कांग्रेसमा महाधिवेशन राजनीति : देउवा शक्ति आर्जनको होडमा, इतर समूह हुन सकेनन् एकजुट

A+ A A-

महाधिवेशनको मिति आउन ७ महिना बाँकी रहँदा नेपाली कांग्रेसका सभापति शेरबहादुर देउवा संगठन विस्तारमा कस्सिएर लागेका छन् । पहिले संस्थापनइतरले संगठन विस्तार नगरेको आरोप लगाउने गरेका थिए भने अहिले महाधिवेशन प्रभावित गर्ने गरी संगठन विस्तार गरेको आरोप लगाएका छन् ।

विशेष गरी ५ साउनमा विस्तार गरिएको महिला विभाग, १० साउनमा पार्टीका पुराना ३ नेतालाई अनुशासन उल्लंघनको आरोपमा गरिएको कारबाही र १४ साउनमा गठन गरिएको ज्येष्ठ राजनीतिज्ञ सभाले कांग्रेसभित्र निर्वाचन स्वार्थ केन्द्रित गतिविधि र प्रतिक्रिया भइरहेको संस्थापनइतरको तर्क छ ।

केन्द्रीय सदस्य भीष्मराज आङ्दाम्वे संयोजक रहेको अनुशासन समितिले कांग्रेस पुराना नेता गोविन्दराज जोशी, पुष्करनाथ ओझा र रामबहादुर विष्टलाई निर्वाचनमा असहयोग गरेको तथा वागी उम्मेदवार उठेको आरोप लगाउँदै पार्टी सदस्यसमेत नरहने गरी कारबाही गरेको छ । पार्टी सभापति देउवा, वरिष्ठ नेता रामचन्द्र पौडेल र कांग्रेस सभापति पत्नी डा. आरजु राणाका क्षेत्रका ३ नेतालाई पार्टी अनुशासन समितिले कारबाही गरेको हो ।

यस विषयमा पूर्वमहामन्त्रीद्वय कृष्णप्रसाद सिटौला, प्रकाशमान सिंह, वर्तमान महामन्त्री डा. शंशाक कोइराला, नेता शेखर कोइरालाललगयताले पूर्ण असन्तुष्टि जनाएका छन् । त्यस्तै, वरिष्ठ नेता पौडेलले भने जोशीलाई ढिला गरी कारबाही गरिएकोमा र ओझालाई शंकाका भरमा कारबाही गरेकोमा असन्तुष्टि जनाएका छन् ।

यो पनि पढ्नुहोस

रामचन्द्र पौडेल अनुशासन समितिको निर्णयप्रति असन्तुष्ट

बुधबार कांग्रेस केन्द्रीय कार्यालय सानेपामा पौडेल पक्षको भेलाले विधान विस्तारको कार्यलाई रोक्नका लागि दबाब दिएको थियो । तर, बुधबार नै सभापति देउवाले एकलौटी रूपमा ४७९ सदस्यीय ज्येष्ठ राजनीतिज्ञ सभा गठन गरेपछि नेताहरूको असन्तुष्टि थप बढेको छ ।

कांग्रेस केन्द्रीय सदस्य डा. मीनेन्द्र रिजालले भनेका छन्, 'डडेलधुराका करिब २ दर्जन सदस्य हुँदा मोरङका ३ जना पर्नुभएछ । मोरङका सबै अझै जवान भएर हो कि ममा पार्टीको इतिहासको अनुपातको ज्ञान हराएको हो ?'

कांग्रेस नेता गोविन्दराज पोखरेलले पनि आफ्नो जिल्ला प्युठानमा २९ सालदेखि दुःख गरेका नेताहरू कोही पनि नअटाएको भन्दै दु:खेसो पोखेका छन् ।

कांग्रेस केन्द्रीय सदस्य चन्द्र भण्डारी भने अहिले संगठन विस्तार र नयाँ संगठन गठन विधानविपरीत भएको भन्दै पार्टी सभापति देउवाले विधानविपरीत काम गरेको आरोप लगाउँछन् ।

भण्डारी १३औँ महाधिवेशनमा देउवा खेमा नै छन् । तर, १४औँ महाधिवेशनको पूर्वसन्ध्यामा भने अर्जुननरसिंह केसी, चन्द्र भण्डारीलगायतका केही नेताहरूले देउवा खेमा छोडेका छन् ।

आगामी निर्वाचनलाई केन्द्रित गरेर प्रचारप्रसारको लागि वरिष्ठ नेता पौडेल र पूर्वमहामन्त्री सिटौलाले सम्पर्क कार्यालय खुला गरे तापनि सभापति देउवा भने संगठन विस्तार र नयाँ संगठन गठन गर्दै थप शक्ति आर्जनमा केन्द्रित देखिएका छन् ।

यता, महामन्त्री कोइरालाले ४ वर्षसम्म संगठन विस्तार नगर्ने र अहिले हतार गर्नुले निर्वाचन प्रभावित गर्ने खेल भएको आरोप लगाएका छन् ।

यो पनि पढ्नुहोस

कांग्रेस मुख्यालयमा पौडेल समूहको भेला, शशांकले भने : म सभापतिको उम्मेदवार

कांग्रेसमा संस्थापन पक्षबाट हालसम्म सभापतिका उम्मेदवारको रूपमा देउवा नै अग्रस्थानमा देखिएत पनि संस्थापनइतरका नेताहरू भने १ हुन सकेका छैनन् । बुधबार नै भएको भेलामा कांग्रेस महामन्त्री कोइरालाले पौडेल पक्षबाट आफू सभापतिको उम्मेदवार भएको दाबी गरेका थिए ।

तर, स्वयम पौडेल, सिटौला, प्रकाशमान सिंह र शेखरले पनि सभापति उठ्ने तयारी गरेका छन् ।

प्रकाशित मिति: बिहीबार, साउन १५, २०७७ २०:३७