सिड्नीमापनि मनाइयो नयाँ वर्ष

बिक्रम सम्वतकाे नयाँ वर्षकाे अवसरमा प्रशान्त महासागरमाथि गरिएकाे आतीसबाजी /तस्बिरः विवेक श्रेष्ठ

A+ A A-

अष्ट्रेलियाको सिड्नी शहरमा बसोबास गरिरहेका नेपालीहरुले पनि नयाँवर्ष धुमधामका साथ मनाएका छन् ।

उनीहरुले शनिबार राती १०ः२० बजेतिर अष्ट्रेलियाको सिड्नीमा रहेको ओपेरा हाउस र हार्बर ब्रिजको बिचमा आतीसबाजी गरेर नयाँवर्षको स्वागत गरेका थिए । करिब दश मिनेट प्रसान्त महासागरमाथि आतीसबाजी भएपछी त्यो दृश्य हेर्ने बिदेशीहरूबीच खैलाबैला नै मच्चियो ।

विषेश गरेर अंग्रेजी नयाँ वर्ष र यहाँ कुनै बिशेष दिनमा मात्र आतीसबाजी हुँदै आएको सिड्नीमा बिक्रम सम्वतको नयाँ वर्षमा समेत आतीसबाजी गरिएको थियो । आतीसबाजीपछि विदेशीहरुले नेपाली नयाँ वर्षका बारेमा जानकारी लिएका थिए । सिड्नीमा बसोबास गर्दै आएका नेपालीहरुले विदेशीहरुलाई समेत नेपाली नयाँ वर्षको बारेमा जानकारी दिन त्यसरी आतीसबाजी गरिएको बताएका छन् ।

कार्यक्रमका शिर्षक प्रायोजक एस पिपुल एजुकेशन एण्ड भिसा सर्भिसेसका रोशन भट्टराईका अनुसार अष्ट्रेलियन नागरिकहरुले आतीसबाजीपछि नेपाली नयाँ वर्षको बारेमा विभिन्न जिज्ञासा गरेका थिए । शनिबार राती ‘हो र होइन होला इभेन्ट्स’को आयोजनामा पप–अप इन्टरटेनमेन्ट र डिजे सुसिलको सहयोगमा सांगीतिक कार्यक्रम समेत आयोजना गरिएको थियो । त्यस कार्यक्रममा करिब ९ सय भन्दा बढी नेपालीहरुको सहभागी रहेको आयोजकले जनाएको छ ।

नयाँ वर्ष मनाउँदै नेपालीहरू/तस्बिरः विवेक श्रेष्ठ

यसअघिका वर्षहरुमा पनि विभिन्न कार्यक्रम आयोजना गरेर नयाँ वर्ष मनाउदै आएका नेपालीहरुले यसवर्ष भने त्याहाँका बासिन्दाको ध्यान आकर्षण गर्न प्रशान्त महासागर माथि नै आतीसबाजी गरेको बताएका छन् । त्यस्तै नयाँ वर्षको अवसरमा आइतबार दिनभर सिड्नीमा विभिन्न कार्यक्रमहरूको आयोजना गरेर नयाँ वर्ष मनाईएको छ । एस पिपुल ऐजुकेसनका ओमकृष्ण श्रेष्ठले नेपालीहरुले हर्षोल्लासका साथ नयाँवर्ष मनाएको जानकारी दिए ।