गाउँपालिका अध्यक्षसहित ४ जनाविरुद्ध अदालतमा मुद्दा दायर

A+ A A-

मकवानपुरको पूर्वी क्षेत्रस्थित बकैया गाउँपालिकाका अध्यक्ष दामोदर खनालसहित ४ जनाविरुद्ध जिल्ला अदालतमा मुद्दा दायर भएको छ ।

डिभिजन वन कार्यालय मकवानपुरले वातावरणीय प्रभाव मूल्यांकन नगरी राष्ट्रिय वन क्षेत्रमा सडक निर्माण गरेर प्राकृतिक सम्पदामा क्षति पुर्‍याएको भन्दै बिहीबार अदालतमा मुद्दा दायर गरेको हो ।

कार्यालयले अध्यक्ष खनालसहित गाउँपालिकाका प्रशासकीय अधिकृत लक्ष्मण पुडासैनी, सडक निर्माण उपभोक्ता समिति अध्यक्ष सिर्जना थिङ र जय बकैया कन्स्ट्रक्शनका सञ्चालक इन्द्रबहादुर मोक्तानलाई प्रतिवादी बनाएर मुद्दा हालेको हो ।

डिभिजन वनले वातावरण संरक्षण ऐन २०७६ तर्फ १० लाख र वन ऐन २०७६ को अतिक्रमण सम्बन्धी कसुरमा १ लाखसहित अध्यक्ष र प्रशासकीय अधिकृतविरुद्ध जनही ११/११ लाख रुपैयाँ जरिमाना र ५ वर्ष कैद सजाय माग गर्दै मुद्दा दायर गरेको डिभिजन वन अधिकृत इमनाथ पौडेलले जानकारी दिए । अध्यक्ष र अधिकृतले प्राकृतिक सम्पदाको क्षति पुर्‍याउने मुख्य भूमिका खुलेको दावी गरेको छ ।

उपभोक्ता समिति अध्यक्ष थिङ र कन्स्ट्रक्शनका सञ्चालकलाई भने पाँचवर्ष कैद सजायको मात्रै माग गरिएको छ ।

‘उपभोक्ता समिति र कन्स्ट्रक्शनलाई निर्देशन अनुसार काममा लगाइएको हो । मुख्य भूमिका अध्यक्ष र अधिकृतकै हो । त्यसैले थिङ र मोक्तानलाई पाँचवर्ष कैद सजाय मात्रै गरिएको हो ।’, पौडेलले शिलापत्रसँग भने ।

बकैया गाउँपालिका-७ स्थित चुनढुंगादेखि दरबारसम्म चुनदेवी सामुदायिक वन उपभोक्ता समूहको क्षेत्रमा वातावरणीय प्रभाव मुल्यांकन नगरी सडक निर्माण गरेको भन्दै वनले ९ साउनमा काम रोकेको थियो भने एक्साभेटर नियन्त्रणमा लिएको थियो । सडक ७ साउनदेखि निर्माण सुरु गरिएको डिभिजन वन अधिृकत पौडेलले बताए ।

जिल्ला अदालत मकवानपुरका न्यायाधीश सीता शर्मा अधिकारीको एकल इजलाशले थुनछेक आदेशमा गाउँपालिका अध्यक्षसहित चार जनालाई नै धरौटी माग गरेको थियो ।

गाउँपालिका अध्यक्ष खनाललाई १ लाख, प्रशासकीय अधिकृत पुडासैनीलाई ५० हजार तथा मोक्तान र थिङलाई जनही ३०/३० हजार रुपैयाँ धरौटी लिएर बिहीबार नै तारिखमा छोडिएको अदालतका श्रेस्तेदार तीर्थराज भट्टराईले जानकारी दिएका छन् ।

प्रकाशित मिति: शनिबार, साउन २४, २०७७ १९:३७