सडकमा रित्ता सार्वजनिक सवारीसाधन, चालक भन्छन् : खर्च मात्रै भो

A+ A A-

बिहीबारदेखि सार्वजनिक सवारीसाधन संचालनमा आएसँगै काठमाडौँका सडकमा काेराेना महामारी आउनुअघि जस्तै भीडभाड बढेको छ । सरकारले १ सय २० दिनको लकडाउन खुला गरेसँगै सार्वजनिक सवारीसाधन संचालन गर्दा पुरानै लयमा सडकमा जाम सुरु भएको छ । जाम सुरु भए पनि यो पटक भने बेग्लै दृश्य देख्न सकिन्छ । जहाँ सवारीसाधनभन्दा यात्रुको संख्या निकै नै कम छ ।

अर्थात् आजबाट संचालनमा आएका सार्वजनिक सवारीसाधन खाली अवस्थामा सडकमा कुदिरहेको देख्न सकिन्छ । पहिले अटेसमटेस गरेर उभिएर यात्रा गर्नुपर्ने उपत्यकाका सार्वजनिक सवारीसाधन लकडाउन खुले पनि रित्तै सडकमा दाैडिएकाे देख्न सकिन्छ । उपत्यका छोडेर गएका ३० प्रतिशत मानिस उपत्यका नफर्केकाे र यहीँका मानिस पनि कोरोना संक्रमणको त्रासले गर्दा कामविना घरबाहिर ननिस्केकाे हुँदा सार्वजनिक सवारीसाधनले यात्रु नपाएकाे प्रष्ट हुन्छ ।

विगत १५ वर्षदेखि मध्यपुर यातायात चलाउँदै आएका सोनाम बुढा १ सय २० दिन संकटपूर्ण रूपमा व्यत्तित गरेर पुन: काममा आएका छन् । तर उनले एक जना यात्रुसमेत नपाउँदा हैरान भएका छन् । उनी भन्छन्, ‘आजबाट गाडी चलाउने भनेर खुसी हुँदै आइयो । थोरै भए पनि कमसेकम आम्दानीको स्रोत त खुल्यो भन्ने साेचियाे । तर सडकमा आएपछि आम्दानी होइन, खर्च गर्नचाहिँ सडकमा गाडी निकालेछु जस्तो भयो ।'

बुढाले बिहान ६ देखि दिउँसो १२ बजेसम्म तीन पटकसम्म भक्तपुर र रत्नपार्क गरे । तर, उनले जम्मा १२ जना यात्रुलाई मात्र बोक्न पाए । तीन पटकसम्म ओहोरदोहोर गर्ने खर्च यात्रुबाट आउने भाडाभन्दा ६ गुणा बढी भएकाे उनी बताउँछन् ।

त्यसो त सरकारले सामाजिक दूरी कायम गरेर मात्रै यात्रु चढाउन भनेपछि नै यातायात व्यवसायीहरू पूर्ववत् रूपमा नाफा वा आम्दानी गर्न नसक्नेमा पुगिसकेका थिए । तर, सामाजिक दूरी कायम गरेरै भए पनि थोरै कमाइ हुने आशामा आजदेखि रित्तो गाडी नै लिएर सार्वजनिक सवारी आवतजावत गरिरहेका छन् । कम्पनीले पारिश्रमिक भन्दा दिनहुँ गाडीबाट उठेको पैसाबाटै आफूहरूलाई पैसा दिने भएकाले आजको पहिलो दिन खर्च मात्रै भएकाे चालक सहचालक बताउँछन् ।

त्यसो त उनीसँगै मध्यपुर यातायात नै चलाउँदै आएका विनोद चौधरी भने सार्वजनिक सवारी अहिले चलाउने पक्षमा छैनन् । खासै यात्रु नआउने भएपछि २ दिनमा एक पटक मात्रै चलाउने मनस्थितिमा पुगेका उनी अहिले खर्च बढ्दा आफैँ संकटमा पर्ने बताउँछन् ।

सडकमा बिहानैदेखि गाडी चलाइरहेका बुढा भने यात्रुहरू मास्क पनि नलगाई आउने र नियम पनि नमान्ने हुँदा त्यस्ता यात्रुलाई चढाउनु कि ओराल्नु भएको बताउँछन् । अधिकांशले मास्क प्रयोग गरे पनि गाडीभित्र पसेपछि खोल्ने गरेको बुढाका सहचालकको भनाइ छ ।

त्यसो त डाराए पनि नियममा बसेर गाडी संचालन गर्न सुरु गरेका बुढा पहिलो दिन नै यात्रुको लापरबाही र यात्रुको अभावले आर्थिक अभाव झनै बढाऊला कि भन्नेमा चिन्तित छन् ।

बुढा र चौधरी मात्र नभएर बिहीबार उपत्यकामा चल्ने अधिकांश सवारीसाधन रित्तै देख्न सकिन्थ्याे । सडकमा सवारीको चाप बढे पनि अन्य समयको जस्तै सार्वजनिक सवारीसाधनमा चढ्ने यात्रु भने विरलै मात्र देखिएका छन् ।

यातायात व्यवसायी महासंघका एक अधिकारी सुरुसुरुमा खर्च बढ्ने अध्ययनमै देखिए पनि विस्तारै सामान्य अवस्थामा लैजानका लागि अहिले जोखिम मोलेरै भए पनि सवारी सञ्चालनमा ल्याएको बताए । उनले भने, 'चालकहरूले बिहानैदेखि यात्रु छैनन्, के कुदाउनु, पेट्रोल डिजेलको नाश मात्रै हो भन्दै फोन गरे पनि हामीले एक/दुई दिन कुदाउन आग्रह गरिरहेका छौँ, आज भोलि गर्दै संयमित हुँदै यात्रु सार्वजनिक सवारी चढ्न आउने उनको भनाइ छ ।'

प्रकाशित मिति: बिहीबार, साउन ८, २०७७ १४:०३