यस कारण रोकियो सम्पादकसँग प्रचण्डको भेटघाट

A+ A A-

शुक्रबार बिहान ७ बजेतिर नेपाल कम्युनिस्ट पार्टी (नेकपा)का कार्यकारी अध्यक्ष पुष्पकमल दाहाल (प्रचण्ड)का प्रेस संयोजक विष्णु सापकोटाले सम्पादकहरूलाई फोन गरे ।

नेकपाभित्रको शक्तिसंघर्षलाई लिएर अध्यक्ष प्रचण्डसहित संस्थापनइतरका नेताहरूले सामूहिक भेटघाट गर्न खोजेको भन्दै उपस्थित भइदिन आग्रहसहित उनले फोन गरेका थिए ।

यो पनि पढ्नुहोस्

ओली समूहको आक्रोशपछि प्रचण्डले डाकेको सम्पादक भेला स्थगित

बोलाइएका केही सम्पादकहरूका अनुसार पार्टी प्रवक्ता नारायणकाजी श्रेष्ठ, विदेश विभाग उपप्रमुख विष्णु रिजालले समेत सम्पादकहरूलाई फोन गरेर दिउँसो २ बजे नागपोखरीस्थित मेरियट होटलमा नेताहरूले भेट्न खोजेको खबर गरिएको थियो ।

भेला सुरु हुनु केही घण्टाअघि अचानक प्रचण्डका प्रेस संयोजक सापकोटाले एउटा म्यासेज गरे । म्यासेजमा भनिएको थियो, ‘सर, नमस्कार, आज २ः०० बजे हुने भेटघाट स्थगित भएको छ, ५/६ दिनपछि खबर गर्छु– विष्णु सापकोटा ।’

लगत्तै प्रचण्ड–नेपाल समूहले गर्न खोजेको सम्पादकसँगको भेटघाट रोकिन पुगेको छ ।

पार्टीको विवाद हल गर्न अध्यक्षद्वय केपी शर्मा ओली र पुष्पकमल दाहाल (प्रचण्ड)बीच वार्ता चलिरहेको थियो । गत २० साउनमा साँझ वरिष्ठ नेता झलनाथ खनाल र संसदीय दलका उपनेता सुवास नेम्वाङबीच वार्ता भएको थियो, सो वार्तापछि २१ साउन साँझ ५ बजे बस्ने गरी छुट्टिए ।

तर, २१ साउनकाे बिहान प्रचण्डले ओलीलाई खबर गरे, ‘आज नबसौँ, मेरो समूहमा केही कुरा गर्नुपर्ने भयो, त्यहाँ कुरा मिलाएर छलफलमा आउँछु ।’

प्रचण्डले आफ्नाे समूहका चार नेता खनाल, वरिष्ठ नेता माधवकुमार नेपाल र प्रवक्ता नारायणकाजी श्रेष्ठसहित अर्थात् ‘ग्रुप–४’ सँग सल्लाह गरेपछि छलफलमा आउने भनेर खबर गरे ।

त्यही दिन प्रधानमन्त्री ओलीले बिहान कोभिड–१९ का बारेमा स्वास्थ्यविज्ञ, प्रमुख प्रतिपक्ष दलसहितको बैठक बालुवाटारमा बोलाए, त्यहाँ प्रचण्डलाई पनि बोलाइएको थियो । तर, प्रचण्ड सो बैठकमा गएनन् ।

सोही समयमा प्रचण्ड उपाध्यक्ष वामदेव गौतमलाई भेट्न भैँसेपाटीस्थित निवास गए । नेकपा विवाद बढ्दै जाँदा ओली कित्तामा लागेका गौतमलाई मनाउने प्रयास भने सफल हुन सकेन ।

जवाफमा गौतमले प्रचण्डलाई भने, ‘मेरो कुरा प्रस्ट छ, म कुनै गुटमा रहने छैन, मेरो ६ बुँदे प्रस्तावमा म अडिग छु ।’ प्रचण्ड–नेपाल समूह ओलीलाई हटाउनुपर्ने भन्दै संघर्ष गरिरहेको बेला प्रचण्ड–नेपाल समूहमा रहेका गौतमले अचानक 'ओलीले ५ वर्ष नै सरकार चलाउने र एकता महाधिवेशनसम्म अध्यक्षबाट हटाउन नहुने' भन्दै ६ बुँदे प्रस्ताव सार्वजनिक गरेपछि नेकपामा तरङ्ग आएको थियो ।

प्रधानमन्त्री ओलीले १३ साउनमा एकलौटी रूपमा स्थायी कमिटी बैठक स्थगित गरेपछि प्रचण्ड–नेपाल समूहले भेला गरी पार्टी विवाद मिलाउने जिम्मा प्रचण्डलाई दियो । उक्त भेलाका अनुसार ३–३ पटक ओली–प्रचण्डबीचमा वार्तासमेत भयो, दुईवटा वार्तामा खनाल र नेम्वाङसमेत राखिए ।

तर, साउन २१ साँझ बस्ने भनिएको वार्ता स्थगित भएपछि प्रचण्डले सोही दिन थापागाउँस्थित प्रेसिडेन्टल कलेजमा पत्रकारहरूलाई बोलाएर नेकपा विवादका बारेमा ब्रिफिङ गरे । त्यहाँ प्रचण्ड, खनाल, नेपाल र श्रेष्ठले आ–आफ्नो धारणा राखे ।

