कोरोना नियन्त्रणमा राम्रो काम गरेको सन्देश दिन सके मात्र पर्यटक बढ्ने

A+ A A-

होटल व्यवसायीहरूले नेपालमा कोभिड-१९ रोकथाम तथा नियन्त्रणका लागि राम्रो काम भइरहेको प्रत्याभूति गराउन सके धेरै संख्यामा पर्यटक आउन सक्ने बताएका छन् ।

होटल संघ नेपालका उपाध्यक्ष विनायक शाहले विदेशी पर्यटकलाई नेपाल जाँदा कोभिड-१९ को संक्रमण छैन भन्ने कुराको प्रत्याभूति सरकारले गराउनुपर्ने बताए । सरकारले नेपालका कोरोना संक्रमणको रोकथाम तथा नियन्त्रणका लागि राम्रो काम गरेको सन्देश दिनसके नेपाल घुम्न आउने पर्यटकको संख्या बढ्ने शाहले बताए ।

त्यसका लागि पर्यटकको पीसीआर परीक्षण गर्ने व्यवस्था गर्नुपर्ने उनले बताए । त्रिभुवन अन्तर्राष्ट्रिय विमानस्थलमा नै पीसीआर परीक्षण गर्ने केन्द्र स्थापना गरेमा विदेशमा राम्रो सन्देश जाने र पर्यटक आउन सक्ने उनले बताए ।

पर्यटन क्षेत्र, होटल व्यवासय सञ्चालनका लागि मौद्रिक नीतिमार्फत ५ प्रतिशत ब्याजदरमा वर्किङ क्यापिटल दिने कुरा आउनु सकारात्मक भएको शाहले बताए । तर, सरकारले ५० अर्बको पुनरुत्थान कोष खडा नगरेसम्म व्यवसायीले उक्त सुविधा नपाउने र कर्मचारीलाई तलब दिन र होटल सञ्चालन गर्न नसक्ने भएकाले कोषको व्यवस्था छिटो गर्न सरकारलाई आग्रहसमेत गरे । उनले नीति नियममा आएको कुरालाई कार्यान्वयनमा लैजाने कुरामा सरकार प्रस्टरूपमा नआउँदा व्यवसायीमा अन्योलता बढेको बताए ।

पर्यटन व्यवसायी सुदर्शन नेपालले ट्रेकिङ, हाइकिङ, क्याम्पिङ ट्रेक गर्ने पर्यटकलाई फोकस गरेर काम गरिने बताए । कोभिड-१९ संक्रमणको जोखिमलाई ध्यान दिएर समूहमा आउने पर्यटकभन्दा पनि व्यक्ति र पारिवारिक पर्यटकलाई फोकस गरेर प्रवर्द्धन गरिएको बताए । यो समयमा धेरै मुलुक संक्रमणको जोखिममा रहेकाले नेपाललाई खुल्ला गर्दा पर्यटक आउनसक्ने सम्भावना बढी रहेको पनि उनले बताए । खासगरी चिनियाँ पर्यटक नेपाल आउन सक्ने उनले बताए ।

व्यवसायीले नेपालमा आउने पर्यटकका लागि सरकारले लिने शुल्कमा छुट दिनुपर्नेसमेत बताएका छन् । नेपालमा आउने पर्यटकलाई कसरी कोभिड-१९को संक्रमणबाट बचाउने भन्ने विषय महत्वपूर्ण हुने व्यवसायीले बताएका छन् ।

प्रकाशित मिति: सोमबार, साउन १२, २०७७ २०:३५