भारतले धौलीगंगा जलविद्युत परियोना बाँधको ढोका पुनः खोल्ने

A+ A A-

भारतले दार्चुला सदरमुकाम खलङ्गाभन्दा माथिल्लो क्षेत्रमा निर्माण गरेको धौलीगंगा जलविद्युत परियोजनाको बाँधको ढोका पुनः खोल्ने भएको छ। यही १५ साउन राति १२ बजेदेखि १६ साउन साँझ ६ः४५ बजेसम्मको लागि भारतले धौलीगंगा बाँधको ढोका खोल्ने भएको हो।

धौलीगंगा जलविद्युत परियोजनाको ड्याम साइटमा सिल्ट फ्लसिङको काम गर्न बाँधको ढोका खोल्न लागिएको जिल्ला प्रशासन कार्यालय दार्चुलाले जनाएको छ। बाँधको ढोका खोल्दा महाकाली नदी तटीय क्षेत्रमा आवतजावत हुन नदिन पिथौरागढ प्रशासनले दार्चुला जिल्ला प्रशासनलाई पत्रचार गरेको छ।

जिल्ला प्रशासन कार्यालय दार्चुलाले यो अवधिमा व्यास गाउँपालिका–५ धौलाकोटदेखि लेकमको लालीसम्मका स्थानीयलाई नदी किनारमा नजान तथा सावधानी अपनाउन आग्रह गरेको छ। जिल्ला प्रशासन कार्यालय दार्चुलाका प्रमुख जिल्ला अधिकारी शरदकुमार पोखरेलले महाकाली नदी किनार छेउछाउबाट बालुवा ननिकाल्न, गाई वस्तु नचराउन तथा दाउरा संकलन नगर्न आग्रह गरे।

बैतडीको सेरादेखि कुस्मतघाटसम्मका नागरिकलाई नदी छेउछाउ आसपास नजान अनुरोध गरिएको छ। दार्चुला र बैतडीका साथै डडेल्धुरा, कञ्चनपुर भएर भारततिर बग्ने महाकाली नदीमा पानीको बहाव र सतह बढ्नसक्ने भएका कारण नदी छेउछाउमा नजान तथा सतर्कता अपनाउन नेपाल र भारतका स्थानीय प्रशासनले अनुरोध गरेका छन्।

यसअघि भारतले असार २०७० मा परियोजनाको ड्यामको बाँध जानकारीविनै खोल्दा दार्चुला र धार्चुला दुवैतिर क्षति भएको थियो।

त्यसपछि भने भारतले धौलीगंगा बाँधको ड्याम खोल्दा नेपालको प्रशासनलाई पत्रचार गर्ने गरेको छ। भारतले यसअघि गत १५ र १६ असारमा पनि सदरमुकाम खलंगाभन्दा माथिल्लो क्षेत्रमा निर्माण गरेको धौलीगंगा जलविद्युत परियोनाको बाँधको ढोका खोलेको थियो। २ सय ८० मेगावट क्षमताको जलविद्युतको ड्याम ५६ मिटर उचाई तथा २ सय ६० मिटर लम्बाईको छ।

प्रकाशित मिति: बिहीबार, साउन ८, २०७७ १२:५९