डडेल्धुरामा मास्क नलगाउने २४४ जनालाई कारबाही

A+ A A-

जिल्ला सदरमुकाम बागबजार क्षेत्रमा मास्कको प्रयोग नगरी हिँडडुल गर्नेलाई डडेल्धुरा प्रहरीले कारबाही गर्न थालेको छ ।

सरकारले लकडाउन खुकुलो गरेसँगै कोरोनाको जोखिम झन् बढेकोले कोरोना नियन्त्रण गर्न प्रहरीले कारबाही गर्न थालेका हो ।

जिल्ला प्रहरी कार्यालयका प्रहरी नायब उपरीक्षक दधिराम न्यौपानेका अनुसार जिल्ला सदरमुकाम बागबजार क्षेत्रबाट मास्क नलगाई हिँडडुल गर्ने २ सय ४४ जना कारबाहीमा परेका हुन् ।

मास्कविना सदरमुकाम आउने र जथाभावी घुम्ने मानिसलाई कारबाही गरिएको प्रहरीले जनाएको छ ।

उनीहरूलाई पहिलो पटक १ सय रुपैयाँका दरले जरिमाना गरी सम्झाइबुझाई गरी छोडिएको डीएसपी न्यौपानेको भनाइ छ । जसबापत २४ हजार ४ सय रुपैयाँ राजस्व सङ्कलन समेत गरिएको उनले बताए ।

कोरोना भाइरसबाट जोगिन आग्रह गर्दै प्रहरीले सचेतना पनि फैलाइरहेको छ । जिल्ला सदरमुकाम क्षेत्रमा प्रहरीले कोरोना रोग र यसबाट बच्ने उपायको विषयमा जानकारी दिन ‘डिजे’माफर्त सूचनामूलक सन्देश प्रसारण गरिरहेको छ ।

जिल्ला प्रशासन कार्यालय डडेल्धुराले यसअघि सूचना जारी गर्दै सार्वजनिक ठाउँमा हिँडडुल गर्दा अनिवार्य मास्क लगाउन आग्रह गरेको थियो । सूचनामा मास्क नलगाउनेलाई कारबाही गर्ने चेतावनी समेत दिइएको छ ।

सरकारको निर्णय अवज्ञा गर्नेलाई नियन्त्रणमा लिई जरिमाना गरिएको जिल्ला प्रशासन कार्यालय डडेल्धुराले जनाएको छ

लकडाउन खुले पनि कोरोना भाइरसको जोखिम भने कम भएको छैन । सरकारले कोरोना रोकथाम र नियन्त्रणको लागि बाँहिर हिँडडुल गर्ने व्यक्तिले अनिवार्य मास्कको प्रयोग गर्नु पर्ने नियम लगाएको छ । यसरी नियम उल्लघंन गरी मास्कको प्रयोग नगर्नेलाई १ सय रुपैयाँ जरिमाना लिने गरिएको छ ।

प्रकाशित मिति: बिहीबार, साउन २२, २०७७ १५:१३