फाप्लु विमानस्थलमा ‘वाक थ्रु मेटल डिटेक्टर’ यन्त्र जडान

A+ A A-

सदरमुकाम नजिक रहेको फाप्लु विमानस्थलमा ‘वाक थ्रु मेटल डिटेक्टर’ यन्त्र जडान गरिएको छ ।

विमानस्थल सञ्चालमा आएको ४४ वर्षपछि उक्त यन्त्र जडान गर्न सफल भएको नेपाल नागरिक उड्डयन प्राधिकरण फाप्लुका प्रमुख प्रकाश शर्माले जानकारी दिए ।

कार्यालयका अनुसार सोलुखुम्बुलाई हवाई मार्गमा जोड्ने उद्देश्यले निर्माण गरिएको विमानस्थलमा पहिलो पटक विसं २०३२ मा पिलाटस विमानले उडान भरेको थियो भने २०३४ सालदेखि टुइनेटर विमानले उडान भर्न सुरु गरेको थियो ।

नेपाल नागरिक उड्डयन प्राधिकरण प्रधान कार्यालय हवाई सुरक्षा विभागको आर्थिक लगानीमा उक्त यन्त्र जडान गरिएपछि चेकजाँचमा सहज हुने विमानस्थल कार्यालयले जनाएको छ ।

यसअघि प्रहरी कर्मचारीले हातले जाँच गर्नुपर्ने बाध्यता थियो । अब भने कुनै पनि व्यक्तिले संवेदनशील सामग्री बोकेको खण्डमा साइरन आफैँ बज्ने हुँदा सहज हुने कार्यालयको भनाइ छ ।

छैन विशिष्ट कक्ष सञ्चालनमा

फाप्लु विमानस्थलमा विशिष्ट कक्ष भए पनि सञ्चालनमा ल्याउन नसकिएको विमानस्थल प्रमुख शर्माको भनाइ छ ।

भौतिक संरचनाका हिसाबले विमानस्थलमा सुधारको कार्य आवश्यक रहेको बताइएको छ । अपाङ्गमैत्री संरचना नहुँदा बिरामी तथा अपाङ्गता भएका व्यक्तिलाई समेत सेवा लिन समस्या हुने गरेको छ ।

धावनमार्गसम्म जान तथा आउनका लागि निकै कठिन हुने गरेको स्थानीयवासी कान्छा शेर्पाको भनाइ छ । सो विमानस्थलमा नेपाल एयरलाइन्स, तारा र समिट एयरले साप्ताहिक रुपमा उडान भर्दै आएका छन् ।

काठमाडौँ–फाप्लु तथा फाप्लु–लुक्लासमेत उडान हुने गरेको छ । खुम्बुका लागि आवश्यक सामग्री फाप्लुबाट तेञ्जिङ हिलारी विमानस्थल लुक्लामा ढुवानी हुने गरेको छ ।

फाप्लु विमानस्थलसँग सङ्घीय तथा प्रदेश राजधानी जोड्ने सडक पिच भए फाप्लुसम्म ढुवानी भएको सामग्री हवाई सेवामार्फत खुम्बु लैजान सहज हुने व्यवसायीको भनाइ छ । रासस

प्रकाशित मिति: बुधबार, साउन २१, २०७७ १८:३४