प्रदेश राजधानी भएसँगै विराटनगरमा जनघनत्व बढ्यो

A+ A A-

पछिल्लो समय विराटनगर महानगरपालिकामा स्थायी बसोबास गर्नेहरूको संख्या वृद्धि हुँदै गएको छ । प्रदेशको राजधानी तथा आवश्यक सुविधाहरूको सहज उपलब्धताले महानगरमा बर्सेनि चाप बढ्दै गएको हो ।

विगतका वर्षहरूको तुलनामा पछिल्लो समय प्रदेश-१ को राजधानी विराटनगर महानगरपालिकामा घर बनाउनेहरूको संख्यामा वृद्धि भएको छ । शिक्षा, स्वास्थ्य, सुरक्षा, विद्युत्, खानेपानी र बस तथा हवाई सेवालगायतको सहज उपलब्धतासँगै प्रदेश राजधानीसमेत भएपछि महानगर भित्रिनेहरुको संख्यामा वृद्धि हुँदै गएको हो ।

महानगरपालिकाको घर नक्सा शाखाका प्रमुख अर्जुन थापाका अनुसार अनुसार प्रदेश १ को राजधानी हुनुअघि आव २०७४/०७५ मा १ हजार ३६२ वटा घर नक्सा पास भएको थियो । यसैगरी, २०७५/०७६ मा महानगरमा १ हजार ४७३ वटा घरहरू बनेको महानगरसँग तथ्यांक छ । गत आर्थिक वर्षको फागुनसम्ममा ९ सय ७४ वटा घरहरू थपिएको रेकर्ड महानगरपालिकाले जनाएको छ ।

महानगरभित्र बजार क्षेत्रलगायत वडानम्बर १, २, ३, ४, ५, र ११ नम्बर वडामा विशेष गरी तीव्र रूपमा घरहरू थपिने क्रममा रहेको विराटनगर महानगरपालिकाका घर नक्सा शाखा प्रमुख थापाले बताए ।

आवासगृहहरू र जनसंख्या थपिँदै गएसँगै त्यसलाई व्यवस्थित गर्दै जानुपर्ने चुनौतीसमेत महानगरपालिका सामु आएको छ । बढ्दो जनघनत्व तथा बस्ती व्यवस्थापन गर्न महानगरले भूकम्परहीत व्यवस्थित बस्ती विकासको अवधारणामा काम गरिरहेको महानगरपालिकाका प्रवक्ता राजेन्द्र प्रधानले बताए ।

परिकल्पना गरिएअनुसार महानगरलाई थप सुन्दर, व्यवस्थित र सुविधा सम्पन्न बनाउनु अघि बस्ती व्यवस्थापनमा जोड दिइएको उनले बताए ।

प्रदेश–१ को राजधानी विराटनगर महानगरपालिका विकासको गतिमा अघि बढेसँगै हरेक दृष्टिकोणले सुविधा सम्पन्न ठाउँ भएकाले गर्दा प्रदेश-१ का १४ वटै जिल्लासहित अन्य प्रदेशका मानिसहरूसमेत स्थायी बसोवासका लागि बसाई सरेर विराटनगर आउने गरेका छन् ।

आगामी दिनहरूमा महानगरमा बसोबास गर्नेहरूको संख्या थप बढ्दै जाने संयुक्त टोल नगरसमन्वय समितिका संयोजक राजेश मास्के बताउँछन् । उनले बसाइँसराईका कारण महानगरपालिकाभित्र तीव्र गतिमा मानवीय र भौतिक संरचनाहरूको चाप बढ्दै गएको बताए । संयोजक मास्केले यस्तो अवस्थामा सुरक्षा तथा मापदण्डलगायतका विषयहरूमा बेलैमा सबैले ध्यान पुर्‍याउन आवश्यक रहेको बताए । उनले बढी जनघनत्वका कारण भविष्यमा सृजना हुनसक्ने समस्यालाई पूर्व आंकलन गरेर योजनाबद्ध ढंगले अघि बढ्नुपर्ने समेत बताए ।

प्रकाशित मिति: शुक्रबार, साउन १६, २०७७ ००:३३