लम्कीचुहा-१ ले ७७ दिनमै खर्चियो ७३ लाख, भत्तामा मात्रै सकियाे ११ लाख

A+ A A-

कैलालीको लम्कीचुहा नगरपालिका–१ को वडा कार्यालयले कोरोना (कोभिड–१९) रोकथाम तथा व्यवस्थापनका नाममा ७३ लाख रुपैयाँभन्दा बढी खर्च गरेको छ ।

वडा कार्यालयले ७३ लाख ८६ हजार ३ सय रुपैयाँको खर्च विवरण सार्वजनिक गरेको छ । स्यानिटाइजर, मास्क, ग्लोबलगायतका स्वास्थ्य सामग्री खरिदमा १ लाख ४५ हजार खर्च गरेको छ ।

यस्तै, कार्पेट र कपडा खरिदमा ७ लाख १२ हजार, खाद्यान्नमा ६ लाख १३ हजार, नेपाल प्रहरी र सशस्त्र प्रहरीको खाना खर्चबापत १ लाख ४८ हजार, खानेपानी र बिजुली खर्च २ लाख ५२ हजार, ६ ओटा होटेलबाट प्राप्त बिल शीर्षकमा ३६ लाख ११ हजार खर्च गरेको छ ।

विभिन्न शीर्षकमा गरी जम्मा ७३ लाख ८६ हजार ३१८ रुपैयाँ खर्च भएको वडा कार्यालयले जनाएको छ ।

भत्तामा मात्रै ११ लाख

वडाले पहिलो चरणमा १८ जना स्वयंसेवक खटाएको थियो । दोस्रो चरणमा चेतना प्राथमिक विद्यालयमा २ जना, शारदा माध्यमिक विद्यालयमा ७ जना, लम्की बहुमुखी क्याम्पसमा ५ जना, बाल कल्याण माध्यमिक विद्यालय भुरुवामा ५ जना गरी १९ जना स्वास्थ्यकर्मी र स्वयमसेवक खटाएको थियो ।

स्वयमसेवकलाई कर कट्टी गरेर दैनिक ५ सय र स्वास्थ्यकर्मीलाई दैनिक १ हजार भत्ता दिइएको वडा सचिव विष्णुकान्त प्याकुरेलले बताए । भत्ता खर्च मात्रै जोड्दा ११ लाख हुन आएको छ । वडा कार्यालयले स्थानीय १ महिला पोजिटिभ देखिँदा गाउँ सिल गर्दा खटाइएका स्वयमसेवकको भत्ता शीर्षकमा मात्रै ८ लाख ८९ हजार खर्च गरेको छ ।

विभिन्न क्वारेनटाइनमा खटिएका समिति तथा उप–समितिलाई भत्ता भन्दै १ लाख ९२ हजार बढी रकम खर्च गरेको पाइएको छ ।

दैनिक १ लाख हाराहारीमा खर्च

वडा कार्यालयले दैनिक जसो १ लाखको हाराहारीमा खर्च गरेको पाइएको छ । कोरोना कहरका कारण ११ चैतदेखि लकडाउन सुरु गरिएकोमा वडा नम्बर १ ले ७७ दिनसम्म क्वारेन्टाइन सञ्चालन गरेको थियो । त्यो अवधिमा ७७ दिनमा ७३ लाख ८६ हजार ३ सय १८ रुपियाँ खर्च भएको वडा अध्यक्ष जनक बमको भनाइ छ ।

नगरपालिकाबाट ४५ लाख पेश्की लिइसकेको र थप रकम लिन बाँकी नै रहेको बताए । ‘हामीले व्यवस्थित तरिकाले काम गरेका थियौँ । ७७ दिनको अवधिमा ९ सय ८८ जनालाई क्वारेन्टाइनमा राख्दा, खुवाउँदा, बसाउँदा र उनीहरूको हेरचाह गर्न खर्च भएकै हो,' उनले भने, 'यसमा अनियमितता भएको छैन । हामीसँग खर्च विवरण सुरक्षित छ, जतिबेला जसले आएर हेर्दा पनि हुन्छ ।’

नगरपालिकाका सूचना अधिकारी माधव कुमार जैसीले वडा कार्यालयले खर्च विवरण सार्वजनिक गरेको भए पनि नगरपालिकामा भने पेस भइनसकेको बताए । ‘वडा कार्यालयले बुधवार सार्वजनिक सुनुवाइ गर्दै खर्च विवरण सार्वजनिक गरेछ, ' उनले भने, 'तर यहाँसम्म पेस भइसकेको छैन । सबै वडाहरूको विवरण सङ्कलनको काम भइरहेको छ । केही दिनभित्रै सार्वजनिक गर्छौं ।’

चौतर्फी आलोचना

वडा कार्यालयले खर्च विवरण सार्वजनिक गरेसँगै अनियमितता भएको भन्दै चौतर्फी आलोचना भइरहेको छ । नेपाली कांग्रेस नगर कार्यसमिति लम्कीले विज्ञप्तिमार्फत नै आपत्ति जनाइसकेको छ भने लम्कीका स्थानीय, बुद्धिजीवीहरूले पनि सामाजिक सञ्जालमार्फत आक्रोश पोखिरहेका छन् ।

कांग्रेसका स्थानीय युवा नेता लभ शाहीले कोरोना व्यवस्थापनको नाममा वडा कार्यालयले अनियमितता गरेको आरोप लगाए । 'वडा कार्यालयले विभिन्न १७ शीर्षकमा रकम खर्च भएको देखाएको छ,' उनले भने, 'तर, शीर्षकहरू पनि दोहोरिएका छन् ।

'प्रत्येक क्वारेन्टाइनमा मेच चलाइएको थियो भने केही दिन होटेलबाट पनि ल्याइएको थियो । तर, होटेल खर्च भनेर ३६ लाख ११ हजार ६५ रुपैयाँ राखिएको छ,' उनले भने, 'खटिएका समिति र उपसमितिहरूलाई १ लाख ९२ हजार भत्ता भनिएको छ तर त्यो समितिमा म पनि थिएँ । हामीले भत्ता लगेका छैनौँ ।'

उनले थपे, ‘१ जना सङ्क्रमित फेला पर्दा टोल नै सिल गरिएको थियो । त्यो क्रममा ८ लाखभन्दा बढी खर्च भनिएको छ । यो गलत र झुट विवरण पेस गरिएको छ । हामीले यसको छानबिनका लागि समिति गठन हुनुपर्छ भनेर निवेदन दिएका छौँ ।’

लम्कीका स्थानीय कृष्ण वटालाले वडा कार्यालयले अस्वाभाविक खर्च गरेको बताए । कोरोना व्यवस्थापनको नाममा अनियमितता भएको उनले आरोप लगाए ।

प्रकाशित मिति: बिहीबार, साउन ८, २०७७ १७:२१