पुष्पा अधिकारीलाई खुला पत्र

A+ A A-

पुष्पा बहिनी नमस्कार¸

मलाई थाहा छैन, तपाईंंको र मेरो उमेरमा को जेठो छ तर बहिनीबाट नै सम्बाेधन गर्न चाहेँ । मेरो पेसा व्यवसायभन्दा अघि म यो देशको आमनागरिक हुँ । त्यस्तो नागरिक जो केही कुरा बुझ्दछु¸ जान्दछु र कानुनको पालना पनि गर्दछु । त्यसैले तपाईंंलाई एक आमनागरिकको खुल्लापत्र हो यो ।

मलाई थाहा छैन, यी शब्द तपाईंंसामु पुग्छ कि पुग्दैन । किनकि तपाईं र म यही काठमाडौंको बासिन्दा भए पनि हाम्रो चिनजान छैन । तपाईं समाज सेवा गर्नुहुन्छ । त्यसै प्रकारले म पनि यो देशको सेवा गर्छु । यस अर्थमा तपाईं र म यो देशको सेवक हौँ । यसअघि तपाईंको संस्था र तपाईंको नाम कहीँ कतै सुनेको थिइनँ । तर, जुन ढंगले सुनेँ, त्यो सुखद थिएन ।

सुखद यस अर्थले थिएन कि जुन कुरा बाहिर आयो, त्यसमा के गल्ती हो वा के सत्य हो, कानुनले हेर्नेछ र कानुनको कठघरामा तपाईं उभिनुहुनेछ । यो गर्नु नै पर्छ । तर, जुन ढंगले तपाईं ज-जसको क्यामेराको कठघरामा उभिन बाध्य हुनुभयो, त्यो दृश्य देख्दाचाहिँ असाध्यै पीडा महसुस हुन्छ, पुष्पा बहिनी ।

तपाईंले जुन कार्य गर्नुभयो, त्यो गलत थियो वा थिएन र त्यसअनुसार कस्ता कानुन आकर्षित हुन्छन्, ती त कानुनका विषय भए तर तपाईंलाई जुन ढंगले युट्युबका नाममा जति पनि क्यामेराअगाडि केरकार र र्‍याखर्‍याख्ती पार्ने कार्य भयो, योचाहिँ विल्कुल अमानवीय कार्यको पराकाष्ठा नै हो ।

तपाईंको सोझो र निर्दोष अनुहार त्यसबेला देखिन्छ, जुनबेला ठूलै स्कूप मारेजसरी तपाईंको अगाडि ती क्यामेरा तेर्सिएका थिए । उनीहरू यस्तो सोच्दै छन् कि कुनै ठूलै देशद्रोही र अपराधी फेला पारियो । अनि ती वुम र क्यामेराको सहायताबाट नै न्याय, अन्याय छुट्याउन सकिन्छ वा न्याय, अन्याय हेर्ने यो मुलुकमा उनीहरू नै हुन् । जो विभिन्न नाम र ब्राण्डमा एक नारीको पत्तासाफ गराउन उद्यत् छन् र ठूलै युद्ध जितेको जस्तै गरी हुङ्कार दिन्छन् ।

तपाईं ती प्रत्येक प्रश्नको जवाफ शिकारीको अगाडि एक निरीह हरिणजसरी उपस्थित भएर दिँदै हुनुहुन्छ, मानौँ यो तपाईंलाई आदेश छ, अक्षरस: पालना गर्नुपर्छ । तर त्यसो होइन बहिनी¸ जसले जस्ता प्रश्न सोधे र हुर्मत लिने कार्य गरे, यी सबै कार्य दर्शक भेला पारेर व्यक्तिगत फाइदामा रमाउने निर्लज्ज हर्कत मात्र हुन् ।

किनकि गल्ती हो होइन त कानुनले पाे छुट्याउँछ¸ अनुसन्धान गर्ने जिम्मेवार निकायहरू छन् तर ती सबै निकायभन्दा अघि वुम र क्यामरा तेर्स्याउँदै एउटी नारीमाथि गरिएको यो हदसम्मको ज्यादतीले पछिल्लो समय तपाईं असाध्यै गल्नुभएको र थकित हुनुभएको भन्नेसम्मको कुरामा म जानकार छु ।

तर अब एक पटक खुल्ला आकाशतर्फ हेरेर स्वतन्त्र भएर सोच्नुस् त, तपाईंलाई यो अवस्थामा के आधिकारिक कानुनका धारा र खण्डले पुर्‍याएको हो र ? होइन बहिनी कदापि होइन । हो त केवल रातारात सेलिब्रेटी बन्न चाहने र भ्यूअर बढाउने अनि समाज सेवा गर्‍यौँ भन्‍ने प्रचारबाजीको शिकार हुनुभएको हो तपाईं । र अर्को कुरा, ती क्यामेराको अगाडि शिकारीको जालमा परेको निरीह हरिणजसरी तपाईं किन उपस्थित हुनुभएको ? त्यहींबाट नै तपाईंको सोझो र निर्दोष अनुहार देखिन्छ ।

