अभियुक्तको बयानः चेक प्वाइन्ट क्रस गरेपछि हामीले प्रहरीलाई सुनको झोला दियौँ

अभियुक्तको बयानः चेक प्वाइन्ट क्रस गरेपछि हामीले प्रहरीलाई सुनको झोला दियौँ

A+ A A-

प्रहरीले आधा किलो सुन, साढे १४ किलो चाँदी र २ थान पेस्तोल बरामद गरेको घटनाले नयाँ मोड लिएको छ ।

मंलगबार प्रहरीलाई नै चक्मा दिँदै कमलादीको चेक प्वाइन्टमा बा६च ५५१९ नम्बरको स्कार्पियो गाडीले आधा किलो सुन, साढे १४ किलो चाँदी र २ थान पेस्तोल फालेर स्कार्पियो भागेको सार्वजनिक गरेको थियो ।

तर, सो सामग्री फालेर भागेको नभई तस्करहरूले प्रहरीलाई बुझाएर गाडी भगाएको खुलेको हो । प्रहरी स्रोतका अनुसार यसरी प्रहरीलाई झोला दिएर भाग्नेहरूमध्येका ३ जना पक्राउ परेका छन् । उनीहरूलाई नवलपरासीबाट पक्राउ गरिएको हो ।

यो पनि पढ्नुहोस्

आधा किलो सक्कली सुन, १४ किलो नक्कली र पेस्तोल फालेर भाग्ने ३ जना पक्राउ

पक्राउ पर्नेमा देवानसिंह पटेल, मिदेश सकिया र सञ्जय पटेल छन् । उनीहरू तीनै जना भारतीय नागरिक हुन् । उनीहरूलाई भगाउने ट्याक्सी चालक सन्दीप गुरुङ पनि प्रहरीको नियन्त्रणमा छन् । मिदेश सकियाले चेक प्वाइन्टमा रहेका प्रहरीलाई झोला बुझाएको प्रहरीकै अनुसन्धानबाट खुलेको छ ।

पक्राउ परेका सबै महानगरीय अपराध महाशाखाको नियन्त्रणमा रहेको महाशाखा स्रोतले बतायो ।

नक्कली सुन बुझाउने मिदेश सकियाले महाशाखामा दिएको बयानमा चेक प्वाइन्टभन्दा अलिक अघि बढेर मात्र आफूहरूले प्रहरीलाई झोला बुझाएको बयान दिएका छन् ।

यो पनि पढ्नुहोस्

२ थान पेस्तोल र १५ किलो 'सुन' फालेर भाग्ने स्कार्पियोको नम्बर पनि ‘डुब्लिकेट’

सकियाले बयानमा भनेका छन्, ‘म गाडीको अगाडि सिटमा थिएँ । पछाडि सञ्जय पटेल थियो । चालक राजु भन्ने थिए । प्रहरीले पिछा गरेको मलाई थाहा थिएन । मेरो साहुलाई थाहा भएको हुुनुपर्छ’, उनले भने, ‘हामीलाई यो झोला दिएर तिमीहरू पब्लिक गाडीमा आउनू भने । गाडीबाट निस्किएर प्रहरीलाई झोला दिएर हामी भागेका हौँ ।’

प्रहरीले हेरेको सीसीटीभी फुटेजमा पनि यसअघि प्रहरीले बताएको घटनास्थल कमलादीमा देखिएको छैन ।

यो पनि पढ्नुहोस्

कसरी भाग्यो १५ किलो पहेँलो धातु र पेस्तोल फाल्ने स्कार्पियो ?

तस्करीको सुन र चाँदी प्रहरीलाई बुझाएर भागेका तीनै जना थानकोटबाट ट्याक्सी चढेर भैरहवा पुगेकाे खुलेको छ । उनीहरूले सुरुमा ट्याक्सी चालकलाई मनकामना दर्शन गर्न जाने बताएका थिए । मनकामना पुगेपछि उनीहरूले चालकलाई चितवन जान भने ।

चितवन पुगेपछि भने उनीहरूले ट्याक्सी चालकलाई ७ हजार ५ सय रुपैयाँ थप रकम दिने सर्तमा भैरहवा लगेका थिए । तस्करले प्रयोग गरेको उक्त ट्याक्सी ग्रान्डी अस्पतालमा एक जना बिरामी छाडेर थानकोटतर्फ जाँदै गरेको अभियुक्तले बयानमा उल्लेख गरेका छन् ।

प्रकाशित मिति: बिहीबार, साउन १५, २०७७ १७:४६