कर्णालीका मुख्यमन्त्रीले मन्त्रीसँग कार्यसम्पादन सम्झौता गर्ने

A+ A A-

कर्णाली प्रदेश सरकारका मन्त्रीहरूसँग मुख्यमन्त्री महेन्द्रबहादुर शाहीले कार्यसम्पादन तथा मूल्याङ्कन सम्झौता गर्ने भएका छन् ।

कर्णाली प्रदेश सरकारको आर्थिक वर्ष २०७६/७७ को वार्षिक प्रगति समीक्षा गोष्ठीले मुख्यमन्त्री महेन्द्रबहादुर शाहीले करार कार्य सम्झौता तथा मूल्याङ्कन करार सम्झौता गर्ने निर्णय गरेको हो ।

चालू आर्थिक वर्षको बजेट कार्यान्वयनलाई प्रभावकारी बनाउन मुख्यमन्त्री शाहीले अन्य मन्त्रीसँग, मन्त्रीहरूले मन्त्रालयका सचिवसँग र सचिवले कार्यालय प्रमुखहरू कार्यसम्पादन करार सम्झौता गर्ने निर्णय गरेको कर्णाली प्रदेश मुख्यमन्त्री तथा मन्त्रिपरिषद् कार्यालयले जनाएको छ ।

कर्णाली प्रदेशमा बजेटको कार्यान्वयन पक्षको कार्यप्रगतिको साप्ताहिक रूपमा रिपोर्टिङ गर्ने र अनुगमनलाई कडाइँ गर्ने व्यवस्था मिलाइने मुख्यमन्त्री शाहीले बताए ।

बजेट कार्यान्वयनमा आत्मसमीक्षाको जरुरी भएको बताउँदै नागरिकस्तरबाट सरकारका पदाधिकारीहरूको योग्यता र नियतको प्रश्न उठिरहेको तर्फ गम्भीर बन्न मन्त्रीहरूलाई मुख्यमन्त्री शाहीले निर्देशन दिए ।

‘भौगोलिक विकटता, कर्मचारी अभाव र कोभिड–१९ ले निम्त्याएका समस्याबीच प्रदेश सरकारले हासिल गरेको उपलब्धि कमजोर बनाउन हुँदैन,’ उनले भने, ‘३ वर्षे कार्यकालको अनुभवका आधारमा सरकारको अबको कार्यसम्पादन प्रभावकारी बनाउन हामी लागौँ ।’

योजना निर्माणमा त्रुटि रहेको बताउँदै मन्त्री र सचिवहरूको टेबुलमा चक्कर लगाउनेहरूलाई योजना दिने परम्परा हटाउनुपर्ने मुख्यमन्त्री शाहीले बताए ।

‘फिल्डमा रहेको आवश्यकताका आधारमा योजना बनाउनुपर्छ,’ उनले भने, ‘आवश्यकताका आधारमा सम्बन्धित विकास कार्यक्रमको गुरुयोजना बनाउनुपर्छ ।’