मलेसियाबाट आफ्नै खर्चमा स्वदेश फर्कन नसक्नेलाई निवेदन दिन दूतावासको आग्रह

मलेसियाबाट आफ्नै खर्चमा स्वदेश फर्कन नसक्नेलाई निवेदन दिन दूतावासको आग्रह

A+ A A-

कोरोना भाइरसका कारण स्वदेश फर्किने खर्चको अभावमा मलेसियामा अलपत्र अवस्थामा रहेकाहरूलाई सरकारी खर्चमा उद्धारका लागि निवेदन दिन मलेसियास्थित नेपाली दूतावासले सूचनामार्फत जानकारी गराएको छ । रोजगारी गुमाएका र नेपाल फर्किन हवाई टिकटसमेत काट्न नसक्ने अवस्थामा बसेका कामदारहरूलाई टिकट उपलब्ध गराउन दूतावासले सूचना जारी गरेको छ ।

श्रम, रोजगार तथा सामाजिक सुरक्षा मन्त्रालयले वैदेशिक रोजगारीका क्रममा अलपत्र नेपाली कामदारको उद्धार गरी स्वदेश फिर्ता गर्ने सम्बन्धी निर्देशिका २०७७ पारित गरेसँगै स्वदेश फर्काउनु पर्ने अवस्थाका नेपालीहरूको सूची तयार पार्ने जिम्मेवारी रोजगार गन्तव्य मुलुकस्थित नेपाली दूतावासहरूलाई दिएको छ ।

आममाफी पाएर स्वदेश फिर्ती केन्द्रमा रहेका कामदारले समेत टिकटका लागि आवेदन दिन पाउनेछन् । सजायबाट आममाफी पाएका, घरफिर्ती केन्द्रमा रहेका र हाल नेपाल जान अनुमति पाएका, जुनसुकै कारणले बहिर्गमन भिसामा रहेका र रोजगारी गुमाएकालाई प्राथमिकतामा राखिएको दूतावासले जनाएको छ ।

श्रम स्वीकृति वा पुनः श्रम स्वीकृति लिएर वैदेशिक रोजगारीमा मलेसिया गएका र ३ वर्ष ननाघेका, मलेसियाको सरकार, रोजगारदाता, रोजगारीमा पठाउने इजाजतपत्रवाला संस्था वा अन्य स्रोतबाट हवाई टिकटबापतको खर्च नपाएको वा आफ्नै खर्चमा नेपाल फर्किन नसक्ने अवस्थाको व्यक्ति भएमा निवेदन दिन दूतावासले आग्रह गरेको छ ।

१ देखि ३ वर्षभित्रको समयमा रोजगारी गुमाएका कामदारको खर्च ७५ प्रतिशत, पुनः श्रम स्वीकृति लिएर गएको भएमा खर्चको ५० प्रतिशत, श्रम स्वीकृतिको अवधिभित्र थुनामा परेर आममाफी पाई स्वदेश फिर्ती केन्द्रमा रहेका कामदारको हकमा शतप्रतिशत, कुनै निकायबाट आंशिक सहयोग पाएकाको हकमा अपुग रकम र विमानस्थलदेखि क्वारेन्टाइन सेन्टरसम्म जान लाग्ने सबै खर्च कोषबाटै व्यहोरिनेछ ।

टिकट उपलब्ध नगराउने रोजगारदाताले आगामी दिनमा थप कामदार माग गरेमा उनीहरूको मागपत्र ५ वर्षसम्म प्रमाणीकरण नगरिने दूतावासले स्पष्ट पारेको छ । कसैले झुटाे विवरण दिएमा पनि प्रचलित कानुनअनुसार कारबाही हुने दूतावासको सूचनामा उल्लेख छ ।

प्रकाशित मिति: बिहीबार, साउन २२, २०७७ २०:४२