तरलता बढेसँगै कर्जा प्रवाहमा आक्रामक बने बैंकहरू, कुन बैंककाे ब्याजदर सस्तो ?

तरलता बढेसँगै कर्जा प्रवाहमा आक्रामक बने बैंकहरू, कुन बैंककाे ब्याजदर सस्तो ?

A+ A A-

बैंकमा पछिल्लो समय तरलता बढ्दै गएपछि बजारमा लगानी गर्न बैंकहरू प्रतिस्पर्धात्मक रूपमा उत्रिरहेका छन् । यसले गर्दा अहिले अधिकांश बैंकहरूले आधार दर एकल विन्दुमा झारिसकेका छन् । लगानी गर्ने ठाउँ पर्याप्त मात्रामा नहुनु र निक्षेपमा राख्ने ग्राहकको संख्यामा बढाेत्तरी भइरहँदा पनि बैंकहरूमा तरलता बढ्दै गएकाे हाे र तरलता बढ्दै जाँदा कर्जा प्रवाहमा आक्रमक रूपमा बैंकहरू उत्रिएका हुन् । जसले गर्दा ब्याज निरन्तर घटिरहेको छ ।

बैंक तथा वित्तीय संस्थाहरूमा तरलता अत्यधिक भएपछि राष्ट्र बैङ्कले हालै मात्र रिभर्स रिपोमार्फत् २० अर्ब रुपैयाँ राष्ट्र बैङ्कको ढुकुटीमा तानेको छ । बैङ्किङ प्रणालीमा लगानीयोग्य पुँजी (तरलता) अत्यधिक भएपछि राष्ट्र बैङ्कले तरलता प्रशोचन (वित्तीय प्रणालीबाट खिच्ने) रिभर्स रिपो जारी गर्दै आएको छ ।

मुलुकमा कोरोना सङ्क्रमणसँगै लागू गरिएको लकडाउनका कारण बैङ्किङ प्रणालीमा तरलता बढेकाे हाे ।बैङ्किङ प्रणालीमा अहिले १ खर्ब ९१ अर्ब रुपैयाँकाे हाराहारीमा तरलता रहेको राष्ट्र बैङ्कले बताएको छ । कर्जा प्रवाह न्यून हुँदा लगानीयोग्य रकम लगातार बढ्दै गएको छ ।

व्यवसाय कर्जामा सस्तो– ग्लोबल बैंक

ग्लोबल आईएमई बैंकले २४ प्रकारका ऋण १४.४२ प्रतिशत ब्याजमा दिँदै आएको छ । बैंकले साना तथा मझौला व्यवसायमा लगानी गर्न चाहने तथा लगानी गरिरहेका व्यवसायीलाई ८.९९ प्रतिशत ब्याजदरमा साना तथा मझौला व्यवसाय कर्जा पनि उपलब्ध गराउँदै आएको छ । कोभिड– १९ लाई लक्षित गर्दै ल्याइएको सुलभ कर्जामा बैंकले तीन दिन मात्रै प्रोसेसिङ समय तोकेको छ । अर्थात् यो कर्जा भने तीन दिनभित्रै १५ लाखदेखि १ करोड रुपैयाँसम्मकाे कर्जा उपलब्ध बैंकले गराउँदै आएको छ ।

१३.४८ प्रतिशतमा १६ कर्जा– मुक्तिनाथ विकास बैंक

मुक्तिनाथ विकास बैंकले पनि १६ प्रकारका कर्जा १३.४८ प्रतिशतदेखि १७.४८ प्रतिशतसम्मकाे ब्याजदरमा उपलब्ध गराउँदै आएको छ । यहि साउन ११ गतेदेखि लागू भएको बैंकको आधार दर भने ९.९८ प्रतिशत छ । जसमा बैंकले कर्जाको किसिम हेरेर ३ प्रतिशतदेखि ७ प्रतिशतसम्म ब्याजदर थप गरेर लिने गर्दछ । साथै, कोभिडबाट प्रभावित ऋणीलाई लक्षित गर्दै बैंकले साउन मसान्तसम्म कर्जा चुक्ता गर्ने ऋणीको ब्याजमा २ प्रतिशत थप ब्याज छुट दिने जनाएको छ ।

सुपरचामत्कारिक कर्जा मात्र ८.२५ प्रतिशतमा– एनआईसी एशिया बैंक

एनआईसी एशिया बैंकले कर्जा लिने ग्राहकहरूलाई ८.२२ प्रतिशत आधारदरमा ५ प्रतिशत ब्याज थपेर कुल १३.२२ प्रतिशत ब्याजदरमा ३२ प्रकारका कर्जा उपलब्ध गराउँदै आएको छ ।

जसमा अटोलोन, हयारपर्चेज, होमलोनलगायतका कर्जाहरू उपलब्ध छन् । कृषि लोन भने बैंकले आधारदरमा २ प्रतिशत मात्रै ब्याज थप्ने जनाएको छ । यसर्थ कृषिलोन भने बैंकले १०.२२ प्रतिशतमा नै दिँदै आएकाे छ ।

यीबाहेक बैंकले विभिन्न कर्जामा नयाँ स्किमहरू ल्याएको छ, जसले न्यून ब्याजदरमा कर्जा प्रवाह गरिरहेको छ । ८.२५ प्रतिशतमा सुपर चामत्कारिक घर कर्जा, सुपर चामत्कारिक व्यवसाय कर्जा, सुपर चामत्कारिक सवारी कर्जा प्रवाह गर्दै आएको छ । यो एक वर्षका लागि हुने बैंकको जनाएकाे छ ।

