नेकपाभित्र यसरी जुट्दै छ वामदेवको प्रस्तावमा बहुमत

A+ A A-

नेपाल कम्युनिस्ट पार्टी (नेकपा)को विवाद सल्टाउन उपाध्यक्ष वामदेव गौतमले राखेको ६ बुँदे प्रस्तावमा स्थायी कमिटीका बहुमत सदस्यले समर्थन जनाइसकेका छन् ।

गत १३ साउनमा उपाध्यक्ष गौतमले पार्टी एकता कायम राख्न भन्दै अघि सारेको ६ बुँदे प्रस्तावले पार्टीभित्रका मध्यमार्गी नेताहरूको प्रयासमा बहुमत सदस्यले क्रमशः समर्थन जनाउँदै गएको देखिएको हो ।

प्रधानमन्त्री केपी शर्मा ओलीले प्रतिनिधिसभाको यो कार्यकालभरि अर्थात् ५ वर्ष नै प्रधानमन्त्रीका रूपमा रहने तथा एकताको महाधिवेशनसम्म अध्यक्ष रहने र कार्यकारी भूमिकासहित प्रचण्डले पार्टी चलाउने भन्दै एकता महाधिवेशनलाई निर्धारित समयसीमामा नै सक्नुपर्नेलगायत ६ बुँदे प्रस्ताव उपाध्यक्ष गौतमले राखेका थिए ।

उपाध्यक्ष गौतमको प्रस्तावलाई ओली समूहका १२ जना स्थायी कमिटी सदस्यले पूर्ण समर्थन जनाएका छन् भने प्रचण्ड समूहका ९ जनाले प्रस्तावमा समर्थन जनाइसकेका छन् ।

वरिष्ठ नेता नेपाल समूहका ५ जना पनि उक्त प्रस्तावको पक्षमा क्रमशः उभिन थालेको घटनाक्रमले देखाएको छ । गौतमनिकट नेताका अनुसार स्थायी कमिटीका ४४ मध्ये हालसम्म २६ जनाले गौतमको प्रस्तावमा समर्थन गरेका छन् ।

सचिवालयमा पनि बहुमतको समर्थन

गौतमको प्रस्तावलाई सचिवालयको बहुमत सदस्यले समर्थन जनाएका छन् । प्रधानमन्त्री ओलीसहित ईश्वर पोखरेल, रामबहादुर थापा (बादल), महासचिव विष्णु पौडेल गरी उक्त प्रस्तावको पक्षमा ४ जना स्पष्ट रूपमा देखिएका छन् ।

ओलीले प्रधानमन्त्री र अध्यक्ष दुवै पदबाट राजीनामा दिनुपर्ने अडान छाडेर गौतमले ओलीलाई ५ वर्ष नै सरकार चलाउन दिनुपर्ने तथा एकताको महाधिवेशन नहुन्जेलसम्म हटाउनु नहुने र प्रचण्डलाई पूर्ण कार्यकारी अधिकार दिनुपर्ने प्रस्ताव गरेपछि सचिवालयमा उनको प्रस्तावलाई बहुमत सदस्यको समर्थन जुटेको हो । सो प्रस्तावको विपक्षमा ४ जना मात्रै सचिवालय सदस्य उभिँदै आएको गौतमको सचिवालयको दाबी छ ।

ओली पक्षधर सबै सहमत

प्रधानमन्त्री तथा पार्टी अध्यक्ष केपी शर्मा ओली पक्षधर १२ जना स्थायी कमिटी सदस्य गौतमको प्रस्तावलाई समर्थन जनाइसकेका छन ।

जसअनुसार किरण गुरुङ, प्रदीप ज्ञवाली, पृथ्वीसुब्बा गुरुङ, रघुवीर महासेठ, विष्णु रिमाल, सत्यनारायण मण्डल, शंकर पोखरेल, सुवास नेम्वाङ, छविलाल विश्वकर्मा छन् ।

तत्कालीन माओवादीबाट बहुमतको समर्थन

तत्कालीन माओवादी खेमाका बहुमत सदस्य पनि आफ्नो प्रस्तावका पक्षमा उभिएको गौतमको दाबी छ ।

गृहमन्त्रीसमेत रहेका सचिवालय सदस्य रामबहादुर थापाले बिहीबार निवासमा नै आफूनिकटहरूको बैठक राखेर गौतमको प्रस्तावलाई समर्थन जनाउने घोषणा गरिसकेका छन् ।

