बन्दीपुरका कृषकलाई भुइँकटहर बजारसम्म पुर्‍याउन समस्या

A+ A A-

नवलपरासी (बर्दघाट–सुस्तापूर्व)को देवचुली–५ बन्दीपुरमा उत्पादन भएको भुइँकटहरलाई बजारसम्म पुर्याउन समस्या भएको छ ।

विगतका वर्षमा भन्दा यस वर्ष त्यहाँ भुइँकटरको उत्पादन बढी भए पनि बिक्री वितरणका लागि समस्या भएको छ ।

विगतका वर्षमा बन्दीपुरमा उत्पादित भुइँकटहर स्थानीय बजार दलदले, केउरेनी, कावासोती तथा नारायणगढसम्म पुर्‍याउनगरिएको भए पनि यस वर्ष भने पहिरोले बाटो भत्काउँदा उत्पादनलाई बजारसम्म लैजान अप्ठ्यारो भएको वडासदस्य पदम गाहाले गुनासो गरे ।

साउन पहिलो साता भएको निरन्तरको वर्षाले गाउँबाट बजारसम्म जाने बाटो अवरुद्ध भएर जनजीवनमा व्यापक समस्या देखिएको उनले बताए ।

प्रतिगोटा ४० र ५० रुपैयाँमा गाउँबाटै बिक्री हुने भुइँकटहरलाई बजारसम्म ल्याउन बाटो अवरुद्ध भएपछि कतिपयले डोकोमा बोकेर कदमपुरसम्म ल्याउने गरेका छन् ।

कदमपुरबाट अटोरिक्साको सहायताले बजार क्षेत्रमा भुइँकटहर पुर्याउँदा खर्चिलो हुने र आम्दानी पनि कम हुने बन्दीपुरका खेम अछामीले बताए ।

गाउँमा प्रतिगोटा ४०/५० रुपैयाँमा बिक्री हुने भुइँकटर स्थानीय बजारमा भने १ सय रुपैयाँ सम्म बिक्री हुने गरेको छ ।

देवचुली नगरपालिकाको केउरानी हुँदै बन्दीपुर पुग्ने सडक पहिरोका कारण विभिन्न ठाउँमा अवरुद्ध भएको देवचुली–५ का वडाध्यक्ष शिव सापकोटाले बताए ।

सडकमा गएको पहिरो हटाएर बन्दीपुरमा उत्पादित भुइँकटहरलाई बजारसम्म पु¥याउन पहल भइरहेको सापकोटाको भनाइ छ ।

सुगम जिल्ला भनेर चिनिने नवलपरासी (बर्दघाट–सुस्तापूर्व)को पहाडी गाउँ बन्दीपुरका बासिन्दालाई हरेक वर्षाको समयमा बाटोको कारणले समस्या उत्पन्न हुने गरेको छ ।

वर्षाका कारण सडक अवरुद्ध हुँदा कृषिजन्य सामग्री ढुवानीमा समस्या हुनुका साथै स्थानीय उत्पादनलाई बजारसम्म पुर्याउन कठिन हुने गरेको वडाध्यक्ष सापकोटाले बताए ।

बन्दीपुरमा गाउँभरि नै व्यावसायिकरूपमा भुइँकटहर खेती हुने गरेको छ । देवचुलीको बन्दीपुर भुइँकटहरको पकेट क्षेत्रसमेत हो । रासस

प्रकाशित मिति: शुक्रबार, साउन २३, २०७७ १८:३४