निजी क्षेत्रलाई प्रधानमन्त्रीको आश्वासनः सहकार्यका लागि सरकार आतुर छ

A+ A A-

प्रधानमन्त्री केपी शर्मा ओलीले निजी क्षेत्रसँग सहकार्य गर्न सरकार तयार रहेको बताएका छन् । नेपाल उद्योग वाणिज्य महासंघको ५३औं वार्षिक साधारणसभालाई सम्बोधन गर्दै प्रधानमन्त्री ओलीले यस्तो बताएका हुन् ।

‘सरकार–निजी–साझेदारीका लागि सरकार तयार छ, निजी क्षेत्रभन्दा पनि सरकार उदार भएर अघि बढेको छ,’ प्रधानमन्त्री ओलीले भने ।

उनले निजी क्षेत्रको विकासका लागि सहयोग गर्न सरकार तयार रहेको पनि बताए । सरकारले ‘समृद्ध नेपाल सुखी’ नेपालीको अवधारणाअनुसार आर्थिक विकासको गति बढाइरहेकाले निजी क्षेत्रलाई आवश्यक सहयोग गर्ने प्रधानमन्त्री ओलीको आश्वासन थियो ।

‘सरकार निजी क्षेत्रलाई पनि साथै लिएर अघि बढ्न चाहन्छ । विदेशी लगानीकर्तालाई समेत अनुकूल हुने वातावरण बनाउँदै छौं । यस्तो बेलामा स्वदेशी लगानीकर्तालाई सहयोग नगर्ने भन्ने हुनै सक्दैन । त्यसैले तपाईंहरूले पनि कहाँ के कस्तो सहयोग र परिवर्तन खोज्नुभएको हो, त्यो किटान गरेर भन्नुहोस्, सरकारले तपाईंहरूका कुरा सुन्छ, काम गर्छ,’ प्रधानमन्त्री ओलीले भने ।

त्यसअघि कार्यक्रममा सम्बोधन गर्दै नेपाल उद्योग वाणिज्य महासंघका अध्यक्ष भवानी राणाले औद्योगिक वातावरण अझै राम्रो नभएको धारणा राखिन् । पर्याप्त औद्योगिकीकरणमार्फत रोजगारी सिर्जना तथा उद्यमशीलता प्रवद्र्धन गर्न आवश्यक भए पनि उद्योगी व्यवसायीले थुप्रै समस्या भोगिरहेको अध्यक्ष राणाको भनाइ छ ।

‘अहिले लगानी गरिरहेका उद्योगी व्यवसायीले थुप्रै समस्या भोगिरहेका छन्, स्थानीय तहमा अहिले पनि उद्यमी व्यवसायीहरू विशेष गरी साना व्यवसायीहरूले थुप्रै समस्या भोगिरहेका छन् । वाणिज्य नवीकरणका समस्या, प्यानका समस्या तथा ब्याजदरका समस्या ज्यूँका त्युँ छन्, ससानो पुँजीमा व्यवसाय गरेका व्यवसायीलाई समयमा कर नतिरेको निहुँमा उनीहरूले धान्नै नसक्ने गरी कर जरिमाना थोपर्ने नीतिका कारण ठूला व्यवसायीको घरखेत नै जाने स्थिति जिल्लाहरूमा व्याप्त छ । स्थानीय, प्रदेश र संघीय सरकारको करका विषय समाधान भएका छैनन्,’ अध्यक्ष राणाले भनिन् ।

अध्यक्ष राणाको यस्तो भनाइप्रति प्रधानमन्त्री ओलीले केही व्यावहारिक कठिनाइ देखिएको र सरकार त्यसको समाधान गर्दै अगाडि बढेको बताए । देश संघीय संरचनामा गएकाले सुरुवाती चरणमा केही अस्पष्टता रहेको भए पनि अब त्यस्तो समस्या नरहेको प्रधानमन्त्री ओलीको भनाइ थियो ।

महेशलाल प्रधानलाई लाइफ टाइम एचिभमेन्ट अवार्ड
महासंघका पूर्वअध्यक्ष महेशलाई प्रधानलाई लाइफ टाइम एचिभमेन्ट अवार्ड प्रदान गरिएको छ । महासंघलाई बलियो बनाउन विशेष योगदान दिएबापत पूर्वअध्यक्ष प्रधानलाई सम्मान गरिएको महासंघका उपाध्यक्ष उमेशलाल श्रेष्ठले जानकारी दिए ।

यस्तै, महासंघले पूर्वअध्यक्ष चण्डीराज ढकाल र नवलपरासी उद्योग वाणिज्य संघका पूर्वअध्यक्ष भरत थापालाई विशेष सम्मान गरिएको छ ।

१० वटा संघ पुरस्कृत
महासंघले १० वटा संघलाई पुरस्कृत गरेको छ । पुरस्कृत हुने संघहरूमा ‘ग’ वर्गबाट पाँचथर जिल्ला उद्योग वाणिज्य संघ पहिलो, कोहलपुर उद्योग वाणिज्य संघ दोस्रो र जुम्ला उद्योग वाणिज्य संघ तेस्रो भएका छन् ।

यस्तै, ‘ख’ वर्गबाट म्याग्दी उद्योग वाणिज्य संघ पहिलो, रत्ननगर उद्योग वाणिज्य संघ दोस्रो र वालिङ उद्योग वाणिज्य संघ तेस्रो भएका छन् ।

‘क’ वर्गबाट लेखनाथ उद्योग वाणिज्य संघ पहिलो, ललितपुर उद्योग वाणिज्य संघ दोस्रो र मोरङ उद्योग वाणिज्य महासंघ तेस्रो भएको महासंघका उपाध्यक्ष श्रेष्ठले जानकारी दिए ।

महासंघले नेपाल–भारत उद्योग वाणिज्य संघलाई पनि सम्मान गरेको छ ।

प्रकाशित मिति: शुक्रबार, चैत २९, २०७५ ०४:००