ओलीलाई तत्काल हटाउनु नहुने भन्दै अडान राख्दै आएका थापाले बोलाएको भेलामा उपस्थित २७ जना उनीनिकट नेतामध्ये ३ जनाबाहेक अन्य सबैले थापाको प्रस्तावमा समर्थन जनाएको बादलको दाबी छ ।

ओली भेटेर समर्थनको जनाउ

गौतमको प्रस्तावका पक्षमा स्थायी कमिटी सदस्यहरू टोपबहादुर रायमाझी, लेखराज भट्ट, हरिबोल गजुरेल, मणि थापा, देवेन्द्र पौडेल र चक्रपाणि खनालले समर्थन जनाइसकेका छन् ।

बुधबार राति प्रधानमन्त्री ओलीलाई भेटेर उनीहरूले गौतमको प्रस्तावमा आफूहरूको समर्थन रहेको बताएका हुन् ।

‘वामदेवजीको प्रस्तावलाई मानेर जान सकियो भने पार्टीको अहिलेको विवाद हल हुन सक्छ भन्ने राय हामीले प्रधानमन्त्रीलाई दियौँ,’ एक स्थायी कमिटी सदस्यले शिलापत्रसँग भने ।

बुधबार साँझ ७ बजे ततकालीन माओवादी खेमाका ७ जना नेता र प्रधानमन्त्री ओलीबीच भेटघाट भएको थियो । नेताहरूसँग एकल भेटघाट गर्दै आएका प्रधानमन्त्री ओलीले पार्टी विवाद सुरु भएपछि सम्भवतः पहिलो पटक बुधबार राति आफूनिकटबाहेकका नेतासँग सामूहिक परामर्श गरेका हुन् ।

अर्का स्थायी समिति सदस्य जर्नादन शर्मा पनि गौतमको प्रस्तावको पक्षमा उभिन थालेका छन् । बालुवाटारमा प्रचण्ड–नेपाल समूहकाे भेलामा प्रधानमन्त्रीको राजीनामा माग छाडेर १३ साउनको भेलामा भनेका थिए, ‘अब सबै विवाद छाडौँ, महाधिवेशनमा जाऊँ, पार्टी फुटे त्यहीँ फुटछ, जुटे त्यहीँ जुट्छ ।’

शर्मा निकटस्थका अनुसार यसअघि प्रधानमन्त्री ओलीले तत्काल राजीनामा दिनुपर्छ भन्ने अडानमा रहेका उनी उपाध्यक्ष गौतमको प्रस्तावपछि भने सो प्रस्तावमा लचिलाे बनेका हुन् ।

तत्कालीन माओवादी खेमाका नेतामध्ये वर्षमान पुन र शक्तिबहादुर बस्नेत पनि प्रधानमन्त्रीले राजीनामा दिनुपर्छ भन्ने पक्षमा छैनन् ।

मन्त्रिपरिषदमा रहेकाले पनि दुवै नेताले गौतमको प्रस्तावलाई स्वीकार गर्नुपर्छ भन्दै अध्यक्ष प्रचण्डलाई पनि आग्रह गरेको खुमलाटर स्राेतकै दाबी छ । गिरिराजमणि पोखरेल भने अहिलेसम्म मौन देखिएका छन् ।

माओवादी खेमाबाट नेतृत्व गर्ने प्रचण्ड, नारायणकाजी श्रेष्ठ, देव गुरुङ, पम्फा भुसाल, मातृका यादव, लीलामणि पोखरेल, गणेश साह भने ओलीले प्रधानमन्त्री र अध्यक्षमध्ये एक पद त्याग गर्नुपर्ने अडानमा कायमै छन् ।

प्रधानमन्त्री ओलीलाई भेटेको टोलीले बिहीबार प्रचण्डलाई भेटेर प्रधानमन्त्रीको राजीनामाको मागबाट पछि हटेर महाधिवेशनमा केन्द्रित हुन सुझाव दिएकाे छ ।

‘पार्टीका सबै विवाद अब छाडौँ, सम्पूर्ण ध्यान महाधिवेशन केन्द्रित गरौँ भनेर हामीले प्रचण्डलाई भनेका छौँ,’ एक स्थायी कमिटी सदस्यले भने, ‘र, प्रचण्डलाई ओलीसँग मिलेर अघि बढ्नुपर्ने पनि सुझाव दिएका छौँ, अब हाम्रो सुझाव मान्ने नमान्ने प्रचण्डजीको हातमा छ ।’

