प्रहरीलाई बुझाएको नक्कली सुन लिएर वीरगञ्ज जाने योजनामा थिए सञ्जय पटेल

A+ A A-

प्रहरीले मंगलबार कमलादीबाट बरामद गरेको भनिएको आधा किलो सुन र साढे १४ किलो चाँदी विवादित बनेको छ । प्रहरीको चेक प्वाइन्टबाट आएको बा६च ५५१९ नम्बरकाे स्कार्पियो गाडीमा आएका यात्रुले प्रहरीको अगाडि झोला फालेर गाडी तीव्र गतिमा भागेको जनाएको थियो ।

उक्त गाडी बारामा इल्ताफ हुसेनको भएको खुलेको छ । उनी भारतीय जाली नाेटका कारोबारी हुन् । सोही अभियोगमा उनी २०६७ सालमा जेलसमेत परेका थिए ।

तर, प्रहरीले सार्वजनिक गरेजस्तो घटना प्रहरीको चेक प्वाइन्टमा घटेको नभई प्रहरीले सुनको झोला दरबारमार्गका एक प्रहरीलाई सुन्धारामा दिएर भागेको खुलेपछि घटना विवादमा आएको हो ।

प्रहरी स्रोतका अनुसार सुन्धारामा सुन बुझ्ने प्रहरीले पछि उक्त सुन महानगरीय प्रहरी वृत्त दरबारमार्गका प्रमुख डीएसपी रञ्जन दाहाललाई दिएका थिए ।

प्रहरीलाई सुन दिएर भाग्नेहरू देवानसिंह पटेल, निलेस सकिया र विजय पटेलले घटना प्रहरीले भने जस्तो नभई महानगरीय प्रहरी वृत्त दरबारमार्गका एक प्रहरीलाई सुन्धारामा सुनको झोला दिएर भागेको बयान दिइसकेका छन् ।

उनीहरू तीन जनालाई प्रहरीले नवलपरासीको दाउन्नेबाट बुधबार पक्राउ गरेर काठमाडौं ल्याइसकेको छ । सुन बुझ्ने २ जना प्रहरी जवानमाथि समेत प्रहरीले अनुसन्धान थालेको छ ।

सुन बोक्न प्रयोग भएको स्कार्पियोलाई समेत प्रहरीले बिहीबार ललितपुर ताल्छीखेलका अम्बर राईको घरनजिकैबाट नियन्त्रणमा लिइसकेको छ । चालक र सुनका मालिक भनिएका सञ्जय पटेल भने अझै फरार छन् ।

गुरुङले उक्त गाडी अपरिचित कोठा खोज्दै आएका व्यत्तिले छाडेर गएको प्रहरीलाई बताएका छन् । सुन र चाँदी बरामद घटनामा प्रहरीको कमजोरी देखिएपछि दरबारमार्गका प्रमुख डीएसपी रञ्जन दाहाललाई त्यहाँबाट हटाएर प्रहरी तालिमकेन्द्र महारागगञ्ज पठाइएको छ । उनको ठाउँमा प्रहरी प्रधान कार्यालयले रामेश्वर पौडेललाई पठाएको छ ।

नक्कली सुन लिएर गाडी वीरगञ्ज जाँदै थियो

महानगरीय अपराध महाशाखाका अनुसार नवलपरासीबाट पक्राउ परेका देवानसिंह पटेल, निलेस सकिया र विजय पटेल तीनै जना कमलपोखरीको एक घरमा सँगै एउटै फ्ल्याटमा बसेका थिए ।

प्रहरीले बरामद गरेको आधा किलो सुन र साढे १४ किलाे चाँदी हाल प्रहरीको फरार सूचीमा रहेका सञ्जय पटेलको भएको खुलेको हो । पक्राउ परेकाहरूले प्रहरीलाई दिएको बयानमा सुन र चाँदी सञ्जयको भएको र वीरगञ्ज लिएर ठगी गर्न चाँदीमा सुनको लेप लगाएको बयान दिएका छन् ।

सञ्जयसहित गाडी धनी इल्ताफ हुसेनको पनि योजना हुन सक्ने प्रहरीको अनुमान छ ।

फिल्म निर्देशक हुँ भन्दै ड्राइभरसँग गफ

पक्राउ परेका देवानसिंह पटेल, निलेस सकिया र विजय पटेलले आफू भारतीय चलचित्रमा काम गर्ने मान्छे भन्दै चिनाएका थिए । पक्राउ परेका मध्ये विजय पटेलले आफूले भारतीय चलचित्र पेनाल्टी बनाएको भन्दै ट्याक्सीचालक सन्दीप गुरुङसँग गफ दिएका थिए ।

उनीहरूको केही सयम काठमाडौं घुम्न आएको भन्दै सन्दीपलाई सुरुमा मनकामना र त्यहाँ पुगेपछि चितवन हुँदै भैरहवासम्म पुर्‍याउन अनुरोध गरेका थिए । सुरुमा मनकामनासम्मको १ हजार ५ सय भाडामा बुक गरेका उनीहरूले भैरहवासम्मको साढे ७ हजार रुपैयाँ दिने सर्तमा ट्याक्सीचालक नवलपरासीसम्म पुगेका हुन् । चालक गुरुङ पनि हाल प्रहरी नियन्त्रणमै छन् ।

उनलाई सोधपुछपछि छाडिने प्रहरीको भनाइ छ । पक्राउ परेकालाई प्रहरीले बिहीबार ७ दिनको म्याद थप गरेर अनुसन्धान गरिरहेको छ ।

प्रकाशित मिति: शुक्रबार, साउन १६, २०७७ १९:२९