यसरी फैलियाे प्रहरी प्रधान कार्यालयमा कोरोना संक्रमण

A+ A A-

कोरोना भाइरस (कोभिड- १९)को नियन्त्रणका लागि अग्रपंक्तिमा खटिएका प्रहरीनै धमाधम संक्रमित हुन थालेका छन् । प्रहरी प्रवक्ता प्रहरी वरिष्ठ उपरीक्षक (एसएसपी) कुवेरसिंह कठायतका अनुसार हालसम्म देशभरका २ सय ५४ प्रहरी कर्मचारीमा कोरोना संक्रमण पुष्टि भएको छ ।

त्यसमध्ये ७२ जना प्रहरी प्रधान कार्यालयमै कार्यरत प्रहरी रहेको एसएसपी कठायतले जानकारी दिए । त्यस्तै, उपत्यकामा खटिएका १४ जना प्रहरीमा पनि कोरोना पुष्टि भएको छ ।

शुक्रबार मात्र महानगरीय ट्राफिक प्रहरी कार्यालयमा खटिएका २ जना ट्राफिक प्रहरीमा कोरोना देखिएपछि महाशाखा सिल गरिएको छ । महाशाखाका प्रमुख एसएसपी भीमप्रसाद ढकालसहित ३ सयभन्दा बढी ट्राफिक प्रहरी हाल क्वारेन्टाइनमा राखिएको छ ।

यसरी २ सय ५४ जनामध्ये १ सय ५ जना निको भएर काममा फर्किसकेका छन् ।

यसरी फैलियो प्रहरी प्रधान कार्यालयमा कोरोना

२५ असारमा सिन्धुपाल्चोक भोटेकोसी नगरपालिका- ५ जम्बु गाउँ नै बाढीले बगायो । अविरल वर्षासँगै आएको बाढीले २१ जनाको ज्यान लिएको थियो ।

२ जनाको शवपछि फेला परे पनि अन्यको खोजी कार्य अझै जारी छ । १९ जना अझै बेपत्ता छन् । बेपत्ताको खोजीमा नेपाल प्रहरी, सशस्त्र प्रहरी बल र नेपाली सेनाको टोली खटिएको थियो ।

प्रहरी प्रधान कार्यालयको विपद् व्यवस्थापन महाशाखा सामाखुसीबाट समेत प्रहरीको टोली सिन्धुपाल्चोक पुगेको थियो । उनीहरूले प्रहरी प्रधान कार्यालयबाट ५० जना क्षमताको टटुन गाडी लिएर गएका थिए ।

उक्त टोली ३ दिन सिन्धुपाल्चोक बसेर हराएकाहरूको उद्धारमा खटिएको थियो । त्यही टोलीका ड्राइभरबाट प्रहरी प्रधान कार्यालयमा कोरोना फैलिएको निष्कर्ष प्रहरी प्रधान कार्यालयको छ । उनमा उच्च ज्वरो देखिएपछि काेराेना परीक्षण गरिएकाे र पुष्टि भएकाे हाे । पछि उनकै सम्पर्कमा रहेकालाई परीक्षण गर्दा अरूमा पनि पुष्टि हुँदै गएकाे प्रहरी प्रधान कार्यालयकाे भनाइ छ ।

प्रहरी प्रधान कार्यालयमै कोरोना संक्रमितको संख्या ह्वात्तै बढेपछि अहिले उच्च सतर्कता अपनाइएको छ । सिन्धुपाल्चोक गएको टोली र उनीहरूको सम्पर्कमा रहेका प्रहरीको ट्रेसिङ गरेर थप कोरोना परीक्षण भइरहेको प्रहरी प्रधान कार्यालयको भनाइ छ ।

अहिले संक्रमितको सम्पर्कमा रहेका प्रहरीलाई महारागञ्जस्थित २ नम्बर गणमा क्वारेन्टाइन बनाएर राखिएको छ ।

प्रकाशित मिति: सोमबार, साउन १९, २०७७ २१:३५