तत्कालीन माओवादीको खेमाबाट स्थायी कमिटीमा प्रतिनिधित्व गर्ने १६ मध्ये १० जना सदस्यले गौतमले प्रस्ताव गरेअनुसार नै अघि बढ्नुपर्ने सुझाव प्रचण्डलाई दिएपछि प्रचण्ड थप परामर्शमा जुटेका छन् ।

नेपाल समूहका नेताहरू क्रमशः बढ्दै

वरिष्ठ नेता माधवकुमार नेपाल समूहका भीम रावल, घनश्याम भुषाल, योगेश भट्टराईले पनि गौतमको प्रस्तावलाई सकारात्मक मानेका छन् । उनीहरुले आन्तरिक बैठकहरूमा गौतमको प्रस्तावलाई विरोध गरेर जान नहुने धारणा राखिरहेका छन् ।

प्रधानमन्त्री ओलीलाई हटाउने वरिष्ठ नेता नेपालको मागको पक्षमा खुलेर नलागेका मन्त्रीद्वय भुषाल र भट्टराईले त प्रचण्ड–नेपाल समूहको भेलामा मध्यमार्गी प्रस्तावसमेत गरेका थिए ।

शंकर पोखरेल, भुषाल र भट्टराईले १३ साउनमा कृषि मन्त्रालयमा तयार गरेको प्रस्तावप्रति प्रचण्ड–नेपालले समर्थन जनाउनुपर्नेमा पनि दुई नेताले दबाब बढाउँदै गएका छन् ।

‘सरकारका कामकारबाही र पार्टीका गतिविधिका बारेमा प्रधानमन्त्री सहमत नहुन्जेल स्थायी कमिटीमा छलफल नचलाउनेसम्मको प्रस्ताव उहाँहरूले नेताले गर्नुभएको थियो,’ भुषालनिकट एक नेताले भने, ‘अन्य विषयमा छलफल गर्ने तर प्रधानमन्त्री सहमति नभएसम्म छलफल नचलाउने उनीहरूको प्रस्ताव प्रचण्ड–नेपालसमक्ष पनि पुगेको छ ।’

उनका अनुसार गौतमको प्रस्ताव मध्यमार्गी भएकाले सोहीअनुसार अघि बढनुपर्ने धारणा भुषाल र भट्टराई दुवैले आफूनिकटहरूसँग बताउन थालेका छन् ।

जसरी पनि प्रधानमन्त्रीले पद त्याग गर्नुपर्ने भन्ने धारणा राख्दै आएका अर्का स्थायी कमिटी सदस्य भीम रावल गत १३ साउनको प्रचण्ड–नेपाल समूहको भेलापछि नरम बन्दै गएका छन् ।

उनले पदका लागि बार्गेनिङ गरेर पार्टीमा कलह ल्याएको भन्दै ‘तपाईंहरूको झगडामा मेरो टाउको नगन्नुस्’ भन्दै बैठक छाडेर बाहिरिएका थिए ।

नेताहरू क्रमश: १५–१९ माघ, २०७६ मा बसेको केन्द्रीय कमिटीले तय गरेको २५–३० चैत, २०७७ को एकता महाधिवेशनमा सम्पूर्ण ध्यान लगाउनुपर्ने पक्षमा उभिन थालेकाले अब नेकपाभित्रको विवाद महाधिवेशनसम्म मत्थर हुन सक्ने नेताहरू बताउँछन् ।

नेपालनिकट स्रोतका अनुसार प्रधानमन्त्रीले राजीनामा दिनुपर्ने भन्ने पूर्ववत् अडानबाट नेपालनिकट दुई स्थायी कमिटी सदस्य सुरेन्द्र पाण्डे र गोकर्ण विष्ट पनि लचिलाे भइरहेका छन् ।

उनीहरूले पनि उपाध्यक्ष गौतमले राखेको प्रस्तावलाई एकताको मिलनबिन्दु मानेर जानुपर्ने धारणा राख्न सुरु गरेको उनी निकटहरूले बताउन थालेका छन् ।

तर, नेपालसहित झलनाथ खनाल, अष्टलक्ष्मी शाक्य, रघुजी पन्त, बेदुराम भुषाल, भीम आचार्य, मुकुन्द न्यौपाने र युवराज ज्ञवालीले भने गौतमको प्रस्तावमा समर्थन जनाउन नसकिने बताइरहेका छन् ।

उनीहरू ‘एक व्यक्ति एक पद’ को अडानबाट पछि हट्न नहुने अडानमा छन् ।

प्रकाशित मिति: शुक्रबार, साउन १६, २०७७ १८:१२