डडेल्धुराका सडकमा बोलन्या थलीको ‘शव’ प्रदर्शन

A+ A A-

डडेल्धुरामा बोलन्या थलीले ‘शव’ प्रदर्शन गरेको छ । मंगलबार दिउँसो जिल्ला सदरमुकामको भीमदत्त सालिकनजिकै बोलन्या थलीले ‘शव’ प्रदर्शन गरेको हो ।

बोलन्या थलीले ‘आहा ! सफा, सौन्दर्य र फराकिलो सडक’, ‘कोरोनाले होइन, दुर्घटनाले मरिएको छ’, ‘म त गएँ माथि, तिमी बाँच है साथी’, ‘सडक चौडा खै, म त स्वर्ग पुगे बरी लै’, ‘लगायतका नारा दिएर प्रदर्शन गरेको थियो ।

‘शव’ बनेर विकास निर्माणको कार्यमा अवरोध गर्नेका विरुद्ध प्रदर्शन गरेका बोलन्या थलीका संयोजक यादव जोशीले बताए । उनका अनुसार स्थानीयहरूले भोग्नुपरेको समस्यालाई मध्यनजर गर्दै दबाबस्वरुप प्रदर्शन गरिएको हो ।

बजेट विनियोजन भई टेण्डर प्रक्रियामा गइसकेका बेला व्यापारीले सर्वोच्चमा मुद्दा दायर गरेर निर्माण कार्य रोकेको भन्दै ‘शव’ बनेर सडक बनाउन दबाब दिएको जोशीको भनाइ छ ।

डडेल्धुरा सदरमुकामको साघुँरो सडकका कारण दुर्घटनाको उच्च जोखिम उच्च छ । ७ पहाडी जिल्लाको केन्द्रमा रहेको डडेल्धुरा सदरमुकाममा दैनिकजसो जाम लाग्ने गरेको छ । जसका कारण हिँडडुल गर्न समस्या हुने स्थानीय बताउँछन् ।

सडक विस्तारका लागि संघीय सरकारबाट ४४ करोडको बजेट विनियोजन भएको थियो । सडक विस्तारका लागि टेण्डरसमेत भइसकेको अवस्थामा बागबजारका केही व्यापारीले क्षतिपूर्ति माग गर्दै सर्वोेच्च अदालतमा मुद्दा दायर गरेका थिए ।

जसका कारण अहिले सडक विस्तारको काम रोकिएको छ । सोही विषयलाई लिएर बोलन्या थलीले सदरमुकामको बागबजारमा प्रदर्शन गरेको हो ।

यसअघि 'आश्वासनका २८ वर्ष : पश्चिम सेती कहिले बन्छ ? आजको रोगलाई त जितौँला, भोलिको भोकलाई के गरौँला ? रिभर्स माइग्रेसनको व्यवस्थापन गरौँ' भन्ने नारासहित बोलन्या थलीले डोटीको सेती नदीको पुलमा टुकी बालेको थियो ।

त्यस्तै, 'आश्वासन अति भो, धैर्य गर्ने कति हो ? आश्वासनका २२ वर्ष पश्चिम सेती कहिले बन्छ ? हिजो आशा मर्‍यो, आज जवानी मर्दै छ, भोलि सपना मर्नेछ’ लगायत नारासहित बोलन्या थलीले कचौरा लिएर काठमाडौंको माइतीघर मण्डलमा प्रदर्शनसमेत गरेको थियो ।

सुदूरपश्चिमबाट संघीय संसदमा प्रतिनिधित्व गर्ने १३ जना सांसदसँग छलफल र संगीत संघर्ष कार्यक्रमसमेत गरेको थियो ।

प्रकाशित मिति: मंगलबार, साउन २७, २०७७ २२:५९