पर्सामा संक्रमित बढेपछि बागमती प्रदेश प्रवेश गर्ने मुख्य नाका बन्द

फाइल तस्वीर

A+ A A-

पर्सामा दैनिक कोरोना संक्रमित बढेपछि बागमती प्रदेश प्रवेश गर्ने मुख्य नाका बन्द गरिएको छ ।

मकवानपुरको कमाण्ड पोष्टको बैठकले भारत र तराईबाट प्रदेश प्रवेश गर्ने रातोमाटे नाका बन्द गरेको हो ।

मकवानपुरका प्रमुख जिल्ला अधिकारी दीपकराज नेपालको अध्यक्षतामा आज बुधबार बसेको कमाण्ड पोष्टको बैठकले प्रदेशको राजधानी हेटौँडा प्रवेश गर्ने चुरियामाई नाका बन्द गर्ने निर्णय गरेको हो ।

पर्सालगायतका तराईका जिल्लामा कोरोना संक्रमित बढिरहेको अवस्थामा प्रदेशमा कोरोनाको उच्च जोखिम रहेको भन्दै चुरियामाई नाका बन्द गर्ने निर्णय गरिएको बैठकका प्रतिनिधि उद्योग वाणिज्य संघ मकवानपुरका वरिष्ठ उपाध्यक्ष माधव न्यौपानेले जानकारी दिए ।

उनले अत्यावश्यक सेवाका सवारीसाधनबाहेकका सवारीसाधन प्रदेश प्रवेश गर्न नदिइने बताए । चुरियामाईको डाँडो बागमती प्रदेश र प्रदेश-२ को सीमाना हो । उनका अनुसार चुरियामाई नाकामा प्रहरी परिचालन भइसकेको छ ।

बागमती प्रदेश प्रहरी कार्यालयले प्रहरी परिचालन गरी नाकामा कडाइ गरेको न्यौपानेले जानकारी दिए ।

सरकारले लकडाउन खोलेसँगै चुरियामाई नाकाबाट निर्वाध सवारीसाधन आवतजावत गरिरहेका थिए ।
यसैगरी कमाण्ड पोष्टको बैठकले हेटौँडा-१० स्थित सीता भवन सिल गरिएको छ ।

मंगलबार सीता भवनमा बस्ने ६८ वर्षीया र ७२ वर्षीय दम्पतीलाई कोरोना संक्रमण पुष्टि भएपछि भवन सिल गरिएको न्यौपानेले जानकारी दिए ।

ढुवानी साधनमा पनि चालक र सहचालकबाहेक अन्य यात्रुहरू ओसारपसार गर्न नपाइने निर्णय भएको छ ।

हेटौँडाका सैलुन, ब्युटीपार्लर, हेल्थ क्लब र जुम्बालाई पूर्ण रूपमा बन्द गरिने कमाण्ड पोष्टको बैठकले निर्णय गरेको छ ।

होटलमा रेस्टुरेन्टमा ग्राहक राखेर सञ्चालन गर्न पनि प्रतिबन्ध लगाइएको छ । ‘होटलका रेस्टुरेन्टमा ग्राहक राखेर सञ्चालन गर्न प्रतिबन्ध लगाइएको छ । तर, रेस्टुरेन्टभित्र पकाएर होम डेलिभरी भने गर्न पाइनेछ,’ न्यौपानेले भने ।

मास्क नलगााई हिँड्नेलाई १ सय रुपैयाँ जरिमाना गर्ने निर्याण पनि गरिएको छ ।

अनिवार्य मास्क र स्यानिटाइजर लगाएर मात्रै हिँड्नुपर्ने अभियान नै सञ्चालन गरे पनि हेटौँडावासीले पालना नगरेको भन्दै जरिमाना गर्ने निर्णय गरिएको उद्योग वाणिज्य संघका वरिष्ठ उपाध्यक्ष न्यौपानेले जानकारी दिए ।

मास्क नलगाई हिँड्नेलाई कारबाही गर्न प्रहरी नै परिचालन गरिएको छ ।

प्रकाशित मिति: बुधबार, साउन २१, २०७७ १८:०१