शैक्षिक गुणस्तर सुधारका लागि उस्टानले दियो सरकारलाई ६ सुझाव

उस्टान अध्यक्ष रामकुमार बान्तवा

A+ A A-

विश्वविद्यालय प्राध्यापक तथा विद्यालय शिक्षक एशोसियसनले निजी र संस्थागत विद्यालयसँग उपयुक्त समन्वयकारी भूमिका निर्वाह गरी पठनपाठन सुचारु गर्न सरकारसँग माग गरेको छ ।

निजी विद्यालय र सरकारबीच वार्ता नमिल्दा अनलाइनबाट सञ्चालन भएका कक्षा पनि बन्द गर्नुपर्ने अवस्था आएको र शिक्षक, कर्मचारीले पारिश्रमिक नपाएको अभिव्यक्तिप्रति ध्यानाकर्षण जनाउँदै एशोसियसनले पठनपाठनको वातावरण सिर्जना गर्न सरकारसँग माग गरेको हो ।

कोरोना महामारीका समयमा विद्यालयप्रति सरकारको जिम्मेवारी र अभिभावकत्व कमजोर देखिएको निष्कर्ष निकाल्दै एशोसियसनले सरकारलाई शैक्षिक गुणस्तर सुधारका लागि सरकारलाई विभिन्न सुझावसमेत दिएको छ ।

एशोसियसनले सरकारलाई शिक्षा मन्त्रालयले मार्गदर्शक, जिम्मेवारी तथा अभिभावकत्व ग्रहण गर्नुपर्ने, निजी तथा संस्थागत विद्यालयसँगको उपयुक्त समन्वयकारी भूमिका निर्वाह गरी विद्यार्थीको पठनपाठन सुनिश्चित गर्नुपर्ने सुझाव दिएको छ ।

त्यस्तै, एशोसियसनले विश्वविद्यालय अन्तरगतका करार, आंशिक तथा ज्यालादारी शिक्षक, पब्लिक क्याम्पसका शिक्षकको समस्या, तत्कालिन उच्च माध्यमिक तहका विद्यालयका शिक्षकको समस्या, बाल कक्षा शिक्षकका समस्या तथा विद्यालयका कर्मचारीको समस्याको स्थायी समाधान गरिनुपर्ने पनि सुझाव दिएको छ ।

अध्यक्ष रामकुमार बान्तवाद्वारा जारी विज्ञप्तिमा उल्लेख गरेअनुसार एशोसियसनले सामुदायिक विद्यालयमा बन्दाबन्दीको समयमा अनलाइन तथा भर्चुअल कक्षा प्रभावकारी ढंगले सञ्चालन गर्नुपर्ने, निजी तथा संस्थागत विद्यालयसँगको शिक्षकलगायत सबै तहमा अनलाइन तथा भर्चुअल कक्षा सञ्चालन गर्ने शिक्षकको पारिश्रमिक सुनिश्चित गर्नुपर्ने र बन्दाबन्दीको कारणले कुनै शिक्षक तथा कर्मचारीको रोजगारी नगुम्ने वातावरण बनाउन पनि सरकारलाई सुझाव दिएको छ ।

प्रकाशित मिति: आइतबार, साउन ११, २०७७ १९:२२