बझाङमा भेटिए पहिलो पटक स्क्रब टाइफसका बिरामी

फाइल तस्वीर

A+ A A-

बझाङमा पहिलो पटक स्क्रब टाइफसका विरामी देखापरेका छन् । विरामी थलारा, खप्तडछान्ना र गाउँपालिकाका रहेको जिल्ला अस्पताल बझाङले जनाएको छ ।

उडुस प्रजातिका किराबाट सर्ने स्क्रब टाइफस रोग लागेमा धेरै ज्वरो, आउने रिँगटा लाग्ने, बान्ता हुने, खाना खान मन नलाग्ने, शरिर थकित हुने, शरिरमा रातो विमिरा तथा घाउ देखापर्ने लगायतका लक्षण देखापर्ने जिल्ला अस्पताल बझाङका डाक्टर मिलन खड्काले बताए ।

३ दिनको अवधिमा लगातार ३ जना स्क्रब टाइफसका बिरामी देखा परेको उनले बताए । डाक्टर खड्काका अनुसार यो रोग ‘रिकेटसीया’ भनिने एक सुक्ष्म ब्याक्टेरियाले गर्दा मानिसमा लाग्छ । संक्रमित भुसुना, किर्ना, मुसा, छुचुन्द्रो लगायतका जीवहरू यो ब्याक्टेरियाको भण्डार हुन् ।

ती जीवबाट ससाना ‘माइट’ भनिने किर्नाले मान्छेमा रोग सार्ने काम गर्छ । झार, चौर, घाँसपात, पुरानो काठमा बस्ने यो किर्नाले सो व्याक्टेरिया मुसाहरूबाट मान्छेमा सारेपछि स्वस्थ मानिस यो रोगबाट संक्रमित हुने डाक्टर पुन बताउँछन् । हाम्रो मुलुकमा स्क्रब टाइफस बढी मात्रामा बालबालिकामा पाइए पनि यो संक्रमण सबै उमेर समूहमा देखिन्छ ।

स्क्रब टाइफसबाट बच्नका लागि व्यक्तिगत सरसफाइ, खानपानमा विशेष होसीयारी, किर्ना र मुसाको प्रत्यक्ष तथा अप्रत्यक्ष संक्रमणबाट जोगिनु पर्छ । संक्रमणको सुरुमै उपयुक्त एन्टिबायोटिकले उपचार गर्दा रोग निको हुने डाक्टर खड्का बताउँछन् ।

यस्तै जिल्ला अस्पतालमा सर्पदंशका बिरामी पनि प्रत्येक दिन आउने गरेको डाक्टर खड्काले बताए । उनका अनुसार बझाङमा हरियो रङको सर्पले डसेका बिरामी बढी अस्पतालमा आउने गरेका छन् ।

उनका अनुसार १ हप्तामा कम्तिमा ५ जना सर्पले डसेका बिरामी आउने गरेको र उनीहरू उपचारपछि घर फर्कने गरेका छन् ।

हरियो अर्थात् घाँसे सर्पले डसेका बिरामीको तत्कालै मृत्यु भने नहुने तर रगतमा खराबी आउने हुँदा बिरामी असह्य पीडा हुने गर्दछ ।

प्रकाशित मिति: आइतबार, साउन २५, २०७७ १६:३४