यस्तो छ रघुजीले च्यात्न खोजेको घनश्यामको चिर्कटो

A+ A A-

पटकपटक स्थगित हुँदै आएको नेपाल कम्युनिस्ट पार्टी (नेकपा) को स्थायी कमिटी बैठक आज बिहान ११ बजेका लागि तय भएको थियो ।

तर प्रधानमन्त्रीसमेत रहेका अध्यक्ष केपी ओलीले ११ बज्न नपाउँदै एक्लैले स्थगित गरिदिए । बैठकका लागि बालुवाटार पुगेका स्थायी कमिटी सदस्यहरू बालुवाटार पुग्दा बैठक स्थगित भइसकेको थियो ।

बैठक स्थगित भएकाेमा सबैभन्दा रुष्ट देखिए वरिष्ठ नेता झलनाथ खनाल । कार्यकारी अध्यक्ष प्रचण्ड त नरिसाउने कुरै भएन ।

बैठक स्थगन भएपछि रुष्ट नेताहरू जसरी पनि स्थायी कमिटी बैठक बसाल्ने तरखरमा थिए ।

यो पनि पढ्नुहोस्

बालुवाटारमा घनश्याममाथि बेदुराम र रघुजी झम्टिन पुगेपछि...

यसबीचमा वरिष्ठ उपाध्यक्ष वामदेव गौतमले ओली महाधिवेशनसम्म अध्यक्ष, पाँचै वर्ष प्रधानमन्त्री हुने र प्रचण्ड कार्यकारी अध्यक्ष हुने ६ बुँदे मध्यमार्गी प्रस्ताव सार्वजनिक गरिदिए ।

गौतमको यो पत्रले सचिवालयमा ओलीको पल्ला भारी मात्रै गराएन, स्थगित बैठक कसरी अघि बढाउने भन्ने अन्योल पनि भयो ।

अन्योलका बीच नेता खनालको आक्रोश थाम्न प्रचण्ड र वरिष्ठ नेता माधव नेपाल समूहले बेग्लै भेला डाक्ने निर्णय गरे ।

२४ जना भेला भएपछि छलफल सुरु भयो । अध्यक्ष ओली, महासचिव विष्णु पौडेल, ईश्वर पोखरेल, रामबहादुर थापा (बादल), गौतमलगायतका नेताको अनुपस्थितिमै भेला सुरु गर्न खोजियो ।

बैठक बस्नुअघि प्रचण्ड र खनालले पुन: ओलीलाई भेटे तर ओलीले बैठक संचालन नगर्न भने ।

त्यसपछि पुन: फर्किएर बेग्लै बैठकको तयारी सुरु भयो । नेताहरू भेला भए । भेलामा प्रचण्डको ब्रिफिङपछि विकल्पमा छलफल भए ।

नेता भीम रावलले दुई अध्यक्षको पदीय झगडामा आफूहरू अल्पमत र बहुमतको साक्षी नबस्ने बताए भने सहभागी नेताले विभिन्न कोणबाट धारणा राखे ।

बैठक सकिनै लागेको थियो, स्थायी कमिटी सदस्य घनश्याम भुषालले बैठकको निर्णय भन्दै भेलालाई एउटा चिर्कटो निकालेर सुनाउन खोजे ।

लगत्तै अर्का स्थायी कमिटी सदस्य रघुजी पन्त जुरुक्क उठे, साथ दिए बेदुराम भुषाललगायतका नेताले । भेलामा केही बेर होहल्ला भयो ।

पन्त जुरुक्क उठे र घनश्यामले लेखेको चिर्कटो च्यात्न खोजे ।

घनश्यामले चिर्कटोमा लेखेका रहेछन्–

'जारी रहेको स्थायी कमिटीको बैठक पार्टी अध्यक्ष कमरेड केपी शर्मा ओली एक्लैले स्थगित भएको सूचना प्रसारित गर्नु उचित थिएन । यस विषम परिस्थितिमा पार्टी एकता विधि र परम्परालाई ध्यानमा राखी अर्का अध्यक्ष कमरेड केपी शर्मा ओलीसँग छलफल गरेर बैठक सुचारु गर्न पार्टी अध्यक्ष कमरेड प्रचण्डलाई जिम्मेवारी दिने निर्णय बैठकले गर्‍याे । '

प्रकाशित मिति: मंगलबार, साउन १३, २०७७ १७:४२