आफूनिकट पत्रकारसमक्ष प्रचण्डसहित ४ नेताले भने, 'भागबन्डाको विवाद हुँदै होइन'

आफूनिकट पत्रकारसमक्ष प्रचण्डसहित ४ नेताले भने, 'भागबन्डाको विवाद हुँदै होइन'

A+ A A-

नेपाल कम्युनिस्ट पार्टी (नेकपा)का कार्यकारी अध्यक्ष पुष्पकल दाहाल ‘प्रचण्ड’सहितका ४ शीर्ष नेताले पत्रकारहरूसँग छलफल गरेका छन् ।

बानेश्वरको प्रेसिडेन्टल कलेजनजिकै बुधबार दिउँसो १ बजेदेखि प्रचण्डसहित वरिष्ठ नेताद्वय झलनाथ खनाल र माधवकुमार नेपाल, प्रवक्ता नारायणकाजी श्रेष्ठले उनीहरूका निकट मानिएका पत्रकारहरूसँग करिब २ घण्टा छलफल गरेका हुन् ।

भागबन्डा नमिलेकाले नेकपामा विवाद बढेको प्रचार भइरहेको भन्दै उनीहरूले यसलाई विधि र पद्धति स्थापनाका लागि भइरहेको संघर्षका रूपमा बुझिदिन आग्रह पनि गरे ।

झण्डै ३५ मिनेट बोलेका प्रचण्डले भने, ‘नेकपाभित्रको विवादलाई पदको लडाइँका रूपमा प्रचार गरिएको छ । यो बाहिर प्रचार गरिएको कुरा मात्र हो । भित्री कुरा अर्कै छ । अहिलेको विवाद विधि र पद्धतिका पक्ष, विपक्षमा भएकाहरू बीच भइरहेको छ ।’

वरिष्ठ नेता खनालले करिब २५ मिनेट बोलेका थिए । ‘पार्टी र सरकारलाई पार्टीको नीति, निर्देशनअनुसार चलाउनुपर्छ भन्ने कुरालाई भागबन्डाको लडाइँ भन्न हुँदैन । यो भागबन्डाका लागि भएको विवाद हुँदै होइन’, उनले अगाडि भने, राजनीतिक नियुक्ति गर्दा ओलीजीले एकलौटी गरिरहनुभएको छ । पार्टीमा छलफल नै गर्नुहुन्न । पार्टीलाई पूर्ण त इग्नोर गर्दै आउनुभएको छ ।'

२० मिनेटजति बोलेका वरिष्ठ नेता नेपालले विधान सबैका हकमा लागू हुनुपर्ने बताए । ‘पार्टीभित्र कुनै विषयमा असन्तुष्टि हुँदा जसरी हामी लिखित असहमति दर्ज गर्छौं, त्यसरी नै पार्टी अध्यक्ष केपी ओलीजीले पनि गर्नुपर्‍यो । मैले पनि हिजो नोट अफ डिसेन्ट राखेकै हुँ, ओलीजीले पनि राख्न सक्नुहुन्छ । अब बैठक बोलाउनुपर्छ ।’

नेता नेपालले ओली पक्षबाटै पार्टी विवादलाई भागबन्डाको लडाइँका रूपमा प्रचार गरिएको बताएका थिए ।

करिब १५ मिनेट बाेलेका सचिवालय सदस्य श्रेष्ठले अब पार्टीभित्र वैचारिक छलफल सुरू गर्नुपर्छ भन्ने मत आफूहरूको रहेको बताए । 'हाम्रो पार्टीको वैचारिक लाइनको विषयमा पनि बहस आवश्यक छ भन्ने हाम्रो मत हो । यसलाई कसरी भागबन्डाको विवाद भन्न सकिन्छ र ?'

प्रकाशित मिति: बुधबार, साउन २१, २०७७ २३:०७