९.२३ प्रतिशत ब्याजमै कर्जा– नबिल बैंक

नबिल बैंकले पनि आधार दर ७.२३ प्रतिशतमा कर्जा प्रवाह गर्दै आएको छ । बैंकले ९.७१ प्रतिशतदेखि २.२३ प्रतिशत ब्याजमा कर्जा प्रवाह गरिरहेको छ ।

बैंकले सजिलो कर्जाअन्तर्गत विभिन्न स्किमहरू सार्वजनिक गरेको छ, जसमा नबिल नारी कर्जा, सजिलो कर्जा र एक्सप्रेस कर्जा २.४८ देखि २.६८ प्रतिशत ब्याजदरमा कर्जा प्रवाह गरिरहेको छ, जसमा आधार दर जोडिनेछ ।

ब्याजदरमा व्यवसायमैत्री– सनराइज बैंक

सनराइज बैंकले सरल कर्जाअन्तर्गत १ करोड रुपैयाँसम्मकाे कर्जा लिन चाहने ग्राहकका लागि ९.९५ प्रतिशत ब्याजदर तोकेको छ ।

एसएमईअन्तर्गतकाे सजिलो कर्जामा ऋणीले कर्जा माग गरेको २४ घण्टाभित्रै बैंकले कर्जा उपलब्ध गराउँदै आएको छ । योबाहेक ४० वर्ष समयावधिकाे घरकर्जामा ८.९५ प्रतिशत ब्याजदरमा ऋण दिँदै छ ।

आधार दर ८.९५ मा २४ प्रकारका कर्जा २ प्रतिशतदेखि ५ प्रतिशतसम्म ब्याजदर थप गरी कर्जा प्रवाह गरिरहेको छ ।

७.०५ प्रतिशत ब्याजमा कर्जा– राष्ट्रिय वाणिज्य बैंक

राष्ट्रिय वाणिज्य बैंकले आधार दर ६.०७ प्रतिशतमा १.२५ प्रतिशतदेखि ३.२५ प्रतिशतसम्म प्रिमियम थप गरी ब्याजदर लिन्छ । अर्थात् बैंकले ७.३० देखि ९.३० प्रतिशतसम्मकाे ब्याजदरमा ३१ प्रकारका कर्जा उपलब्ध गराउँदै आएको छ । २८ वाणिज्य बैंकहरूमध्येमा सबैभन्दा कम ब्याजदर कायम गर्ने बैंकहरूमा वाणिज्य बैंक अगाडि छ ।

सुलभ घरकर्जा मात्र ८.२५ प्रतिशतमा– एभरेष्ट बैंक

एभरेष्ट बैंकले ९.७७ ब्याजदरमा एसएमई कर्जा प्रदान गरिरहेको छ । ५ करोडसम्मको कर्जा ७ दिनभित्र दिने गरी साना व्यवसाय कर्जा बैंकले उपलब्ध गर्दै आएको छ । त्यस्तै, सवारी कर्जा ९.५५ प्रतिशतमा समेत उपलब्ध गराउँदै आएको छ । बैंकले आउँदो १५ साउनदेखि १४ कात्तिकसम्म लागू हुने गरी चाडपर्व कर्जामा घरकर्जा ८.२५ प्रतिशत, मोटरसाइकल कर्जा १०.५५ प्रतिशत तथा व्यक्तिगत कर्जा ९.५५ प्रतिशत ब्याजदरमा उपलब्ध गराउँदै आएको छ ।

१४.३८ प्रतिशत ब्याजदरमा २३ कर्जा– सेञ्चुरी कर्मसियल बैंक

सेञ्चुरी कर्मसियल बैंकले बेसरेट ९.३८ प्रतिशत र स्प्रेडरेट ३.३८ प्रतिशत कायम गरेर कर्जामा न्यूनतम १२.२८ प्रतिशतदेखि अधिकतम १४.३८ प्रतिशतसम्म ब्याजदरमा कर्जा प्रदान गरिरहेको छ ।

बैंकले २३ प्रकारका कर्जा प्रदान गरिरहेको छ । जसमध्ये ओभरड्राफ्टमा १२.३८ प्रतिशत, एसएमई कर्जा १२.३८ देखि १२.८८ प्रतिशतसम्म र अन्य कर्जा १४.३८ प्रतिशतसम्म ब्याजदर छ ।

१०.२५ प्रतिशत ब्याजमा २३ कर्जा– एसबीआई बैंक

एसबीआई बैंकले अधारदर ९.२५ र प्रिमियम १.२५ प्रतिशतदेखि ५ प्रतिशतसम्म लिएर कर्जा प्रवाह गरिरहेको छ । २३ प्रकारका कर्जा प्रदान गर्दै आएको बैंकले साना मझौला व्यवसाय कर्जा १४.२५ प्रतिशतमा प्रवाह गर्दै आएको छ । त्यस्तै घर कर्जा, शिक्षा कर्जा, सवारी कर्जालगायतका कर्जा पनि १४.२५ प्रतिशतले नै दिँदै आएको छ ।

१५.०८ प्रतिशत ब्याजदरमा १६ कर्जा– कुमारी बैंक

कुमारी बैंकको भने अन्य बैंकहरूको तुलनामा बेस रेट महँगो छ । यस बैंककाे एकल विन्दुमा रहेको बेसरेट १०.०८ प्रतिशत छ ।

कुमारी बैंकले १६ प्रकारका कर्जा १२.०८ प्रतिशतदेखि १५.०८ प्रतिशत ब्याजदरमा प्रदान गर्दै आएको छ । जसमा घरकर्जा, शिक्षा कर्जा, हार्यर पर्चेज तथा सवारी कर्जा, ओभरड्राफ्टलगायतका कर्जामा १५.०८ प्रतिशत ब्याज लिइरहेको छ ।

प्रकाशित मिति: आइतबार, साउन १८, २०७७ २१:३२