जसपाको पहिलो बैठक नै अनिर्णित, कार्यविभाजन नगरी सकियो

A+ A A-

जनता समाजवादी पार्टी नेपालको पहिलो बैठक मूल एजेन्डा पदाधिकारीको जिम्मेवारी तथा कार्यविभाजन नै प्रवेश नगरी सम्पन्न भएको छ ।

२१ साउनदेखि २४ साउनसम्म बसेको बैठकको मूल एजेन्डा केन्द्रीय कार्यकारिणी समितिमा रहेका ५१ जनाको कार्यविभाजन गर्ने भनिए पनि सो विषयमा प्रवेश नै नगरी बैठक टुंगिएको हो ।

‘कार्यविभाजन गर्ने बैठकको एजेन्डा भए पनि यो पटक गृहकार्य नपुगेकाले हुन सकेन,’ नेता लक्ष्मणलाल कर्णले शिलापत्रसँग भने, ‘अब थप गृहकार्य गरेर बैठकमा आउनू भनिएको छ, यो बैठक कार्यविभाजन नगरी सकिएको छ ।’

उनका अनुसार सम्भवतः अर्को बैठकमा ५१ जना नै केन्द्रीय कार्यकारिणी सदस्यको जिम्मेवारी बाँडफाँट हुनेछ ।

तत्कालीन राष्ट्रिय जनता पार्टी नेपाल (राजपा नेपाल) र समाजवादी पार्टीबीच गत २५ जेठमा औपचारिक रूपमा पार्टी एकता भएपछि यही २१ साउनदेखि पहिलो पटक केन्द्रीय कार्यकारिणी समितिको बैठक बसेको थियो ।

दुवै पार्टीका नेताहरूलाई पदाधिकारीको जिम्मेवारी दिने भन्दै बैठक बोलाए पनि राजपा नेपालको तर्फवाट नाम उपलब्ध हुन नसक्दा कार्यविभाजन हुन नसकेको एक नेताले बताए ।

‘समाजवादी पार्टीबाट आएका २५ जना पदाधिकारीमा कुनै समस्या भएन्, उनीहरू जे–जे जिम्मेवारीमा समाजवादीमा थिए, त्यहीत्यही जिम्मेवारीसहितकाे प्रस्ताव आएको थियो,’ एक नेताले भने, ‘तर, राजपा नेपालको भागमा परेको २६ जनालाई कुन कुन पदाधिकारीको जिम्मेवारी दिने हो ? त्यो नाम उपलब्ध गराउन सकेन, जसका कारण पदाधिकारी चयन हुन सकेन ।’

राजपा नेपालकाे तर्फबाट बुझाउनुपर्ने पदाधिकारी ‘लिस्ट’ उपलब्ध नभएपछि पदाधिकारी चयन गर्ने जिम्मा यसअघि दुई अध्यक्षलाई दिए पनि सम्पन्न बैठकले ३ जना थप गरेर ५ जनालाई दिएको छ ।

सो बैठकले अध्यक्षद्वय महन्थ ठाकुर, उपेन्द्र यादव, राजेन्द्र महतो, बाबुराम भट्टराई र अशोक राईलाई सचिवालय कमिटीको जिम्मेवारी दिँदैै ५१ सदस्सीय पदाधिकारी चयन गर्ने जिम्मेवारी दिएको अर्का नेताले बताए ।

‘दुई अध्यक्षले पदाधिकारी जिम्मेवारीको प्रस्ताव ल्याउन नसकेपछि ५ जना शीर्ष नेताको सचिवालय बनाउँदै सो जिम्मेवारी दिइएको छ, अब सायद ५ जनाले त्यसको निर्क्याेल गर्नेछन्,’ जसपा नेपालको ५१ सदस्यीय कार्यकारिणी समितिमा राजपाका २६ र समाजवादीका २५ जनाले प्रतिनिधित्व गर्दै आएका छन् ।

मूल समस्या राजपामा

जसपा नेपालको पहिलो बैठकबाट पदाधिकारी चयन हुन नसक्नुमा मूल समस्या तत्कालीन राजपा नेपालमा रहेको देखिएको छ ।

