लुकीछिपी सीमा वारपार गर्नेका कारण संक्रमणको जोखिम

A+ A A-

भारतसँग सीमा जोडिएका दक्षिणपूर्वी मोरङका विभिन्न सीमा नाकाहरूबाट लुकिछिपी नेपाल–भारत ओहोरदोहोर गर्नेहरूबाट कोरोना भाइरसको संक्रमण फैलिने आशंकाका कारण स्थानीयबासी त्रसित बनेका छन् ।

लुकिछिपी ओहोदोहोर गर्दा सीमावर्ती पालिकाहरूमा संक्रमणको दर बढेको छ । केहीदिनअघि मात्र लुकिछिपी नियमित नेपाल–भारत आवत जावत गर्ने सुनवर्षी नगरपालिकाका–४५ वर्षीय पुरूषको कोरोना संक्रमणका कारण मृत्यु भएको छ ।

यस्तै, उनकी श्रीमती र तीन छोरालाई समेत कोरोना पुष्टि भएको सुनवर्षी नगरपालिकाका मेयर कालीप्रसाद दासले बताए ।

अवैध रूपमा चोरी निकासी पैठारी गर्ने र सुरक्षाकर्मीहरूको समेत आँखा छलेर नेपाल–भारत दुवैतर्फ आफन्त तथा नातेदारमा आवतजावत गर्नेहरूबाट संक्रमण फैलिन थालेको भन्दै स्थानीय त्रसित बनेका हुन् ।

मोरङका धनपालथान गाउँपालिका, रंगेली, सुनवर्षी र रतुवामाई नगरपालिकाका विभिन्न सीमा नाकाहरूअन्तर्गत चोरबाटोबाट सुरक्षाकर्मीहरूसँगको मिलेमतोमा अवैध चोरी निकासी पैठारीसमेत हुने गरेको स्थानीयले आरोप लगाएका छन् ।

त्यस्तै, भारतमा आफन्त रहेका नेपाली र नेपालमा आफन्त रहेका भारतीय नागरिकहरू स्थानीय र सुरक्षाकर्मीहरूको आँखा छलेर वारिपारि गर्ने गरेका कारण जोखिम बढेको मोरङको सुनवर्षी नगरपालिका–८ का स्थानीय मोहम्मद यासिनले बताए ।

‘सुरक्षाकर्मी र हाम्रो आँखा छलेर आउजाउ गर्नेहरूबाट संक्रमण फैलिने त्रास छ,’ उनले भने, ‘केही दिनअघि मात्र लुकीछिपी वारिपारि गर्ने १ जनाको मृत्यु नै भयो । उनको परिवारमा समेत कोरोना पुष्टि भयो । त्यसरी आउनेबाट समुदायमा कोरोना सर्ने हामीलाई एकदमै त्रास छ ।’

स्थानीय ब्रम्हदेव साहले सीमानाकाहरू सिल गरे पनि तस्करहरूले सामान वारिवारि गर्दै आएको बताए ।

‘सुरक्षाकर्मीसँग साँठगाँठ नगरी अहिले सामान वारिपारि गर्न असम्भवजस्तै छ । कोरोनाको मौका छोपेर पैसा कमाउन तस्करहरूले बिहान सबेरै र रातको समयमा सामान ओसारपसार गरिरहेका छन्,’ उनले भने, ‘यसका कारण गाउँगाउँसम्म कोरोना फैलिने त्रास बढेर गएको छ । सरकारले अवैध रूपमा सीमा वारपार हुने क्रम तत्काल नरोके भयावह अवस्था आउन सक्ने देखिएको छ ।’

सुनवर्षी–८, सिक्टीका वडाध्यक्ष नुरूल मियाँले खेती किसानी गर्नेहरूले मलखाद ल्याउने गरेको स्वीकार गरे ।

‘नेपालमा यतिबेला मलको अभाव छ । किसानले एक/दुई बोरा मल ल्याउने गरेको सत्य हो । तर, अन्य सामानको तस्करी भएको छैन,’ उनले भने, ‘ज्यानै जोखिममा राखेर जसले तस्करी र गलत गतिविधि गर्छन्, उनीहरूलाई कोरोनाले छाड्दैन । एक दिन आफैँ फेला पर्छन् । अब कसैले डकैती नै गर्छ भने के गर्ने ?’

यता सशस्त्र प्रहरी बलको बीओपी चुनीमारीका इन्चार्ज झपिन्द्र बाँनियाले बन्दाबन्दी खोलिएको केही दिन आउजाउ र मलखादलगायतका सामान ओसारपसार भए पनि अहिले सबै कडाइका साथ बन्द गरिएको बताए ।

‘लकडाउन खुलेपछि मलखादलगायतका सामानहरू आउने गरेका थिए । तर, यतिबेला समुदायस्तरमै कोरोना संक्रमण फैलिइसकेपछि स्थानीयतहहरूले लकडाउन गरेका छन् । अहिले सबैतिर कडा पारिएको छ,’ उनले भने, ‘लुकीछिपी नेपाल प्रवेश रोक्न हाम्रो नियमित गस्ती परिचालन गरिएको छ भने स्थानीयले पनि हामीलाई सहयोग गर्दै आउनुभएको छ ।’

प्रकाशित मिति: शुक्रबार, साउन २३, २०७७ १८:४०