सरकारको निर्णयसँगै उडान भर्न यती एयरलाइन्सले थाल्यो तयारी

A+ A A-

सरकारले १ भदौबाट आन्तरिक र अन्तर्राष्ट्रिय उडान खुलाउने निर्णय गरेसँगै एयरलाइन्स कम्पनीहरूले आन्तरिक तयारी तीव्र पारेका छन् ।

लकडाउनअघिकै टिकट मूल्य र सुरक्षित तरिकाले उडान भर्न एयरलाइन्सहरूले आफ्नो तयारी गरिरहेका छन् । संक्रमणको जोखिम रहेकै अवस्थामा सञ्चालन हुने हवाई सेवालाई सुरक्षित बनाउन एयरलाइन्सहरूले आफ्नो तयारी गरिरहेका हुन् ।

यति एयरलाइन्सका प्रमुख कार्यकारी अधिकृत (सीईओ) अनोज रिमालले यात्रुहरूलाई ढुक्क भएर यात्रा गर्न आग्रह गरे । सम्पूर्ण सुरक्षाका उपाय आफूहरूले अपनाएकाले ढुक्क भएर यात्रा गर्न उनले आग्रह गरे । ‘प्यासेन्जर ढुक्क भए हुन्छ । सुरक्षाका सम्पूर्ण उपाय अपनाएका छौँ । मास्क, स्यानिटाइजर, डिसइन्फेक्सन भएको जहाजमा चढ्दा कोभिडको हिसाबले असुरक्षा हुने अवस्था छैन्,’ उनले भने ।

कोभिडअगाडिको अवस्थाभन्दा अहिले १ घण्टाअगाडि नै यात्रुहरूलाई बोलाइएको छ । सुरक्षा जाँचदेखि लिएर सम्पूर्ण प्रोटोकल पूरा गर्न समय लाग्ने भएकाले पहिलेको समयभन्दा १ घण्टाअगाडि नै यात्रुहरूलाई बोलाइएको हो ।

यात्रुहरूले कोभिड-१९ अगाडिकै मूल्यमा विमानमा यात्रा गर्न पाउने उनले बताए । यती एयरलाइनले व्यावसायिक उडानका लागि बुकिङ खुलाएको छ ।

साथै, तारा एयरको बुकिङ खुला गरिएको छ । आगामी भदौ १ देखिको बुकिङ खुला गरेको उनले बताए । विमानमा यात्रा गर्दा अनिवार्य रूपमा मास्क लगाएको हुनुपर्ने, चेक इन गर्दा १.४ डिग्रीभन्दा बढी तापक्रम भएमा यात्रा प्रतिबन्ध लगाइने गरी यसअघि नै प्राेटोकल बनिसकेको छ । कोभिडसँग सम्बन्धित कुनै पनि लक्षण देखिएमा यात्रा गर्न नपाइने भएको छ ।

यस्तै, विमानभित्र यसअघि उपलब्ध सम्पूर्ण सेवाहरू निषेध गर्दै शाैचालय प्रयोगमा पनि पूर्ण निषेध गरिएको छ । यात्रुहरूले विमान चढ्नुअघि अनिवार्य एयरलाइन्सले उपलब्ध गराएको स्यानिटाइजर प्रयोग गर्नुपर्नेछ । कुकुर बिरालोजस्ता कुनै पनि घरपालुवा जनावर ओसारपोसार गर्न पाइने छैन ।

प्रकाशित मिति: बिहीबार, साउन ८, २०७७ १४:४५