‘नेकपाभित्रको विवाद पदीय भागवण्डाका लागि होइन’ भन्ने प्रस्टीकरण दिन भेला बोलाइएको नेताहरूले बताएका थिए ।

‘अन अफिसियल’ भेटघाट भने पनि त्यहाँ भएका कुराकानी बाहिर आएपछि ओली–प्रचण्डबीचको वार्ताका साक्षी रहेका नेम्वाङ बिहीबार प्रचण्डलाई भेट्न खुमलटार पुगे ।

‘आफ्नो समूहमा कुराकानी गरेर छलफलमा आउँछु भनेर बुधबार साँझको बैठक स्थगित गरिएको थियो तर समूहमा छलफल गरेर माहौललाई सकारात्मक बनाउनेभन्दा तपाईं त पत्रकारलाई बोलाएर झन् माहौल बिगार्न लाग्नुभयो,’ प्रचण्डलाई नेम्वाङले भनेका थिए ।

भेलाले ओली–प्रचण्डबीचको सौहार्दपूर्ण छलफललाई तिक्ततापूर्ण मात्रै बनाएन, नेकपानिकट प्रेस संगठनभित्र पनि विवादको विषय बन्यो ।

पदको झगडाका लागि होइन भन्ने उद्देश्यले बोलाइएको उक्त पत्रकार भेला ग्रुप–४ लाई झन् ‘डिफेन्सिभ’ बनाएपछि थप प्रस्ट पार्न शुक्रबार नेपालका प्रमुख सम्पादकहरूसँग छलफल गर्ने भन्दै निम्तो गरिएको थियो, जसको मुख्य सक्रियता प्रवक्ता श्रेष्ठले लिएका थिए ।

प्रचण्डका प्रेस संयोजक सापकोटाले बिहानै खबर गरेपछि सम्पादकहरू तयार भए । जब यो सूचना बाहिरियो, ओली पक्षधरका नेताहरूले प्रचण्डलाई सम्पर्क गरे । यसरी सम्पर्क गर्नेमा ओलीनिकट नेता सुवासचन्द्र नेम्वाङलगायत थिए ।

सो भेटघाट आयोजना गर्न लागेको थाहा पाएपछि श्रेष्ठलाई ओली समूहका शीर्ष नेताहरुलेसमेत फोन गरेर आपत्ति जनाउन खोजेका थिए । तर उनको मोवाईल केही समय ‘अफ’ हुन पुगेको थियो । उता निम्तो गरिएका केही सम्पादकहरुले पनि आफुहरु उक्त भेटघाटमा नआउने जवाफ मात्रै दिएनन, भेटघाट गर्नु पनि उचित नभएको भन्दै सल्लाह दिएका थिए ।

‘नेकपा भित्रको विवादमा हामीलाई नमुछ्नुस, म चाँही आउँदिन भनिदिए,’ एक सम्पादकले भने, ‘त्यसमाथि कोरोनाको महामारी भएको बेला शीर्ष नेता नै भेला बोलाउँदा जाने सन्देशले झन अप्ठयारो पार्छ, हामीलाई समेत प्रश्न उठाउँछन, त्यसैले यो भेटघाट अहिलेका लागि स्थगित गर्नुहोस् ।’

सो निर्णयपछि फोन गरेर बोलाउने सापकोटाले एसएमएस गरेर २ बजेका लागि बोलाइएको भेला स्थगित भएको जानकारी गराएका थिए ।

सम्पादकहरूसँगको भेटघाट स्थगित भएपछि प्रधानमन्त्रीका मुख्य सल्लाहकार विष्णु रिमालले प्रवक्ता श्रेष्ठप्रति सार्वजनिक रूपमा नै आलोचना गरेका छन् । ‘इनफ इज इनफ नारायणकाजीजी, कमसेकम पार्टी प्रवक्ता पदको लाज त जोगाउनुहोस, ‘विधि’ र ‘पद्धति’को नक्कली गीत गाउँदै नेताहरूलाई गुटबन्दीको आगोमा पोल्न उत्तोलक नबन्नुहोस्, पार्टीएकताविरूद्धका कुनै पनि गतिविधि कतैबाट पनि नहोस्, मुलुक संवेदनशील मोडमा छ, महसुस होस्,’ रिमालले ट्विट गर्दै आक्रोशसमेत पोखे ।

प्रवक्ता श्रेष्ठका अनुसार भेटघाट कसैको दबाबमा नभई कोभिड–१९ का कारण स्थगित गरिएको हो । ‘प्रचण्डजीका सुरक्षाकर्मीमा कोभिड–१९ देखिएपछि सम्भावित खतरालाई मध्यनजर गर्दै सम्पादकहरूसँगको भेटघाट स्थगित गरिएको हो, अरू कुनै कारणले होइन,’ श्रेष्ठले शिलापत्रसँग भने । कोभिड–१९ नियन्त्रण भएपछि बैठक पुनः बस्ने उनले जानकारी दिएका छन् ।

प्रकाशित मिति: शुक्रबार, साउन २३, २०७७ २०:४२