विराटनगर विमानस्थल सञ्चालनको तयारी अन्तिम चरणमा (फोटो फिचर)

A+ A A-

विराटनगर विमानस्थल १ भदौदेखि सञ्चालनमा ल्याउने तयारी अन्तिम चरणमा पुगेको छ । विराटनगर विमानस्थलले मंगलबार पत्रकार सम्मेलन गरी १ भदौदेखि विमानस्थल सञ्चालन गर्न आवश्यक तयारी अन्तिम चरणमा पुगेको जानकारी दिएको हो ।

विमानस्थलका प्रमुख टेकनाथ सिटौलाले १ भदौदेखि विमानस्थल सञ्चालनका लागि आवश्यक तयारी अन्तिम चरणमा पुगेको बताए ।

सिटौलाले मास्क, स्यानिटाइजरको प्रयोग अनिवार्य गर्ने, भौतिक दूरी कायम गर्नेलगायतका मापदण्ड पालना गरेर मात्रै विमानस्थल सञ्चालनमा ल्याइने जानकारी दिए ।

अन्तर्राष्ट्रिय उड्डयन मापदण्डका आधारमा तयार पारिएको मापदण्ड र नेपाल सरकारको मापदण्डअनुसारको स्वास्थ्य सजगता अपनाएर मात्रै विमानस्थल सञ्चालनमा ल्याइने सिटौलाले बताए ।

पहिलो चरणमा विराटनगरबाट दैनिक काठमाडौंका लागि बुद्ध एयरलाइन्सको २, यतीको १, सौर्यको १ र श्री एयरलाइन्सले २ वटा फ्लाइट भर्ने सिटौलाले जानकारी दिए ।

सामान्य अवस्थामा विराटनगरबाट विभिन्न कम्पनीका विमानले दैनिक १४ देखि १८ वटासम्म उडान भर्ने गरेका थिए । कोरोना महामारीका कारण सरकारले लकडाउन गरेपछि गत १२ चैतदेखि विमानस्थल पूर्ण रूपमा बन्द छ ।

विमानस्थलमा हालसम्म ६० हजार लिटर क्षमताको पानी ट्याङ्की, दमकलहरूका लागि भूमिगत पानी ट्याङकी, ३ सय ५० मिटर लम्बाइको फुटपाथ, भीआईपी पार्किङ एरिया, सर्कुलर ब्याण्ड, सेना र प्रहरीका लागि बेग्लाबेग्लै शौचालय, सार्वजनिक सवारीसाधनका लागि पार्किङ क्षेत्र, चेक पोष्ट, ४ सय मिटर लामो ट्याक्सी वे र कन्ट्रोल टावरलगायतका विकास निर्माणलगायतका काम सम्पन्न भइसकेकाे विमानस्थल प्रमुख सिटौलाले जानकारी दिए ।