मिर्गौलापीडितलाई राहत, म्याग्दीमै निःशुल्क डायलाइसिस सेवा

A+ A A-

हिमाली जिल्ला म्याग्दीको सदरमुकाम बेनीमा अवस्थित बेनी अस्पतालमा आइतबारदेखि निःशुल्क डायलाइसिस सेवा सुरू भएको छ । यसबाट मिर्गौला पीडितले नियमित डायलासिस गर्न जिल्लाबाहिरका सरकारी र निजी अस्पतालमा महँगो रकम तिर्नुपर्ने बाध्यताको अन्त्य भएको छ ।

गण्डकी प्रदेशको सामाजिक विकास मन्त्रालयले अस्पताललाई डायलाइसिसका लागि आवश्यक उपकरणसहित तालीम प्राप्त चिकित्सकको व्यवस्था गरेर सेवा सुरू गरेको हो ।

आइतबार २ मिर्गौलापीडितले सेवा लिएका छन् । गण्डकी प्रदेशले उपलब्ध गराएका ४ वडा उपकरण र प्रवासी म्याग्देलीले दिएका २ वटा मेसिन रहेको अस्पतालमा हेमोडायलाइसिस युनिटको सेवा शुभारम्भ भएको अस्पताल व्यवस्थापन समितिका अध्यक्ष बेलबहादुर कुटवालले जानकारी दिए ।

डायलाइसिस युनिटमा २ चिकित्सक र ४ जना स्टाफ नर्स कार्यरत छन् । युनिटलाई प्रभावकारी बनाउन आवश्यक पूर्वाधार तथा व्यवस्थापनमा प्रदेश सरकारबाट प्राप्त बजेटबाहेक अस्पतालको आन्तरिक स्रोतलाई समेत परिचालन गरिएको छ । पहिलो चरणमा ३ वटा शय्या सञ्चालन गरिएको छ । १ दिनमा ६ जना बिरामीले सेवा लिन सक्नेछन् ।

६ वटा उपकरणबाट २ पटक १२ जना बिरामीलाई दैनिक सेवा दिन सकिने भए पनि तत्काल २ वटा पुरानो मेसिन भएकाले सञ्चालनका लागि केही उपकरणको अभाव रहेको अस्पतालका प्रमुख डा. अमृत अधिकारीले बताए ।

जिल्लामै डायलाइसिस सेवा आउने भएपछि हालसम्म १५ जना सम्पर्कमा छन् । उनका अनुसार परीक्षण सेवाको रूपमा केही दिन सञ्चालन गरिने र औपचारिक उद्घाटन गरी सेवालाई थप प्रभावकारी बनाइनेछ ।

अपाङ्गमैत्री भवन भएकाले उपचारमा सहज हुने बताइएको छ । अस्पतालमा उपचारका लागि आउने विपन्न बिरामीलाई डायलाइसिस सेवाले सहज हुने भएको छ ।

मिर्गौलापीडित बिरामी अधिकांशको न्यून आर्थिक अवस्थाका हुने भएकाले यातायात, खाने बस्ने खर्चको अभावमा गाउँमै रोग पालेर बस्न बाध्य भएको अवस्थामा डायलाइसिस सेवाले सहज भएको मिर्गाैलापीडित पार्वती विकले जानकारी दिइन् । उपचारका लागि बाहिर जान नसक्ने अवस्थाका धेरै बिरामी छन् । रासस

प्रकाशित मिति: सोमबार, साउन १९, २०७७ १३:११