८ लाख रुपैयाँ ‘न्यानो नानी’लाई, ४ वटा नयाँ शाखा उद्घाटन

A+ A A-

काठमाडौं । ज्योति विकास बैंकले शुक्रबार आफ्नो १२औं वार्षिकोत्सव मनाएको छ ।

बैंकले वार्षिकोत्सवको अवसरमा आजै राष्ट्रिय आविष्कार केन्द्रको ‘न्यानो नानी’ परियोजनाका लागि आर्थिक सहयोग, चारवटा नयाँ शाखाको उद्घाटन, रक्तदान, कर्जाको ब्याजमा छुटलगायत विभिन्न कार्यक्रम तथा निर्णयहरू गर्‍यो ।

राष्ट्रिय आविष्कार केन्द्रलाई ८ लाख रुपैयाँ सहयोग

वार्षिकोत्सवको अवसरमा ज्योति विकास बैंकले राष्ट्रिय आविष्कार केन्द्रको ‘न्यानो नानी’ परियोजनाका लागि ८ लाख रुपैयाँ सहयोग गर्ने भएको छ । बैंकले आफ्नो संस्थागत सामाजिक उत्तरदायित्वअन्तर्गत सो परियोजनाका लागि सहयोग गरिन लागेको जनाएको छ ।

नवजात शिशुको शारीरिक तापक्रम उचित अवस्थामा राख्न प्रयोग हुने राष्ट्रिय आविष्कार केन्द्रका १० वटा ‘न्यानो नानी’ (बेबी वार्मर) बनाउनका लागि बैंकले उक्त सहयोग गर्ने भएको हो ।

बैंकको तर्फबाट सञ्चालक समितिका अध्यक्ष हरिचन्द्र खड्काले राष्ट्रिय आविष्कार केन्द्रको ‘न्यानो नानी’ परियोजनाका लागि ८ लाख रुपैयाँ सहयोग गर्ने प्रतिवद्धता व्यक्त गरेका छन् ।

रक्तदान

बैंकले वार्षिकोत्सवको अवसर पारेर शुक्रबार रक्तदान कार्यक्रम पनि आयोजना गर्‍याे । उक्त कार्यक्रममा ३४ जनाले रक्तदान गरेको बैंकले जनाएको छ ।

कर्जाको ब्याजमा २ प्रतिशत छुट

सो अवसरमा अध्यक्ष खड्काले बैंक अझ सफल रूपमा विस्तारित हुँदै ग्राहक वर्ग, शेयरधनी र कर्मचारीको उज्ज्वल भविष्यका लागि निरन्तर प्रयास गरिने प्रतिवद्धता जनाए । उनले हालै नेपाल राष्ट्र बैंकले कोभिड महामारीलाई मध्यनजर गरी ल्याएको कर्जाको ब्याजमा २ प्रतिशत छुटको व्यवस्था विनासर्त सम्पूर्ण कर्जाग्राही ग्राहकहरूलाई लागू गरिसकेको जानकारी दिए ।

४ वटा नयाँ शाखाको उद्घाटन

वार्षिकोत्सवको अवसरमा बैंकले डिजिटल प्रविधिमार्फत ४ वटा नयाँ शाखा कार्यालयको औपचारिक उद्घाटन गर्‍याे । कार्यक्रमका विशिष्ट अतिथि हरिप्रसादले बैंकको केन्द्रीय कार्यालयबाटै डिजिटल प्रविधिमार्फत सामरी, बेनी, बागलुङ, फुटुङ शाखा कार्यालय र घोराही शाखास्थित ६१औँ एटीएमको उद्घाटन गरेका हुन् ।

‘डीपी सेवा’ पनि सुचारु

त्यस्तै, वार्षिकोत्सवकै अवसर पारेर बैंकले ग्राहकलाई शेयर कारोबारका लागि थप सुविधा होस् भन्ने उद्देश्यले ‘डीपी सेवा’ पनि सुचारु गरेको छ । सो सेवा ज्योति विकास बैंकका सबै शाखाबाट उपलब्ध हुने जनाइएको छ ।

कर्मचारी सम्मानित

त्यसैगरी, वार्षिकोत्सवको अवसरमा १० वर्ष निरन्तर याेगदान गर्ने बैंकका कर्मचारीहरूलाई सम्मान गरियो । सञ्चालक समितिका अध्यक्ष हरिचन्द्र खड्का र प्रमुख कार्यकारी अधिकृत श्रीचन्द्र भट्टले संयुक्त रूपमा कर्मचारीहरूलाई पदक तथा कदरपत्र प्रदान गरे ।

कार्यक्रममा बैंकका प्रमुख कार्यकारी अधिकृत भट्टले बैंकले आफ्नो मूल उद्देश्य, दूर दृष्टि, ध्येय र मूल्य मान्यताहरूको अधीनमा रही अझ सफलताउन्मुख हुने र समाजको वृहत्तर हितका लागि योगदान पुर्याउने प्रतिवद्धता व्यक्त गरे ।

विशिष्ट अतिथि तथा राष्ट्रिय आविष्कार केन्द्रका अध्यक्ष डा. महावीर पुनले ज्योति विकास बैंकले केन्द्रको परियोजनामा गरेको सहयोग उदाहरणीय रहेको र उक्त सहयोगले राष्ट्रिय आविष्कार केन्द्रका लागि संस्थागत साझेदारीको बाटो खोलिदिएको बताए ।

हाल ज्योति विकास बैंकले १०५ शाखा कार्यालय, १ एक्सटेन्सन काउन्टर तथा ६१ वटा एटीएममार्फत सेवा उपलव्ध गराउँदै आइरहेको छ । हालसम्म बैंकले ३ लाखभन्दा बढी खाताबाट करिब ३७ अर्ब रूपैयाँ निक्षेप संकलन गरी २० हजारभन्दा बण्ी ऋणीलाई करिब ३१ अर्ब रूपैयाँ लगानी गर्न सफल भएको छ ।

प्रकाशित मिति: शुक्रबार, साउन ९, २०७७ १८:४५