प्रचण्डसँग हरिबोल असन्तुष्ट, भन्छन् : सुझाव मान्नै छाड्नुभयो

A+ A A-

सत्तारुढ नेपाल कम्युनिस्ट पार्टी (नेकपा)का कार्यकारी अध्यक्ष पुष्पकमल दाहाल (प्रचण्ड) सँग स्थायी कमिटी सदस्य हरिबोल गजुरेलले चरम असन्तुष्टि व्यक्त गरेका छन् ।

लामो समयदेखि हरेक घटनामा प्रचण्डलाई सहयोग गर्दै आएका स्थायी कमिटी सदस्य गजुरेलले भने पछिल्लो समयमा प्रचण्डसँगको असन्तुष्टि सार्वजनिक रूपमा नै व्यक्त गरेका हुन् ।

‘सरकार र पार्टी एकताका लागि प्रचण्डजीलाई मैले महत्त्वपूर्ण सुझाव दिएको थियो । तर, उहाँले प्रयोग गर्नु भएन,’ गजुरेलले शिलापत्रसँग भने, ‘अन्तिम अवस्थामा प्रयोग गर्छु भन्ने उहाँले प्रतिवद्धता पनि जनाउनुभएको थियो, तर व्यवहारमा कार्यान्वयन भने गर्नु भएन ।’

पार्टीको एकता कायम गर्दै नेकपाको भविष्य सुरक्षित गर्ने आफूले अचुक उपाय दिएको तर प्रचण्डले कार्यान्वयनमा नल्याएको गजुरेलको गुनासो छ ।

‘यदि मैले दिएको सुझाव प्रचण्डले मानेको भए, हिजोको बैठक अर्को स्थितिमा जान्थ्यो तर उहाँले आँट गर्नु भएन, परिणाम देखिहाल्नुभयो,’ गजुरेलले शिलापत्रसँग भने, ‘हरिबोलजीको सुझाव महत्त्वपूर्ण छ पनि भनेर हाम्रै टोलीका साथीहरूलाई पनि भन्नुभयो तर काम गर्नु भएन ।’

उनका अनुसार आफूले दिएको सुझाव अस्वीकार गरेका कारण नेकपाभित्र विवाद देखा परेको उनको जिकिर छ ।
तर, के सुझाव दिइएको थियो, त्यो भने खुलाउन चाहेनन् । उनले यति मात्रै भने, ‘उपयुक्त समयमा उक्त सुझाव सार्वजनिक गर्नेछु ।’

पछिल्लो समयमा सार्वजनिक रूपमा नै प्रचण्डप्रति असन्तुष्टि व्यक्त गर्दैँ आएका गजुरेलले प्रचण्ड नमज्जासँग घेराबन्दीमा पर्दै गएको जनाउँदै आएका छन् ।

प्रचण्डलाई केही सीमित व्यक्तिले घेराबन्दीमा पार्ने काम गरेको, उक्साउने काम गरिरहेको जस्ताे गुनासो उनले सार्वजनिक रूपमा टिप्पणी गर्न थालेका छन् ।

‘प्रचण्डजी अब हामीलाई विश्वास गर्नु हुन्न, उहाँ अरुलाई नै विश्वास गरेर हिँड्न थाल्नुभएको छ,’ एक अन्तवार्ताको क्रममा गजुरेलले सार्वजनिक रूपमा धारणा राखेका थिए । गजुरेलले प्रचण्डप्रति सार्वजनिक रूपमा असन्तुष्टि जाहेर गरेको सम्भवतः पहिलो घटना हुन सक्छ ।

गजुरेल–प्रचण्डबीचको यो बड्दो दूरीलाई भने तत्कालीन माओवादी खेमाभित्र निकै अर्थपूर्ण रूपमा हेरिन्छ । किनभने धोविघाट गठबन्धनमा अप्ठयारो पर्दा साथ दिने र मनोवैज्ञानिक रूपमा प्रचण्डलाई उत्साह भर्ने काम गजुरेल र अग्निप्रसाद सापकोटाले अन्तिम समयमा गरेका थिए ।

‘धोविघाट गठबन्धनको घेराबन्दीमा परेपछि प्रचण्ड पहिलो पटक पार्टीभित्र आफू कमजोर भएँ भन्ने सोचेर रुनुभएको थियो, त्यो आँसु देख्ने मान्छे हुन् गजुरेलजी, उनले प्रचण्डलाई हौसला दिएर उत्साह भरिदिएका थिए,’ एक स्थायी समिति सदस्यले भने, ‘सबैतिर अप्ठ्यारो परेको बेलामा पनि साथ नछाडने गजुरेल आजकाल असन्तुष्टि पोख्दै हिँड्दा आश्चर्य लागेको छ ।’

झन् गजुरेलले टेलिभिजन र रेडियोमार्फत प्रचण्डसँगको असन्तुष्टि पोखेर हिँड्न थालेपछि तत्कालीन माओवादी खेमाभित्र एक किसिमको तरङ्ग देखा परेको छ ।

सबैभन्दा नजिकका गजुरेलले पनि असन्तुष्टि पोख्दै हिँडेपछि उनीसँग तत्कालीन माओवादीका नेताहरू क्रमशः टाढा हुनेको संख्या ५ पुगेको छ ।

यसअघि नै सचिवालय सदस्य तथा गृहमन्त्री रामबहादुर थापा, उद्योगमन्त्री तथा स्थायी समिति सदस्य लेखराज भट्ट र स्थायी सदस्यद्वय टोपबहादुर रायमाझी र मणि थापा प्रचण्डसँग टाढिइसकेका छन् । उनीहरू अर्का अध्यक्ष तथा प्रधानमन्त्री केपी शर्मा ओलीको खेमामा उभिन पुगेका छन् ।

प्रकाशित मिति: बुधबार, साउन १४, २०७७ १०:३४