पूजा शर्मालाई चित्त बुझेन प्रकाश सुवेदीको ‘माफी’

A+ A A-

सञ्चारकर्मी प्रकाश सुवेदीले माफी माग्दा उनले प्रयाेग गरेका शब्दमा समेत ‘दम्भ र घमण्ड’ झल्किएको भन्दै नायिका पूजा शर्माले न्यायका लागि अझै लड्ने प्रतिक्रिया दिएकी छन् ।

एपीवान टेलिभिजनबाट प्रसारण हुने कार्यक्रम ‘रजतपट अङ्कल’मा सुवेदीले पूजाको नाम उच्चारण नगरी ‘अन्तर्वार्तामा उत्तर दिन नसक्ने दाह्रा निस्किएको अनुहारलाई महानायिका बनाइदिनुपर्ने’ भनेका थिए ।

‘अन्तर्वार्ता दिने पनि आफैँ, उत्तर दिन नजान्ने पनि आफैँ । अनि हामीले लिएको अन्तर्वार्ता काँटछाँट गरिदिनुपर्ने, मिलाइदिनुपर्ने, महानायिका बनाइदिनुपर्ने, त्यो पनि दाह्रा निस्किएको अनुहारलाई । कति हाँस्नु !’ उनले भनेका थिए ।

एक अन्तर्वार्ताका क्रममा नेपालमा कतिवटा जिल्ला छन् भन्ने प्रश्नमा पूजाले १४ वटा भनेपछि उनीमाथि थुप्रैले प्रश्न उठाएका थिए ।

सुवेदीले सोही अन्तर्वार्तालाई लक्षित गरी पूजालाई ब्यंग्य गरेकाे धेरैकाे अनुमान छ । यो अभिव्यक्तिलाई लिएर चौतर्फी आलोचना भएपछि आइतबार साँझ सुवेदीले कार्यक्रममार्फत नै माफी मागेका थिए । माफी माग्ने क्रममा उनले ‘दाह्रे’ शब्द प्रयोग गर्नु नै आफ्नो गल्ती भएको बताएका थिए ।

तर, पूजाले भने सुवेदीले ‘रियालाइज’ गर्नुपर्ने विषय छाडेर एउटा शब्दमा केन्द्रित रहेर माफी मागेको बताएकी छन् । राष्ट्रिय टेलिभिजन च्यानलमा बोलेको गम्भीर विषयमा पनि हलुका टिप्पणीसहित मागिएको माफीले आफूहरूलाई आश्चर्यचकित तुल्याएको उनको भनाइ छ ।

‘त्यस्तो गम्भीर विषयमा उहाँले दाह्रे शब्द चिप्लिएर प्रयोग गरिएकोमा माफी पाऊँ भन्नु भो’, पूजाले फेसबुकमा लेखेकी छन्, ‘जबकि दाह्रे महानायिका शब्द चिप्लिएको होइन । दो दिनकी चाँदनी फिर अन्धेरी रात, तिमीहरूको के हैसियत छ ? भोलि हात जोडेर अन्तर्वार्ता दिन आउनुपर्ने दिन आउँछ । यो आशय स्पष्ट झल्किने त्यति लामो शब्दावली कसरी चिप्लिएको हुन सक्छ ?’

पूजाले सुवेदीविरूद्ध चलचित्र कलाकार संघ र एपीवान टीभीमा आइतबार उजुरी दर्ता गराएकी छन् । सुवेदीले आफ्नो मानहानि गरेको उनको आरोप छ। माफी चित्त नबुझेसम्म न्यायका लागि लड्ने उनले बताएकी छन् ।

प्रकाशित मिति: सोमबार, साउन २६, २०७७ १५:५०