चलचित्र क्षेत्रमा गुटबन्दी: कसको टिममा कोको ?

A+ A A-

बलिउड अभिनेता सुशान्तसिंह राजपुतले आत्महत्या गरे । सुशान्तको आत्महत्यापछि बलिउडमा ठूलो बहस सुरु भयो । 'नेपोटिजम', 'ग्रुपिजम'लगायत विषयमा चर्को बहस भयो ।

यस विषयबाट अछुतो रहेन नेपाली चलचित्र क्षेत्र पनि । नेपालमा पनि 'नेपोटिजम' तथा 'ग्रुपिजम'को बहस चल्यो ।

कतिपयले नेपाली चलचित्र क्षेत्रमा नेपोटिजम भएको तर्क गरे । कतिपयले भने नेपोटिजम नभएको धारणा राखे । एउटा विषयमा भने धेरैको कुरा मिल्यो- 'नेपाली चलचित्र क्षेत्रमा ग्रुपिजम भने छ ।' कसैले त नेप्टेइजम र चेप्टेइजम भएको समेत लेख्न भ्याए ।

नेपाली चलचित्र क्षेत्रमा ककसको गुटबन्दी छ त ? यो धेरैको प्रश्न हुन सक्छ ।

अभिनेता तथा निर्माता दीपकराज गिरीको एउटा ग्रुप छ, जुन ग्रुपले निर्माण गरेको चलचित्रले हरेक वर्ष बक्स अफिसमा धमाका पिटिरहेको हुन्छ । दीपकको टिममा छन्- दीपाश्री निरौला, केदार घिमिरे, जितु नेपाल ।

दीपकले चलचित्रको स्क्रिप्ट तयार गर्छन्, दीपाश्री निरौला निर्देशन गर्छिन्, केदार र जितुले संवाद लेख्छन् । उनीहरू आफैँ अभिनय पनि गर्छन् ।

यस टिमले निर्माण गरेको चलचित्र 'छ एकान छ'देखि 'छक्का पञ्जा' हुँदै 'छ माया छपक्कै'सम्म सुपर हिट भएका छन् । यस टिमलाई अहिलेको सबैभन्दा बलियो टिम मानिन्छ ।

यता 'मह जोडी'को अर्को टिम छ । यस टिममा मदनकृष्ण श्रेष्ठ, हरिवंश आचार्य, किरण केसीलगायत छन् । उनीहरूले पनि निरन्तर चलचित्र निर्माण गर्दै आइरहेका छन् । उनीहरूको टिमलाई पनि अर्को बलियो टिमको रूपमा हेरिएको छ ।

'जात्रा' चलचित्र निर्देशक प्रदीप भट्टराई र निर्माता तथा कलाकार रवीन्द्रसिंह बानियाँको अर्को ग्रुप छ । उनीहरूको सहकार्यमा निर्माण भएको 'जात्रा' र 'जात्रै जात्रा' हिट भएका छन् । उनीहरू अहिले नयाँ चलचित्र निर्माणको तयारीमा छन् ।

निर्देशक रामबाबु गुरुङको पनि आफ्नै टिम छ । 'नेप्टेइजम र चेप्टेइजम' निर्देशक गुरुङप्रति नै लक्षित थियो । किनभने रामबाबुले आफ्ना हरेक चलचित्रमा मङ्गोलियन कलाकारलाई बढुवा दिने गरेको धेरैको आरोप लगाइरहेका हुन्छन् ।

गुरुङको टिममा नछुट्ने कलाकारहरू दयाहाङ राई, बुद्धि तामाङलगायत हुन् । 'कबड्डी' जस्तो सफल सिरिजका निर्देशक रामबाबुको ग्रुप पनि बलियो ग्रुप छ ।

अर्को टिम छ निर्देशक सुदर्शन थापा र अभिनेत्री पूजा शर्माको । सुदर्शनले आफ्नो हरेक चलचित्रमा पूजालाई हिरोइन राख्छन् । उनीहरूको सहकार्यमा बनेका चलचित्रहरू पनि सफल नै भएका छन् ।

उनीहरूले 'अझै पनि', 'चङ्खे-शङ्खे-पङ्खे', 'प्रेम गीत', 'म यस्तो गीत गाउँछु', 'रामकहानी', 'म यस्तो गीत गाउँछु २', 'सम्हालिन्छ कहिले मन'लागयत चलचित्रमा सहकार्य गरेका छन् ।

पछिल्लो समय पूजा भने सुदर्शन क्याम्पबाट बाहिर निस्किएर पनि चलचित्रमा काम गरिरहेकी छन् ।

चलचित्र 'प्रेम गीत'पछि निर्माता सन्तोष सेन र अभिनेता प्रदीप खड्काको पनि टिमअप गज्जब बनेको छ । सन्तोषले गर्ने 'प्रेम गीत' सिरिजमा प्रदीप छुट्दैनन् ।

अब सन्तोषले निर्माण गर्न लागेका २ चलचित्रका लागि पनि प्रदीप पक्का भइसकेका छन् । 'प्रेम गीत' सरिजमा यो टिम पनि बलियो छ ।

त्यस्तै, निर्देशक दीपेन्द्र के खानल र निर्माता शर्मिला पाण्डेको अर्को ग्रुप छ । यही ग्रुपले निर्माण गरेको चलचित्र 'आमा' निकै सफल भएको थियो । निर्देशक खनालसँगै अभिनेत्री सुरक्षा पन्तको नाम पनि जोडिएर आउने गर्छ ।

निर्देशक दिनेश राउतले पनि आफ्नो चलचित्रमा प्राय: अभिनेत्री नम्रता श्रेष्ठलाई लिने गर्छन् । 'नोभेम्बर रेन', 'क्लासिक', 'प्रसाद'लगायत सफल चलचित्रमा यो टिमअप बनेको छ । उनीहरूसँगै नम्रतालाई पनि दिनेशको ग्रुप मान्ने गरिन्छ ।

यस्तै, निर्देशक मिलन चाम्सको पनि आफ्नै ग्रुप छ । मिलनको ग्रुपमा अभिनेता दयाहाङ राई छँदै थिए । अहिले अभिनेत्री वर्षा सिवाकोटी पनि मिलनको क्याम्पमा थपिएकी छन् ।

यता, निर्देशक विशाल भण्डारीको पनि आफ्नै टिम छ । 'कोहलपुर एक्सप्रेस'बाट जोडिएका केकी अधिकारी, रीमा विश्वकर्मा, ऋचा शर्मालगायत विशालको टिममा छन् ।

नेपालको नम्बर १ कमेडी रियालिटी शो 'कमेडी च्याम्पियन' पनि यसै टिमबाट तयार भएको रियालिटी शो हो । विशालको टिमले नयाँ चलचित्रको पनि तयारी गरिरहेको छ ।

प्रकाशित मिति: आइतबार, साउन २५, २०७७ २३:१२