पुल निर्माणको २५ प्रतिशत मात्र काम सकेर ठेकेदार सम्पर्कविहीन

A+ A A-

मोरङको बुढीगंगा भएर बग्ने सिंघिया खोलामा पुलको निर्माण कार्यमा ठेकेदार पक्षबाट लापवाही भएको पाइएको छ ।

निमार्ण सम्पन्न गर्नुपर्ने मिति सकिँदा समेत २५ प्रतिशत मात्रै काम गरेर निमार्णपक्ष बेपत्ता भएपछि स्थानीयले आवातजावतमा समस्या भोग्नु परेको छ ।

मोरङको बुढीगंगा गाउँपालिका-२ स्थित सिंघिया खोलामा पुलको निर्माण कार्यले तिव्रता नपाएपछि पुल अलपत्र अवस्थामा रहेको पाएको हो । सिंघिया खोलामा पुलको निर्माणका लागि ६० करोड ५७ लाख ६ हजार २ सय ५० रुपैयाँ ६० पैसाको लागतमा निमार्ण सुरु भएको पुल निमार्ण सम्पन्न नहुँदै बीचैमा अलपत्र छाडिएको छ ।

स्थानीयले ठेकेदारलाई पुल निर्माणको कामलाई निरन्तरता दिन पटकपटक आग्रह गर्दा पनि विभिन्न बहाना बनाएर पन्छिदै आएको स्थानीय बिनोद पोखरेलले बताए ।

पुल निर्माणले तीव्रता नपाउँदा स्थानीयलाई आवतजावतमा निकै नै समस्या भएको छ । पुल नभएका कारण स्थानीयलाई ओहोरदोहोरमा सास्ती हुँदै आएको छ ।

ठेकेदारलाई फोनमा सम्र्पक गर्दा कहिले लकडाउनको बहना बनाउने त कहिले पुल निर्माणका लागि रकम निकासा नभएको कारण काममा ढिलाई भएको भन्दै पन्छिने गरेको स्थानीयले बताएका छन् ।

सिंघिया खोलामा पुलको निर्माणका लागि २९ असार २०७५ मा अमर माँ जानकी (जे.भी.)कन्ट्रक्शन काठमाडौं ३० असार २०७७ मा पुल निर्माण गर्ने गरी ठेक्का पाएको थियो । तर, अहिलेसम्म २५ प्रतिशत मात्रै पुल निर्माणको काम भएको स्थानीय दुर्गा विष्टले बताए ।

स्थानीयले पुल निर्माण छिटो भए आवतजातमा सहज हुने बताएका छन् । पुल निर्माण कार्यलाई अलपत्र बनाएपछि पुल निर्माणका लागि राखिएका सामग्रीसमेत नष्ट हुँदै गएको छ । ठेकेदारले निर्माणका लागि ठेक्का पाएको ३ वर्ष बितिसक्दा पनि पुल निर्माणको काम भने ठप्प छ ।

निर्माणको काम समयमा सम्पन्न नगर्नु ठेकेदारको लापरवाही रहेको सडक डिभिजन विराटनगरका इञ्जिनियर नितेश झाले बताए ।

‘पुल निर्माणमा ठेकेदारको लापरवाही भएको पाइएको छ,’ उनले भने, ‘ठेकेदारलाई चाँडै काम सुरु गर्न भन्नेछौँ । त्यसपछि पनि अटेर गरे कारबाही प्रक्रिया नै अगाडि बढाउँछौँ ।’

पुल निर्माणको काम सम्पन्न भएपछि बुढीगंगा गाउँपालिका, ग्रामथान गाउँपालिका र विराटनगर १९ मिलन चोक लगायतका मानिस प्रत्यक्ष लाभान्वित हुने स्थानीयले बताएका छन् ।

प्रकाशित मिति: बिहीबार, साउन २९, २०७७ १६:५६