जसपाको आचारसंहिता : सामाजिक सञ्जालमा जथाभावी लेखे कारबाही

A+ A A-

जनता समाजवादी पार्टी, नेपालले पार्टीका आन्तरिक असहमतिहरूलाई सामाजिक सञ्जालमा लेख्न प्रतिबन्ध लगाएको छ ।

राष्ट्रिय जनता पार्टी नेपाल र समाजवादी पार्टी एकीकरण भई गठन भएको जसपा नेपालको पहिलो बैठकमा नै आचारसंहिता तोकेर सामाजिक सञ्जालमा असन्तुष्टि पोख्न प्रतिबन्ध लगाएको हो ।

‘पार्टीले गरेको निर्णयहरूका सम्बन्धमा आफूलाई चित्त नबुझेको खण्डमा आफू संगठित रहेको समितिभित्र मात्र आफ्नो फरक धारणा लिखित वा मौखिक रूपमा राख्न सक्नेछ,’ आचारसंहितामा भनिएको छ, ‘यसलाई फेसबुक, ट्विटर, पत्रपत्रिका, टेलिभिजन, अनलाइन, एफएमलगायत कुनै पनि सञ्चारमाध्यमद्वारा सार्वजनिक वा प्रचारप्रसार गर्नु हुन्न ।’

आचारसंहिताअनुसार बहुमतद्वारा गरिएको पार्टी निर्णय र निर्देशनलाई कार्यान्वयन गर्नुपर्छ ।

त्यसो त विदेश भ्रमण वा विदेशी संघसंस्थाको निम्तोमा जानुअघि पार्टीलाई पूर्वजानकारी गराउनुपर्ने तथा अनुमति लिनुपर्ने पनि जसपा नेपालले जनाएको छ ।

‘कुनै पनि अन्तर्राष्ट्रिय संगठन, संघसंस्था र कूटनीतिक नियोगले मुलुकभित्र वा बाहिर आयोजना गरेको कार्यक्रममा प्रतिनिधित्व गर्न वा सहभागी हुनुपर्ने भएमा पार्टीको केन्द्रीय कार्यालयलाई सो कार्यक्रमका बारेमा विस्तृत जानकारी गराई सहभागी हुनुभन्दा अगावै पार्टीको अनुमति वा पूर्वस्वीकृति लिनुपर्छ ।’

पार्टीको तल्लो समितिले माथिल्लो समितिसमक्ष समन्वय गर्नुपर्ने, अल्पमतले बहुमतको निर्णय मान्नुपर्ने, तल्लो कमिटीले माथिल्लो कमिटीको निर्णय मान्नुपर्ने, समस्त सदस्य केन्द्रीय समितिअन्तर्गत रहनपर्ने आचारसंहितामा उल्लेख छ ।

विभिन्न समितिका पदाधिकारी एवम् सदस्यहरू आफू संगठित रहेको संगठन/समितिका बैठकमा उपस्थित भई सहभागी हुनुपर्ने उल्लेख छ । आचारसंहितामा भनिएको छ, ‘तर, आफू संगठित रहेको समितिबाहेक अन्य स्तरको संगठन/समितिको बैठकमा सम्बन्धित संगठन/समितिका लागि तोकिएको इन्चार्ज/सहइन्चार्ज वा माथिल्लो समितिले खास प्रयोजनका लागि तोकी खटाएका व्यक्तिबाहेक सहभागी हुन पाउने छैनन् ।’

जसपाको नयाँ आचारसंहिताले प्रक्रियागत विषय र धारणा राख्नुपर्नेमा जोड गर्दै तल्लो कमिटीका सदस्यले माथिल्लो कमिटीमा सोझै कुरा राख्न प्रतिबन्ध लगाएको छ ।

‘पार्टी समितिका सदस्य साथीहरूले एक अर्को समितिका साथीहरूसँग सोझै वा राजनीतिक वा संगठनात्मक रूपले सम्पर्क गर्नु हुँदैन,’ अगाडि भनिएको छ, ‘आवश्यक परेमा प्रत्येक स्तरको कार्यालय वा आफू संगठित रहेको समितिमार्फत राख्नुपर्छ ।’

संघीय परिषद, केन्द्रीय समिति, केन्द्रीय राजनीतिक समिति, केन्द्रीय कार्यकारी समिति, प्रदेश समिति, स्थानीय तहलगायत पार्टी नेतृत्वमा रहने सम्पूर्ण सदस्यहरूले पार्टीको घोषणापत्र, विधान, नियमावली, पार्टीका सर्वोच्च निकायले गरेका निर्णयहरू र निर्देशनलाई अनिवार्य रूपमा मान्नुपर्ने आचारसंहितामा उल्लेख गरिएको छ ।

पार्टी सदस्यहरूले पार्टीका सैद्धान्तिक र वैचारिक अवधारणा, पार्टीको आन्तरिक एकता, पार्टीप्रतिको आफ्नो दायित्व, कर्तव्य र जिम्मेवारी, पार्टी विधान र नियमावली, पार्टी नीति र कार्यक्रम, पार्टीका निर्णय र निर्देशन आदिको प्रतिकुल नहुने गरी काम गनुपर्ने व्यवस्था गरिएको छ ।

‘आचारण र व्यवहार सम्बन्धी आचारसंहिता सबैले कडाइका साथ पालना गर्नुपर्छ,’ अगाडि भनिएको छ, ‘आचारसंहिताको पालना नगरेका वा उल्लङ्घन गरेमा वा गराइएमा पार्टी विधानअनुसार कारबाहीको भागी हुनुपर्नेछ ।’

प्रकाशित मिति: सोमबार, साउन २६, २०७७ १७:३५