वीरगन्जका अस्पतालहरूमा आकस्मिकबाहेक सबै सेवा बन्द

A+ A A-

वीरगन्जका सरकारी र निजी अस्पतालहरूमा शुक्रबारदेखि आकस्मिक उपचारबाहेकका अरू सबै सेवा बन्द गरिएको छ । स्वास्थ्यकर्मी र बिरामीमा समेत कोरोना संक्रमण भेटिन थालेपछि कोरोना संक्रमण समुदायस्तरमा नै फैलिएको भन्दै नेपाल चिकित्सक संघको आग्रहमा अस्पतालहरूले आकस्मिकबाहेकका अरू सबै सेवा बन्द गरेका हुन् ।

वीरगन्जमा सरकारी, निजी अस्पताल र शिक्षण अस्पताल गरी १ दर्जन अस्पताल रहेका छन् । संक्रमित फेला परेका एडभान्स हस्पिटल, अलि अर्थो ट्रमा सेन्टर र शान्ति पोली क्लिनिक भने यसअघि नै सिल भइसकेका छन् । चिकित्सक संघ वीरगन्ज शाखाका सचिव डा. उदय नारायण सिंहका अनुसार संघको आग्रहमा सरकारी तथा निजी अस्पताल र मेडिकल कलेज सबैमा आकस्मिकबाहेकका अरू सबै उपचार सेवा अर्को सूचना नआएसम्मका लागि बन्द गरिएको छ ।

समुदायस्तरमै कोरोना संक्रमण फैलिसकेकोले अस्पताल, स्वास्थ्यकर्मीका साथै उपचारका लागि आउने बिरामीसमेत उच्च जोखीममा पर्ने भएकाले अस्पताल र क्लिनिक बन्द गर्न संघले आग्रह गरेको सचिव सिंहले बताए ।

'वीरगन्जमा कोरोना संक्रमण समुदायस्तरमै फैलिसकेको छ,' उनले भने, ‘डाक्टर, बिरामीमा पनि संक्रमण फेला परिरहेको छ, त्यसैले अब थप नयाँ मानिसमा संक्रमण नसरोस् भनेर संघले यो निर्णय गरेको हो । वीरगन्जमा बुधबार राति २ जना चिकित्सक र अस्पतालमा भर्ना गरिएका ५ जना बिरामीमा संक्रमण पुष्टि भएपछि चिकित्सक संघले शुक्रबार विज्ञप्ति नै निकालेर साउन ९ देखि अर्को सूचना नआएसम्मका लागि सबै अस्पताल र क्लिनिकहरू बन्द गर्न आग्रह गरेको हो ।

संघले निजी क्लिनिक पनि बन्द गर्न आग्रह गरेको भए पनि वीरगन्जका केही निजी क्लिनिकहरू भने संचालनमै रहेका छन् । 'हामीले निजी क्लिनिक पनि बन्द गर्न आग्रह गरेका छौँ,' संघका सचिव डा. सिंहले भने, ‘तर, केही चिकित्सकले आफ्नो ज्यान नै जोखिममा राखेर काम गर्छन् भने हामी रोक्न जादैँनौँ ।’

संघले विज्ञप्ति जारी गरेपछि वीरगन्जको १ मात्र सरकारी अस्पताल नारायणी अस्पतालमा आकस्मिक र प्रसूति विभागबाहेक अरू सबै उपचार सेवा बन्द गरिएको अस्पतालका निमित्त मेसु डा. सुरेन्द्र चौधरीले जानकारी दिए । उनका अनुसार मेडिसिन, सर्जरी, अर्थो र आईसीयू कक्षबाट बिरामीलाई डिस्चार्ज गरी खाली गराइएको छ । अहिले इमरजेन्सी र गाइनो वार्ड मात्र चलिरहेको छ,’ चौधरीले भने, ‘यीबाहेक अरू सबै विभाग बन्द गरिएको छ ।'

वीरगन्ज हेल्थ केयर अस्पतालमा पनि शुक्रबारदेखि बहिरङ्ग (ओपीडी) सेवा बन्द गरिएको अस्पतालका संचालक डा. अबुल हयश अन्सारीले जानकारी दिए ।

यता, वीरगन्जको १ मात्र सरकारी अस्पताल नारायणी अस्पतालमा शुक्रबारदेखि आकस्मिकबाहेक ओपीडीसहितका अरू सबै सेवा बन्द भएपछि भने बिरामी समस्यामा परेका छन् । उपचारका लागि शुक्रबार बिहान अस्पतालमा पुगेका बिरामीहरू, अस्पताल बन्द भएको सूचना पाएपछि बिचल्लीमा परेका हुन् ।

उपचारका लागि पुगेका बिरामी र सेवाग्राहीलाई अस्पतालका सुरक्षागार्डले गेटबाटै फर्काइदिने गरेका छन् । सुरक्षागार्डले अस्पतालको गेटबाटै फर्काइ दिएपछि बिरामी छोरालाई बोकेर घर फर्किँदै गरेका हरपतगन्जका किशोरी पण्डितले भने, ‘प्राइभेट क्लिनिकमा इलाज (उपचार) गराउने पैसा छैन, सरकारी अस्पतालमा सस्तोमै इलाज हुन्थ्यो । तर, अस्पताल नै बन्द छ ।’

शुक्रबार अस्पतालको गेटमा भेटिएकी वीरगन्ज पिपराकी सुगान्धी देवीले भनिन्, ‘सरकारी अस्पताल नै बन्द गरिदिएछन्, अब गरिबहरू इलाज नै नपाएर मर्ने भइयो ।’

प्रकाशित मिति: शुक्रबार, साउन ९, २०७७ १८:१३