डोटीको पूर्वीचौकी गाउँपालिकाका इन्जिनियर कुटिए

A+ A A-

डोटीको पूर्वीचौकी गाउँपालिकाका इन्जिनियर कुटिएका छन्। स्थानीय सरस्वती मावि सानागाउँ खानेपानी उपभोक्ता समितिका अध्यक्ष देवबहादुर खड्काले गाउँपालिकाका इन्जिनियर शंकरराज खनालमाथि कार्यालयमै हातपात गरेका हुन् ।

बिहीबार दिउँसो गाउँपालिकाका निमित्त प्रमुख प्रशासकीय अधिकृतको कार्यकक्षमा अध्यक्ष खड्काले हातपात गरेको गाउँपालिकाले निकालेको विज्ञप्तिमा उल्लेख गरिएको छ।

गाउँपालिकाका निमित्त प्रमुख प्रशासकीय अधिकृत टेकबहादुर खड्काकाे हस्ताक्षर रहेकाे विज्ञप्तिमा कार्यालयमै कुटपिट गर्ने खड्काविरूद्ध कडा कारबाहीको माग राख्दै घटनाको भर्त्सना गरिएको छ।

सांसद कोषको रकमबाट छुट्टयाएको २० लाख रूपैयाँ योजनाको विषयलाई लिएर आफूमाथि हातपात भएको इन्जिनियर खनालले बताएका छन् । उक्त खानेपानी योजनाको प्राविधिक मूल्याङ्कन गर्दा ६ लाख ७२ हजार बराबरको मात्रै काम भएको देखिएकाे इन्जिनियर खनालले बताए।

खनालका अनुसार खानेपानी योजनाका अध्यक्ष खड्काले ५ लाख ७० हजार रुपैयाँ पेस्की लिएर काम सुरू गरेका थिए। प्राविधिकले टिप्पणी गर्दा त्रुटि हुन गई मसान्तको अन्तमा १२ लाख भुक्तानी दिइएको खनालले बताए ।

‘प्राविधिक त्रुटिका कारण १२ लाख रुपैयाँ भुक्तानी भएको छ। तर, काम ६ लाख ७२ हजार रुपैयाँको मात्रै भएको छ’, इन्जिनियर खनालले भने, ’उपभोक्ता समितिले श्रमदानको ८८ हजार घटाएर ५ लाख ८४ हजार रुपैयाँ जति भुक्तानी हुनुपर्ने हो, त्यसमा ५ लाख ७० हजार पेस्की लिइसकेका कारण २० हजारको आसपासमा मात्रै भुक्तानी पाउनुपर्ने हो। बढी भुक्तानी लिएको रकम उपभोक्ता समितिले फिर्ता गर्नुपर्छ भनेपछि ममाथि हातपात गरियो।’

योजनाका अध्यक्षले भुक्तानी भएको सबै रकम आफूले पाउनुपर्ने भनी गाली गर्दै एक्कासी कार्यालयभित्र आक्रमण गरेको इन्जिनियर खनालले बताए।

प्रकाशित मिति: शुक्रबार, साउन ९, २०७७ ०९:२४