सुदूरपश्चिम प्रदेशसभाबाट प्रेस स्वतन्त्रतामा अंकुश लगाउन बनाएको विधेयक पारित

सुदूरपश्चिम प्रदेशसभाबाट प्रेस स्वतन्त्रतामा अंकुश लगाउन बनाएको विधेयक पारित

A+ A A-

सुदूरपश्चिम सरकारले प्रेस स्वतन्त्रतामा अंकुश लगाउन बनाएको विधेयक पारित गरेको छ । बुधबार एफएम रेडियो तथा टेलिभिजन प्रशारण सम्बन्धमा व्यवस्था गर्न बनेको विधेयक छलफलविनै पारित गरेको हो ।

प्रदेशसभामा प्रदेशसभाका सदस्यहरूले छलफलका क्रममा विधेयकका विभिन्न प्रावधानहरूमाथि दिएका सुझावहरूमाथि छलफलसमेत नगरीकनै प्रदेशसभाबाट विधेयक पारित भएको हो ।

प्रदेशसभा सदस्यहरूको बोल्ने क्रम सकिएसँगै सभामुख अर्जुनबहादुर थापाले विधेयकमाथि उठेका प्रश्नहरूबारे सरकारका तर्फबाट सामाजिक विकासमन्त्री कृष्णराज सुवेदीलाई जवाफ दिन अनुमित दिएका थिए । मन्त्री सुवेदीले जवाफ दिएलगत्तै प्रदेशसभा सदस्यका सुझावलाई छलफलमा नलिएर सोझै विधेयक पारित गर्ने प्रक्रिया सुरु गरिएको थियो ।

विधेयकमाथि प्रतिपक्षी दल नेपाली कांग्रेसका डिल्लीराज पन्त र सत्तापक्ष नेकपामा दुर्गा कुमारी कामीले विधेयकमा भएको व्यवस्थाअनुसार आफैँ अभियोग लाउने, आफैँ अनुसनधान गर्ने र आफैँ सजाय तोक्ने निकायका रूपमा आन्तरिक मामिला तथा कानून मन्त्रालय रहन नहुने, प्रशारणपूर्व कुनै पनि विषयको विवरण मन्त्रालयमा पेश गर्ने विषय संविधानविपरीत हुने बताएका थिए ।

नेपाल पत्रकार महासघ सुदूरपश्चिम प्रदेशका अध्यक्ष अर्जुन शाहले विधायन समितिले प्रदेश समितसँग कुनै छलफल नगरेको तथा प्रेस स्वतन्त्रताविपरीत हुने प्रावधानहरूमा प्रदेशसमितको असहमति रहेको बताए ।

मिडिया विधेयकको विरोधमा प्रदेशसभाअघि प्रदर्शन

मिडिया विधेयकको विरोधमा नेपाल प्रेस युनियन कैलाली शाखाले विरोध प्रदर्शन गरेको छ । रेडियो, एफएम र टेलिभिजन प्रसारण सम्बन्धमा व्यवस्था गर्न सुदूरपश्चिम प्रदेश सरकारले ल्याएको विधेयकमा विरोध जनाउँदै प्रेस युनियनले प्रदेशसभाअघि प्रदर्शन गरेको हो ।

प्रेस स्वतन्त्रतामाथि अकुश लगाउने प्राबधानसहितको विधेयक पास गरिनु दुःखद् कुरो भएको नेपाल पत्रकार महासघका पूर्वकेन्द्रीय सदस्य दिलबहादुर छल्यालले बताए । सुरुमा मस्यौदामाथिको छलफलका क्रममा पत्रकार महासघ, पत्रकार र सरोकारवालाको सुझाब नसमिटिएको बताउँदै उनले अहिले आएर सांसदले दिएका सुझाब समेत नसमेटी अकुंश लगाउने प्राबधानको बिधेयक पास भएको बताए ।

नेपाल प्रेस युनियन कैलालीका सभापति श्रवण देउवाले प्रदेश सरकारले ल्याउन लागेको मिडिया विधेयक मिडिया मैत्री र पत्रकार मैत्री नभएको बताए । मिडियामाथि हस्तक्षेप गदै प्रदेश सरकारले विधेयक पास गर्न लागेको भन्दै उनले आपत्ति जनाए ।

प्रकाशित मिति: बिहीबार, साउन २९, २०७७ ००:४८