तत्कालीन राजपा नेपालका झन्डै १ सय ४० पदाधिकारी रहे पनि जसपामा पुग्दा भने २६ मा सीमित हुनुपरेको छ, जसका कारण राजपा नेपालमा पदाधिकारी चयनमा समस्या देखिएको कर्ण पनि स्वीकार गर्छन् ।

‘राजपामा झन्डै १ सय ४० पदाधिकारी थिए, पार्टी एकीकरणपछि जसपामा राजपाका २६ जना मात्रै अटाए, तिनलाई पदाधिकारीको जिम्मेवारी दिन हम्मेहम्मे परेको हो,’ कर्णले अगाडि भने, ‘अब सायद नेताहरूले पदाधिकारी मिलाउलान् ।’

पार्टी एकीकरण हुँदा पनि समाजवादीमा पूर्वप्रधानमन्त्रीसमेत रहेका डा.भट्टराईको मात्रै समस्या थियो ।

संघीय परिषद अध्यक्ष बनाएर निर्वाचन आयोगमा जाँदा मुख्यतः उनको मर्यादाक्रममा ठाकुरले आपत्ति जनाएपछि चौथो स्थानमा झरेर पार्टी एकता गरिएको थियो, जसलाई जसपाभित्र ‘टिपेक्स काण्ड’ का रूपमा चर्चा पाएको थियो ।

तर, राजपाको २६ जना पदाधिकारी चयन गर्दा ठाकुर र महतोले एकलौटी गरेको भन्दै तत्कालीन राजपाका ६ मध्ये ४ अध्यक्षले आपत्ति जनाएका थिए भने दुई अध्यक्ष अनिलकुमार झा र राजकिशोर यादवले त एकीकरण प्रस्तावको संयुक्त निर्णय पुस्तिकामा हस्ताक्षरसमेत गरेका थिएनन् ।

तत्कालीन राजपा अध्यक्ष मण्डलका सदस्य शरदसिंह भण्डारी र महेन्द्र रायले आपत्ति जनाएपछि मानध्वज ब्लोन र अर्जुन उप्रेतीको नाम काटेर क्रमशः भण्डारीनिकट निर्जला राउत र महेन्द्र यादवनिकट रमेश यादवको नाम समावेश गरिएको थियो ।

तर, अनिल झा र यादवले संयुक्त निर्णय पुस्तिकामा हस्ताक्षर नगरेपछि असार १७ मा महन्थनिकटका डा. विजय सिंह र रामकुमार ओझालाई हटाएर दुई व्यक्ति अनिलकाे तर्फबाट सुनील रञ्जन झा र राजकिशोर यादवको तर्फबाट गजाधर यादवको नाम समावेश गरिएको थियो ।

सुरुदेखि नै आन्तरिक कलहमा पर्दै आएका तत्कालीन राजपा नेपालका तर्फबाट नाम उपलब्ध नगराउँदा जसपा पदाधिकारीविहीन हुन पुगेको हो ।

भण्डारी बैठकमा नै गएनन्, झा जान छाडे

जसपाको पहिलो केन्द्रीय कार्यकारिणी समितिको बैठकमा मुख्यतः ठाकुरसँग असन्तुष्ट शरदसिंह भण्डारी बैठकमा नै गएनन् भने झा पनि २ दिन गएर त्यसपछि बैठकमा जान छाडेका थिए ।

‘शरदजी बिरामी भएँ भनेर बैठकमा नै आउनु भएन भने झाजीले श्रीमतीको उपचारमा लाग्नुपर्ने भएको भन्दै पछिल्ला २ दिनमा उपस्थित हुनु भएन,’ एक नेताले भने ।

भण्डारी ‘थाइराइड इन्फेक्सन’ भएको भन्दै बैठकमा सहभागी भएनन् भने झा श्रीमती डिम्पल झालाई क्यान्सर भएकाले उपचारमा व्यस्त भएको भन्दै बैठकमा अनुपस्थित भएका थिए । अर्का सदस्य युवराज कार्की पनि बिरामी भएको भन्दै बैठकमा गएनन् ।

प्रकाशित मिति: आइतबार, साउन २५, २०७७ १८:००