेमा बृहत रुपमा भने छलफल हुन सकेको छैन ।

तत्कालीन राष्ट्रिय जनता पार्टी, नेपाल र समाजवादी पार्टीबीच गत २५ जेठमा औपचारिक रुपमा पार्टी एकीकरण भएको झन्डै दुई महिनापछि पहिलो पटक २१–२४ साउनमा पहिलो पटक केन्द्रीय कार्यकारिणी समितिको बैठक बसेको थियो ।

समितिका ५१ जना सदस्यलाई पदाधिकारीको जिम्मेवारी बाँडफाँड गर्ने एजेन्डा भए पनि सो विषयमा अनिर्णत भएर सकिएको बैठकमा पार्टीको सिद्धान्तका बारेमा भने फरक फरक दृष्टिकोण पेश भएका हुन् ।

अध्यक्ष उपेन्द्र यादवले समाजवादी लोकतन्त्रलाई पार्टीको सिद्धान्त बनाउनुपर्ने भन्दै छलफलका लागि प्रस्ताव पेश गरेका छन् भने पूर्वप्रधानमन्त्रीसमेत रहेका डा.बाबुराम भट्टराईले समुन्नत संघीय समाजवादलाई पार्टीको सिद्धान्त बनाउनु पर्ने धारणा राखेका छन् ।

वरिष्ठ नेता राजेन्द्र महतोले सामुदायिक समाजवादलाई पार्टीको सिद्धान्त बनाउनु पर्ने प्रस्ताव गरेका छन भने तत्कालीन राजपा नेपालका अन्य नेताहरुले लोकतान्त्रिक समाजवादलाई पार्टीको सिद्धान्तका बनाउनु पर्ने प्रस्ताव छलफलको क्रममा राखेको एक सदस्यले बताए ।

सन् १९५१ मा जर्मनको फ्रयांकफर्टमा समानता र समृद्धीको अर्थमा लोकतान्त्रिक समाजवाद भनिएको भएपनि पछिल्लो विश्वमा संघीयता, स्वयत्तता, समावेशीता र सुशासनका विषय पनि थप गरिएकाले नाममा फरक हुन गएको निष्कर्षमा लगभग सहमत देखिएका छन् ।

पार्टीको सिद्धान्त के बनाउने भन्ने बारेमा फरक–फरक मत र दृष्टिकोण पेश भएपछि जसपाको बैठकको अन्त्य गर्दै अध्यक्ष महन्थ ठाकुरले यसबारेमा अर्को बैठकमा छलफल गर्ने जनाएका थिए ।

‘पार्टी भित्र वैचारिक छलफल सुरु भएको छ, यो खुसीको कुरा हो, यसमा एकमत हुन अहिले नसकिएपनि भोलिका लागि छलफलको बाटो खुल्ला छ,’ ठाकुरले बैठक अन्त्य गर्दैै भनेका थिए, ‘अब अर्को बैठकमा वैचारिक र सैद्धान्तिक विषयलाई टुंग्याउने गरी बसौला ।’

जसपा गठन भएको केन्द्रीय कार्यकारिणी समितिको पहिलो बैठकमा वैचारिक र सैद्धान्तिक विषयमा प्रवेश गरेको भन्दै तत्कालीन राजपा नेपालका अन्य नेताहरुले भने ‘लोकतान्त्रिक समाजवाद’ नाम राख्दा सबैको भावना सम्बोधन हुनेमा जोड गरेका छन् ।

तत्कालीन राजापा नेपालले लोकतान्त्रिक समाजवादलाई सिद्धान्त मान्दै आएको थियो भने समाजवादीले समुन्नत संघीय समाजवादलाई सिद्धान्त माने पनि जसपामा पुगेपछि भने ४ वटा फरक–फरक दृष्टिकोण पेश भएको थियो ।

प्रकाशित मिति: बिहीबार, साउन २९, २०७७ १९:१०