प्रधानमन्त्री र अध्यक्षबाट ओलीले राजीनामा दिनुहुन्न : विष्णु पौडेल

A+ A A-

नेपाल कम्युनिस्ट पार्टी (नेकपा)का महासचिव विष्णु पौडलले तत्काल केपी शर्मा ओलीले प्रधानमन्त्री र अध्यक्ष दुवै पदबाट राजीनामा नदिने प्रष्ट पारेका छन् ।

सिंहदरबारस्थित संसदीय दलको कार्यालयमा सञ्चारकर्मीहरूसँग कुराकानी गर्दै महासचिव पौडेलले ओलीले ५ वर्ष नै सरकार चलाउने र एकता महाधिवेसनसम्म अध्यक्ष रहने भन्दै तत्काल राजीनामा नदिने प्रष्ट पारेका हुन् ।

अध्यक्षद्वय ओली र पुष्पकमल दाहाल (प्रचण्ड)लाई मिलाउनका लागि दौडधुप गरिरहेका महासचिव पौडलले नेकपा विवादभित्रका ३ वटा विषयबारे प्रष्ट हुन पनि आग्रह गरे ।

‘पहिलो नेकपा फुट्दैन, दोस्रो पाँच वर्ष नै केपी ओलीले सरकार चलाउनुहुन्छ, तेस्रो महाधिवेशन नभएसम्म उहाँ नै अध्यक्ष रहिरहनुहुन्छ,’ उनले बुधबार भने, ‘यो ३ वटाबाहेक नेकपामा अरू कुरा चाहिँ हुन सक्छन् । तर, यो ३ वटा विषय अहिले सबैभन्दा प्रष्ट छ ।’

उनका अनुसार यी ३ विषय प्रष्ट भएकाले अन्य विषयमा भने नेकपाभित्र छलफल र संवादका कामहरू भइरहेका छन् । ३ वटै विषय प्रष्ट भएकाले नेकपाभित्रको विवाद चाँडै मिल्ने पनि महासचिव पौडेलले जानकारी दिए ।

‘अब निकट भविष्यमा नै नेकपाभित्रको विवाद मिल्नेछ, यो तपाईंहरूले चाँडै सुन्न पाउनुहुनेछ,’ पौडेलले भने । उनका अनुसार अध्यक्षद्वयबीच सहमतिको प्रयास जारी रहेकाले नेकपाभित्रको विवाद हल भएर स्थायी कमिटी बैठक नियमित प्रक्रियामा सञ्चालन हुनेछ ।

त्यसो त प्रचण्ड–वरिष्ठ नेता माधवकुमार नेपाल समूहले बालुवाटारमा बोलाएको भेलालाई स्थायी कमिटी बैठक मान्न नसकिने पनि जनाएका छन् ।

‘नेकपाको काठमाडौंमा मात्रै होइन, देशभित्र कहीँ पनि औपचारिक रूपमा स्थायी कमिटी बैठक बसेको छैन्’ पौडेलले सिंहदरबारमा सञ्चारकर्मीसँग भने, ‘हिजो बालुवाटारमा स्थायी कमिटी बैठक बसेको भन्ने भ्रम छ भने हटाइ दिनुहोस् ।’ उनका अनुसार बालुवाटार स्थायी कमिटी सदस्यहरूको भेला मात्रै भएको थियो ।

‘सो भेलाको सबैभन्दा ठूलो नेता भनेको प्रचण्ड हो, उहाँले पनि हिजो यो बैठक होइन भनेर सुरुमा नै धारणा राखेर कुरा सुरु गर्नुभएको सुनेको छ,’ पौडेलले अगाडि भने, ‘त्यसका कारण नेतृत्वको अभिव्यक्ति, वैधानिक र राजनीतिक रूपमा पनि त्यो बैठक होइन, हुनै सक्दैन ।’ स्थायी कमिटीमा रहेका सदस्यहरू बसेर पार्टी एकता जोगाउने प्रयासका लागि छलफल गरेको उनको भनाइ छ ।

प्रवक्ता नारायणकाजी श्रेष्ठले मात्रै होइन, प्रचण्डको सचिवालयले पनि प्रचण्डको अध्यक्षतामा बैठक बसेको भन्ने कुरालाई अस्वीकार गरेका छन् । ‘प्रचण्ड स्वयंले पनि यो बैठकको निरन्तरता होइन भने पछि अरूले के-के भन्छन् भन्ने कुराको के अर्थ रहन्छ र ?’ पौडेलले अगाडि भने, ‘यदी नारायणकाजीजीले बैठक भनेको भएँ, त्यो पार्टीको प्रवक्ताका रूपमा भनेको होइन, अन्यको प्रवक्ताको रूपमा भनेको हुनुपर्छ ।’

उनका अनुसार पार्टी प्रवक्ता नारायणकाजी श्रेष्ठलाई बालुवाटारमा भएको छलफललाई स्थायी कमिटीको बैठक भन्ने अधिकार नभएको पौडेलेको प्रतिक्रिया छ ।

प्रकाशित मिति: बुधबार, साउन १४, २०७७ २३:०५