हिम्मतवाली प्रहरी: गर्भवती हुँदा परीक्षा, सुत्केरीमा तालिम

संसारमा हरेक व्यक्तिको आफ्नो अलगअलग स्वभाव र व्यक्तित्व हुन्छ । हरेक व्यक्तिभित्र राम्रो र नराम्रो गुण हुन्छ । यही विशेषताले नै हरेक मान्छेलाई अरुबाट अलग देखाउँछ र त्यो उसको पहिचान पनि हो ।

वुडवर्थले व्यक्तित्वको परिभाषा गर्दै भनेका छन्, ‘व्यक्तित्व व्यक्तिको सम्पूर्ण व्यवहारको ऐना हो, जसको प्रदर्शन उसले विचार व्यक्त गर्ने ढंग, अभिव्यक्ति एवं रुचि, काम गर्ने तरिका र जीवनप्रतिको दार्शनिक विचारधाराद्वारा व्यक्त हुन्छ ।’

तर व्यक्तित्वको निर्माण एक दिनमा हुँदैन । यो एक निरन्तर प्रक्रिया हो । यसको निर्माणमा हाम्रो परिवार, समाज, शिक्षा, अनुभव तथा हाम्रो सोचको ठूलो योगदान हुन्छ ।

भारतीय प्रहरी अधिकारी डा. प्रज्ञा जैन भन्छिन्, ‘मेरो व्यक्तित्वको निर्माण पनि एक चुनौतीपूर्ण एवम् रोचक यात्राको परिणाम हो ।’

उनको प्रारम्भिक शिक्षा एक सानो शहर बडौतमा भयो । यो उत्तर प्रदेशको बागपत जिल्लामा पर्छ । उनका बाबु आयुर्वेदिक डाक्टर र आमा दिल्ली विश्वविद्यालयबाट स्नातक हुन् ।

प्रारम्भदेखि नै उनका बाबुआमाले शिक्षामा राम्रो मार्गनिर्देश गरेका थिए । १० र १२ कक्षाको जिल्ला स्तरको परीक्षामा उनी प्रथम भइन् । दुःखमा परेका मानिसको अवस्था देखेर उनको मनमा अनेक कुरा खेल्थे । यसै कारण उनले डाक्टर बन्ने निर्णय गरिन् ।

पहिले बडौतमा र पछि दिल्लीमा क्लिनिक खोलिन् र तनमनले मानिसको सेवा गरिन् । उनले दीनहीन मानिसको सेवा गरिन् । तर उनलाई यो प्लेटफर्म सानो भएको र संसाधन सीमित भएको महसुस भयो ।

यसै कारण उनले यूपीएससीको परीक्षा दिने निर्णय गरिन् । पहिलो प्रयासमा अन्तर्वार्तासम्म पुगे पनि उनले अन्तिम सूचीमा नाम निकाल्न सकिनन् । दोस्रो पटक स्वास्थ्य समस्या र मानसिक तनावका कारण सफलता हात परेन ।

तेस्रो प्रयासकाे समयमा उनी गर्भवती थिइन् र उनलाई ‘बेड रेस्ट’ गर्न सल्लाह दिइएको थियो । यसका बाबजुद उनले आत्मबल उच्च पारिन् र अन्तर्वार्तासम्मको यात्रा तय गरिन् । अन्ततः यही प्रयासमा उनी सफल भइन् र भारतीय प्रहरीमा सेवा गर्न थालिन् ।

सामाजिक जागरुकता तथा देशप्रेमको अभिव्यक्तिको अवसर खाकीले दियो । तर यहाँ पनि नयाँ चुनौती थिए ।

तालिमको समयमा ६ महिनाकी छोरी छाडेर जान निकै कठिन थियो । त्यसमाथि भर्खरै सुत्केरी भएकी महिलाका लागि शारीरिक ब्यायाम, १६ किलोमिटरसम्मको दौड, घोडसवारी, स्वीमिङजस्ता तालिममा भाग लिनु कम चुनौतीपूर्ण थिएन ।

साइक्लिङका क्रममा भएको दुर्घटनामा दुवै हातका हड्डी मर्किन पुगे । तर, हौसला र सकारात्मक सोचलाई उनले कहिल्यै त्यागिनन् । यसबाट उनले चुनौतीको सामना त गरिन् नै, आफ्ना लागि नयाँ दिशासमेत तय गरिन् ।

हरेक व्यक्ति विशेष हुन्छ । हर कोहीमा पनि आफ्नो खुबी हुन्छ । तर, हाम्रो जीवन कतातिर लैजाने भन्ने कुरा चैँ उसको दृष्टिकोणमा अधिक निर्भर हुन्छ ।

प्रकाशित मिति: मंगलबार, साउन १३, २०७७ १६:३१