देउवा रोषः खड्गप्रसाद होइन करप्रसाद

A+ A A-

नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीलाई ‘खड्गप्रसाद नभई करप्रसाद ओली’ भन्नुपर्ने बताएका छन् । नेपाली कांग्रेसका जिल्ला कोषाध्यक्षहरूको पोखरामा बिहीबारदेखि सुरु तेस्रो राष्ट्रिय सम्मेलन उद्घाटन गर्दै उनले सो टिप्पणी गरेका हुन् ।

‘सरकारले यति धेरै कर लगायो कि अब प्रधानमन्त्री ओलीको नाम नै ‘करप्रसाद ओली’ राख्नुपर्ने भयो,’ पूर्वप्रधानमन्त्री समेत रहेका नेता देउवाले भने । उनले करकै कारण मानिसहरू ठूलो मर्कामा परेको आफूलाई गुनासो आउने गरेको उनको भनाइ छ ।

वर्तमान सरकारले नेपाली सेनामाथि राजनीतिक हस्तक्षेप गर्न थालेको आरोपसमेत लगाए दउवाले । सुरक्षा परिषद्बिना सेना परिचालन गर्नु सेनामाथि पूर्ण रूपमा सरकारको हस्तक्षेप हुने उनको दाबी छ ।

‘सेनामाथि राजनीतिक हस्तक्षेप अहिलेसम्म हुन सकेको थिएन, वर्तमान सरकार सेनामाथि हस्तक्षेप गरेर निरंकुशतामाथि जान थाल्यो,’ देउवाले भने ।

उनले भने, यस्तो विधेयक ल्याएमा कांग्रेसले सशक्त प्रतिकार गर्नेछ । सरकारले प्रेसमाथि अंकुश लगाएर निरंकुशता लाद्न खोजेको छ ।’
उनले नेपाली कांग्रेसले प्रजातन्त्र, प्रेस स्वतन्त्रता, अभिव्यक्ति स्वतन्त्रता र आवधिक निर्वाचन जस्ता विषयमा लड्दै आएकामा वर्तमान सरकारले अंकुश लगाउन खोज्ने चेष्टा गरेको बताए ।

यस्तै, देउवाले भने, पार्टीभित्र अनुशासन समिति बनेको छ । अब पार्टीको नीति नियम नमान्ने र पार्टीले टिकट दिएका उम्मेदवार हराउने, घात अन्तर्घात गर्नेमाथि पार्टी कडा रूपमा प्रस्तुत भई कारबाही गर्नेछ ।’

उनले आगामी वैशाखदेखि पार्टीको जागरण अभियानका साथ गाउँगाउँ जाने समेत घोषणा गरे । जसबाट पार्टी एक भएको सन्देशसमेत गाउँमा जाने बताए ।

कांग्रेसका वरिष्ठ नेता रामचन्द्र पौडेलले संवैधानिक परिषद्मा सरकारले गरेको नियुक्तिबारे बोल्दै ओली सरकारले प्रतिपक्षी दलको हैसियत नराखी निरंकुशवादी शैलीबाट नियुक्ति गरेकामा कडा आलोचना गरे ।

महामन्त्री डा. शशांक कोइरालाले पार्टी एक भएर अघि बढ्न आफूले जुनसुकै कुरा त्याग गर्न तयार रहेको बताए । उनले यस्ता सम्मेलनले पार्टीलाई मजबुद बनाएर लैजान दबाब दिने समेत उल्लेख गरे ।

पार्टी नेता प्रकाशमान सिंहले पार्टी पराजयको जिम्मा नेतृत्वले लिनुपर्ने बताए । राष्ट्रिय सभा कांग्रेस संसदीय दलका नेता सुरेन्द्र पाण्डेले सरकार अधिनायकवादतर्फ उद्यत भएको आरोप लगाए ।

पोखरा सभागृहमा दुई दिनसम्म चल्ने सम्मेलन पार्टीलाई चलायमान र सुदृढीकरण बनाउने उद्देश्यले आयोजना गरिएको कांग्रेस जिल्ला कोषाध्यक्षहरूको राष्ट्रिय कार्यसमितिका अध्यक्ष गोविन्द पुडासैनीले बताए । उनले सम्मेलनले पार्टीलाई गुट–उपगुट अन्त्य गरी एक ढिक्का भएर अघि बढ्न दबाबमूलक सुझाव दिने उल्लेख गरे ।

सम्मेलनले विदेश पलायन युवाहरूलाई स्वदेशमै रोजगारीको व्यवस्था गर्न सरकारलाई दबाब दिने र भ्रातृ तथा शुभेच्छुक संस्थालाई महाधिवेशनमार्फत अघि बढाउन पार्टीलाई दबाब दिने बताइएको छ ।

सम्मेलनले सरकारका गतिविधि चित्तबुझ्दो नभएकाले देशव्यापी विरोधका कार्यक्रम सञ्चालन गर्न केन्द्रलाई आग्रहसमेत गर्ने र कास्की क्षेत्र–२ सहित रिक्त स्थानमा निर्वाचन गराउन सरकारलाई दबाब दिने जिल्ला कोषाध्यक्षहरूको राष्ट्रिय कार्यसमितिका महासचिव लक्ष्मी पाण्डेले बताइन् ।

प्रकाशित मिति: शुक्रबार, चैत २९, २०७५ ०४:२३