कांग्रेस मुख्यालयमा पौडेल समूहको भेला, शशांकले भने : म सभापतिको उम्मेदवार

A+ A A-

नेपाली कांग्रेसका वरिष्ठ नेता रामचन्द्र पौडेल समूहका नेताहरूले पार्टीका विभाग विस्तारको काम रोक्न सभापति शेरबहादुर देउवालाई आग्रह गरेका छन् ।

पार्टी कार्यालय सानेपामा भेला भएका पौडेल समूहका नेताहरूले विधानविपरीत विभाग गठनको काम नगर्न आग्रह गरेका हुन् । पार्टीको १४औँ महाधिवेशनलाई प्रभावित पार्ने गरी भइरहेका विभाग गठनको काम रोक्न पौडेल पक्षका नेताहरूको आग्रह छ ।

कांग्रेस महामन्त्री शशांक कोइरालाले आचारसंहिता लागू भइसकेको अवस्थामा विभाग गठनको कामअघि बढाउनु विधानविपरीत भएको बताए । महाधिवेशनलाई प्रभावित पार्ने गरी भइरहेका निर्णयविरुद्ध अझ सशक्त भएर अगाडि बढ्न आज बैठक बोलाइएको उनले बताए ।

आगामी महाधिवेशनमा आफू सभापतिको दाबेदार भएको उल्लेख गर्दै कोइरालाले नयाँ मान्छेलाई पार्टी प्रवेश गराउने र पुराना नेताहरूलाई पार्टीबाट निकाल्ने काम भइरहेको भन्दै असन्तुष्टिसमेत जनाए । महाधिवेशन भएको ४ वर्षसम्म विभाग गठन गर्न तयार नभएका सभापति देउवालाई महाधिवेशनको मुखमा किन हतारो भयो भन्दै उनले प्रश्नसमेत गरे ।

केन्द्रीय सदस्य चन्द्र भण्डारीले विधानअनुसार महाधिवेशन भएको ६ महिनाभित्र विभाग गठन गरिसक्नुपर्ने भए पनि विधानविपरीत अहिले गठन भइरहेको कुराको विरोधस्वरूप भेला आयोजना गरिएको बताए । यसअघि नै अहिले गठन भएका विभागले वैधानिकता पाउँदैनन् भनेर सभापति देउवालाई पत्र पठाइएको उल्लेख गर्दै उनले पार्टीको कुनै पनि पद दाइजो जसरी बाँडेर हिँड्ने अधिकार सभापतिलाई नभएको बताए । कसलाई के पद दिने भन्ने अधिकार केन्द्रीय समितिलाई मात्रै भएको उनको भनाइ छ ।