प्रतिभा पहिचान गर्न स्टिम फाउन्डेसनकाे अन्तर्राष्ट्रिय ओलम्पियाड सेमिनार

प्रतिभा पहिचान गर्न स्टिम फाउन्डेसनकाे अन्तर्राष्ट्रिय ओलम्पियाड सेमिनार

A+ A A-

स्टिम फाउन्डेसन नेपालले विज्ञानका विषयगत प्रतिभा पहिचान गर्न र अन्तर्राष्ट्रिय ओलम्पियाडबारे जानकारी गराउन सातै प्रदेशमा 'फस्ट डिजिटल सेमिनार अन इन्टरनेसनल ओलम्पियाड' को उद्घाटन गरिएको छ ।

स्टिम फाउन्डेसन नेपालकाे आयाेजना, नेपाल विज्ञान तथा प्रविधि प्रतिष्ठान (नास्ट)को सहकार्य तथा शिक्षा मन्त्रालयको सहजीकरणमा उक्त कार्यक्रमकाे आयाेजना भएकाे हाे ।

कार्यक्रमकाे उद्घाटन बागमती प्रदेशबाट गरिएको हो । कार्यक्रममा विज्ञान शिक्षक समाज नेपाल, त्रिवि विज्ञान अनुसन्धान केन्द्र, युनिग्लोब कलेज, भिरिन्ची कलेज र टिच फर नेपाल गरी ६ संस्थाको समेत सहकार्य छ ।

कार्यक्रममा अन्तर्राष्ट्रिय ओलम्पियाडका बारेमा जानकारी दिँदै स्टिम फाउन्डेसन नेपालका संस्थापक अध्यक्ष एवं ओलम्पियाड अभियन्ता सर्जन बिसीले नेपालले अन्तर्राष्ट्रिय मञ्चमा प्रतिस्पर्धा गरी कास्यपदक जितिसकेको र आगामी दिनमा विद्यार्थीलाई उचित तालिम र परामर्श दिन सके उनीहरूले नेपालको गौरव बढाउने बताए ।

कार्यक्रममा अन्तर्राष्ट्रिय बायोलोजी ओलम्पियाड डा. सेबास्टियन ओपिट्जले अन्तर्राष्ट्रिय प्रतिस्पर्धाको खाका प्रस्तुत गरे ।

सेमिनारमा पूर्वशिक्षामन्त्री तथा नेपालमा ओलम्पियाडका राजदूत गणेश शाह, ओलम्यिाडमा नेपाललाई अन्तर्राष्ट्रिय मञ्चमा सहभागी गराउने प्रा. सीताराम बहुत, नास्टका उपकुलपति डा. सुनीलबाबु श्रेष्ठ, टिच फर नेपाल बागमतीका अध्यक्ष थकिनकुमार गुरुङ, युनिग्लोब कलेजका प्रिन्सिपल डा. करण ठगुन्नालगायतले अन्तर्राष्ट्रिय ओलम्पियाडमा स्टिम फाउण्डेसन नेपालसँगै रहेर नेपाली विद्यार्थीको प्रतिभा अन्तर्राष्ट्रिय मञ्चमा पुर्‍याउन सहयोग गर्ने प्रतिवद्धता जनाए ।

सहभागीले सरकारले नै यस्ता कार्यक्रमलाई अभिभावकत्व लिएर विद्यार्थीलाई सघाउनुपर्नेमा जोड दिए ।

नेपालले ढिलोे गरेर अन्तर्राष्ट्रिय मञ्चमा आफ्नो उपस्थिति देखाए पनि प्रतिभाशाली विद्यार्थीले नेपाललाई कास्यपदक दिलाइसकेका छन् ।

अन्तर्राष्ट्रिय ओलम्पियाडमा विषयगत रूपमा ४ देखि ६ जनाले सहभागिता जनाउन सक्नेछन् । जसका लागि राष्ट्रिय प्रतियोगिता अनिवार्य हुने संस्थाका अध्यक्ष बिसीले बताए । १० वटा बढी विषयत ओलम्पियाड गराउँदै आएको स्टिम फाउण्डेसन नेपालको पहलमा गरिने सेमिनारबाट धेरै विद्यार्थीले लाभ लिन सक्ने उनको विश्वास छ ।

स्टिम फाउण्डेसन नेपालले भर्खरै विज्ञान शिक्षक समाज नेपालसँगको सहकार्यमा नेपाल जुनियर साइन्स ओलम्पियाडको आवेदन खोलेको जानकारी पनि दियाे । फाउण्डेसनका केन्द्रीय सचिव मनोज आचार्यले यस्ता ओलम्पियाडले देशको इज्जत बढाउनुका साथै विषयगत ज्ञान र दक्ष जनशक्ति उत्पादनमा टेवा पुर्‍याउने बताए ।

प्रकाशित मिति: शुक्रबार, साउन १६, २०७७ १९:२२