म कानुनी निकायमा उपस्थित हुन्छु, यी क्यामेराको अगाडि होइन भनेर तपाईंले किन नभनेको बहिनी ? यी सबै कुरा हेर्दै गर्दा तपाईंले आफ्ना इच्छा र खुसी त्यागेर वर्षौंदेखि असहाय अवोध बच्चाहरूको ममतामयी आमा बनेको याद र ती विगत हेर्ने¸ सुन्ने फुर्सद यहाँ कसलाई छ र बहिनी ? त्यसैले त बिकाउ शीर्षक राखेर दर्शक बटुल्नु छ र पपुलर हुनु छ सबैलाई ।

अवोध बच्चाको स्याहार सुसारमा २४ सै घण्टा खटिनु तपाईंको दैनिकी हो भन्‍ने कुरा बुझ्न गाह्रो छैन बहिनी । अनि एउटा बच्चा त हेर्न गाह्रो भएर शिशु स्याहार केन्द्रमा राखिन्छ भने ती दर्जनभन्दा बढी बच्चाको स्याहारसुसारको खटाइ म महसुस गर्न सक्छु । अनि एक नारीको त्यो त्याग¸ समर्पण¸ सेवाभाव, ममता सबैलाई मुट्ठीभरका क्यामेराले तहसनहस पार्न खोजिएको निर्लज्ज हर्कत पत्रकारिताको कुनै पनि आचारसंहिताभित्र पर्दैन बहिनी ।

प्रश्न सोध्ने शैली, बसाइको तरिका आदि सबैसबै नै खेदजनक छन् । पत्रकारिता र आम-संचारको परिभाषा¸ कार्य अनि संहिताभित्रका कुनै बुँदाले ती हर्कतलाई छुँदैन । त्यसको नमीठो शिकार तपाईं हुनुभएको छ र तपाईंको अवस्था अहिले सहज छैन । तर बहिनी तपाईंको सेवा र त्यागका लागि अरु थुप्रै निर्दोष कलिला अनुहारहरूले पर्खिइरहेका छन् ।

तपाईंको माया र ममता अनि आत्मीय स्याहारका लागि कोही समय कुर्दै छन्, त्यसैले आफूलाई सम्हाल्नुस् र त्यो घेराबाट माथि उठेर हेर्नुस् । गल्ती मानिसबाटै हुने हो, अनि जो काम गर्दछ, उसले नै गल्ती गर्ने हो, जुन जानी नजानी अर्थात् अन्जानमा पनि हुन सक्छ ।

ती साना गल्तीबाट पाठ सिक्दै आगामी दिनमा आफूलाई थप व्यावसायिक र निपूण बनाउनुपर्छ । कामै नगरी बस्नेले त के गल्ती गर्छ¸ त्यसर्थ स्वस्थ रहनुस्¸ खुसी रहनुस्, तपाईंको माया र ममताको खोजीमा निर्दोष अनुहारहरू पर्खिरहेछन् । त्यसमा तपाईंले हार मान्‍ने¸ चिन्ता लिने र यो समाजले के भन्‍छ भन्‍ने अनि निष्कृय हुने छुट तपाईंलाई छैन बहिनी । बुझ्नेले आफैँ बुझ्छ¸ नबुझ्नेलाई बुझाउने प्रयास गर्नु समयको बर्बादी मात्र हो ।

समयकाे बर्बादी गरेर बुझाउनेतर्फ लाग्नुभन्दा आफ्नो कर्म गर्ने हो । तपाईंको त्यो कर्ममा ईश्वरीय शक्ति छ । तपाईं पुन: पहिलेजस्तै स्वस्थ र खुसी भएर आफ्नो असल कर्ममा लाग्नुहुनेछ भन्‍ने कामना गर्दछु । सोच्नुस्, तपाईंको असल र ममतामयी कार्यका हजारौँ प्रशंसकहरू छन् ।

तसर्थ निराश नहुनुस् बहिनी । निराश हुनुपर्ने जरुरी पनि छैन । तपाईंको गल्ती हो, होइन त कानुनले छुट्‍याउँछ, रातारात भाइरल हुनेहरूले होइन ।

यो घटनाक्रम हेर्दा वैदेशिक रोजगारीमा गएको बेला गर्भवती भएर स्वदेश आएकी एक पीडित नारीको उद्धार गर्ने र त्यो बच्चाको पालनपोषण गर्ने तपाईंको सोझो मनशाय देखिन्छ ।

त्यसमा केही कमीकमजोरी भएको स्वयम् तपाईंले स्वीकार्नुभएको छ । मेरो नजरमा तपाईंको मनशाय गलत हुँदै होइन । तर, यहाँ केहीलाई भाइरल हुनु छ र त्यसको शिकार हुनुभएको छ तपाईं । आगामी दिनमा तपाईंको सत्कार्य र सत्धर्मले थप उचाइ र सफलता प्राप्त गरोस्, शुभकामना ।

प्रकाशित मिति: शुक्रबार, साउन २३, २०७७ २१:५६