वन क्षेत्रलाई उत्पादनशील बनाए मात्र समृद्धि हासिल गर्न सकिन्छ : विज्ञ

A+ A A-

अनियन्त्रित रूपमा हुने फडानी रोकेर वन क्षेत्रलाई उत्पादनशील बनाउन सकिए समृद्धि हासिल गर्न सकिने विज्ञहरूले बताएका छन् । कृषि, सहकारी तथा प्राकृतिक स्रोत समितिमा बुधबार भएको छलफलमा विज्ञहरूले नेपालको वन क्षेत्रलाई उत्पादनशील बनाउनुपर्ने बताएका हुन् ।

डा. कृष्णचन्द्र पौडेलले नेपालको आधाभन्दा बढी क्षेत्र ओगटेको वन क्षेत्रको विकास गर्न सके १२ लाख प्रत्यक्ष रोजगारी सिर्जना हुने बताए । अहिले १ लाख पूर्णकालीन रोजगारीमा जोडिएको उल्लेख गर्दै उनले वन क्षेत्रबाट मात्रै वार्षिक १ खर्ब राजस्व प्राप्त गर्न सकिने बताए । वैज्ञानिक वन उत्पादन गर्ने क्षमता मन्त्रालय र उपभोक्तासँग समेत नभएकाले क्षमता अभिवृद्धिमा जोड दिनुपर्ने उनले बताए ।

अर्का विज्ञ सन्तोषमणि नेपालले वैज्ञानिक वनको नाममा जथाभावि रूख काट्ने, सोझो सालको मात्रै रूख काट्ने र आर्थिक हिनामिना हुने समस्या देखिएको बताए । तोकिएभन्दा बढी रूख कटान हुने र वैज्ञानिक वनका नाममा हुने गरेको व्यापक भ्रष्टाचार नियन्त्रण गर्नुपर्ने उनले बताए । नियामक निकाय र व्यापारिक संस्था फरक हुनुपर्ने उनले बताए ।

सांसदहरूले यसको व्यवस्थापनका क्रममा आएका समस्याहरू दिगो समाधान गरी अगाडि बढ्नुपर्ने बताएका छन् । वैज्ञानिक वन व्यवस्थापनका लागि बनेका नीति नियमहरूको कार्यान्वयन गर्दै यसको व्यवस्थापन सुधार गर्नुपर्ने उनीहरूको जोड छ ।

सार्वजनिक लेखा र कृषि सहकारी तथा प्राकृतिक स्रोत समितिले उपसमिति गठन गरेर वन व्यवस्थापनका नाममा भएको अनियमितता छानबिन गरिरहेको छ । पछिल्लो समय वन फडानी तीव्र गतिमा बढेको, लक्ष्यअनुसारको राजस्व संकलन भएको समस्याहरू बाहिर आएपछि छानबिन सुरु भएको हो । करिब १३ लाखलाई रोजगारी प्रदान गर्दै वार्षिक १ खर्ब रुपैयाँ राजस्व संकलनको लक्ष्य सरकारको छ ।