गुप्तचर राख्ने नाममा मनलाग्दी खर्च गर्दै मन्त्री र सचिव

A+ A A-

संघीय सरकारले काम गर्न नदिएको आरोप लगाउने प्रदेश २ सरकारले अनावश्यक रूपले बजेटको दुरुपयोग गरिरहेको देखिएको छ ।

आफूसँग रहेकोे बजेटलाई विकास निर्माणभन्दा कार्यकर्ता पाल्न वा आफ्नै गोजी भर्नमा मन्त्रीहरू लागेको देखिएको हो ।

आन्तरिक मामिला तथा कानुन मन्त्रालयले आफ्नै अनुसन्धान अधिकारी (गुप्तचर) राख्ने नाममा २४ लाख रुपैयाँ खर्च गरेको छ । महालेखा परीक्षकको कार्यालयले मन्त्रालयले आर्थिक वर्ष २०७५–७६ मा सो रकम खर्च गरेको जनाएको छ ।

प्रदेश सरकारले प्रदेशमा शान्ति सुरक्षा स्थापना गर्न नसकेको भन्दै आलोचना हुँदै आइरहेको छ । तर, प्रहरी प्रशासन आफ्नोमातहत नरहेको भन्दै समस्या भइरहेको अवस्थामा प्रदेश सरकारले समेत संघीय सरकारको नक्कल गरेर रकम बाँड्न थालेको देखिएको छ ।

प्रदेश मन्त्रिपरिषद्को १० जेठ, २०७५ को निर्णयअनुसार आन्तरिक मामिला तथा कानुनमन्त्री र सचिवलाई भइपरी आउने शान्ति सुरक्षाको काममा बिल भरपाइ पेस गरी रहनुनपर्ने गरी महिनाको अधिकतम ५ पटकसम्म हुनेगरी मन्त्रीलाई प्रतिपटक ३० हजार र सचिवलाई १० हजार रुपैयाँ खर्च गर्ने अख्तियारी दिइएको छ ।

सोही आधारमा गतवर्ष मन्त्रीले १८ लाख र सचिवले ६ लाख रुपैयाँ गरी कुल २४ लाख रुपैयाँ खर्च गरेको महालेखा परीक्षकको प्रतिवेदनमा उल्लेख छ । प्रदेश २ मा आन्तरिक मामिला तथा कानुन मन्त्री ज्ञानेन्द्र यादव रहेका छन् ।

प्रदेशभित्र शान्ति, सुरक्षा तथा सुव्यवस्था कायम राखी प्रदेशको आर्थिक हित, विकास, औद्योगिकीकरण र व्यापार व्यवसायको प्रवर्द्धन गर्न यससम्बन्धी सूचना संकलन गरी प्रशोधन गर्न प्रदेश सरकारले आफ्नै गुप्तचर राख्न लागेको जनाएको छ ।